Słužba biaśpieki Ukrainy sabrała dokaznuju bazu i paviedamiła pra zavočnaje padazreńnie śpiavačcy i byłoj siabry «Partyi rehijonaŭ» Taisii Pavalij za kałabaracyjnuju dziejnaść i padtrymku ŭzbrojenaj ahresii Rasii suprać Ukrainy.
«Słužba biaśpieki sabrała dokaznuju bazu na śpiavačku i byłoha narodnaha deputata Taisiju Pavalij, jakaja apraŭdvaje ahresiŭnuju vajnu RF suprać Ukrainy. Napiaredadni poŭnamaštabnaha ŭvarvańnia RF jana vyjechała ŭ krainu-ahresar, dzie atrymała rasijskaje hramadzianstva i publična padtrymała Kreml», — havorycca ŭ pastanovie.
Paviedamlajecca, što padčas intervju maskoŭskamu internet-vydańniu Pavalij uschvalała Uładzimira Pucina i zaklikała da zachopu ŭsioj terytoryi Ukrainy. Taksama jana sprabavała dyskredytavać ukrainskich abaroncaŭ, jakija prymali ŭdzieł u bajach za Kijeŭ.
Pa danych SBU, akramia taho ŭ vieraśni 2023 hoda Pavalij pa zaprašeńni kiraŭnika akupavanaj Łuhanščyny Leanida Pasiečnika vystupiła na kancercie ŭ Łuhansku.
Sa sceny Pavalij vykazałasia ŭ padtrymku rasijskich zachopnikaŭ i hieraizavała ich udzieł u vajnie suprać Ukrainy.
Inicyjavanaja SBU ekśpiertyza paćvierdziła fakty padryŭnoj dziejnaści na karyść Rasii.
Na padstavie sabranych dokazaŭ śledčyja Słužby biaśpieki zavočna paviedamili śpiavačcy ab padazreńni pa troch artykułach Kryminalnaha kodeksa Ukrainy: kałabaracyjnaja dziejnaść; publičnyja zakliki da ahresiŭnaj vajny; apraŭdańnie, pryznańnie pravamiernaj uzbrojenaj ahresii RF suprać Ukrainy.
***
U zakanadaŭstvie Ukrainy padazreńnie (pidozra) u kryminalnym pracesie — farmalnaje śćviardžeńnie (zdahadka) upaŭnavažanych pravaachoŭnych orhanaŭ ab dačynieńni zhadanaj asoby da złačynstva, zasnavanaje na niekančatkovych (niapoŭnych, pramiežkavych) vynikach rasśledavańnia.
Kryminalny pieraśled kankretnaj asoby pačynajecca mienavita z času abviaščeńnia padazreńnia ŭ toj formie, jak heta praduhledžana zakanadaŭstvam adpaviednaj krainy.
Kamientary
Cikava, jakim budzie finał hetaj kałabarantki.