Litva ŭzvodzić niepadalok ad miažy ź Biełaruśsiu vajskovy haradok
Ułady Litvy addali rasparadžeńnie pabudavać vajskovy haradok dla sałdat bundeśviera na palihonie Rudninkaj, raźmieščanym na poŭdzień ad Vilni za 35 km ad miažy ź Biełaruśsiu, piša «Hołas Amieryki».
Ranicaj 19 žniŭnia tut adbyłasia simvaličnaja cyrymonija pachavańnia kapsuły. Płošča vajskovaha haradka składzie 170 hiektaraŭ. Prajektavańniem i budaŭnictvam vajskovaha abjekta budzie zajmacca litoŭskaja budaŭničaja kampanija Eikos statyba, ź jakoj Minabarony Litvy padpisała kantrakt u pačatku žniŭnia.
Premjer-ministr Litvy Inhryda Šymanicie zajaviła ŭčora: «Naša meta — nie pahražać abo zapałochvać, my nie prasłaŭlajem siłu, jak heta robiać našy apanienty. Ale my ŭpeŭnienyja i pavinny być zaŭsiody ŭpeŭnienyja, što, kali ŭźniknie nieabchodnaść, u nas nie budzie niedachopu ni voli, ni sił, tak što kožny, chto zachoča vyprabavać našu siłu, stracić žadańnie zrabić heta. I heta jašče adzin dokaz našych namahańniaŭ i imknieńnia zabiaśpiečyć lepšyja ŭmovy dla Sajuznaj słužby ŭ Litvie.
Biez našaj biaśpieki niama biaśpieki sajuźnikaŭ, bieź ich biaśpieki — niemahčymaja naša. My — usie razam u siońniašnim kanflikcie pamiž dabrom i złom. My — na baku dabra. My heta vydatna viedajem, tamu my pavinny być jašče macniejšyja».
Ministr abarony krainy Łaŭrynas Kaščunas padkreśliŭ: «Siońnia my sabralisia na palihonie Rudninkaj nie tolki dla taho, kab simvalična pačać pieršy etap budaŭnictva vajennaha haradka, ale i dla taho, kab dać abiacańnie sabie i svajoj budučyni. Za mocnuju rehijanalnuju biaśpieku, zasnavanuju na mocnaj voli da supracivu i adzinym kalektyŭnym adkazie. My abaviazujemsia abaraniać zachodniuju cyvilizacyju plačom da plača z našymi sajuźnikami».
Na hetym etapie budaŭnictva buduć uźviedzieny administracyjnyja budynki, infrastruktura absłuhoŭvańnia i zachoŭvańnia vajennaj techniki, uklučajučy składy, placoŭki, ramontnyja majsterni, haražy dla techniki, budynak achovy i internaty dla pražyvańnia 600 sałdat i stałovaja. Ahulnaja płošča budujucca infrastrukturnych zbudavańniaŭ pieršaj čarhi składzie amal 56 tys. kv. m.
Ahułam vajennaja infrastruktura zojmie 200 hiektaraŭ.
Litoŭski vajskovy ekśpiert Daryus Antanajcis raskazaŭ, što ŭ krainu pryjazdžaje bryhada vajskoŭcaŭ bundeśviera, kolkaść jakoj składaje prykładna 15 tysiač čałaviek, pryčym bolšaść vajskoŭcaŭ buduć supravadžać siemji.
«Dla častki ź ich i budzie pabudavany haradok u Rudninkaj, bo heta było adzinaje miesca niepadalok ad Vilni, i vajskoŭcy ź siemjami buduć žyć u vialikich haradach», — rastłumačyŭ jon.
Antanajcis nahadaŭ i pra inšy palihon — u Pabradzie (na paŭnočny ŭschod ad Vilni) — taksama raźmieščanym za 30 kiłamietraŭ ad miažy. «Jon (palihon u Pabradzie) našmat bolšy, i tam pravodziacca strelby ź vialikich kalibraŭ».
Metazhodnaść budaŭnictva vajennaha haradka mienavita ŭ Rudninkai ekśpiert tłumačyć tym, što ŭ Litvie nialohka adšukać svabodnuju terytoryju, dzie realizacyja takoha prajekta nie vyklikała b prablem.
Udakładniaje jon i charaktar abjektaŭ, što ŭzvodziacca. «Heta nie abarončyja zbudavańni, — tłumačyć Antanajcis. — Heta dobry płot — sietki, kalučy drot, bo Łukašenka pačaŭ hibrydnuju vajnu suprać Litvy, Łatvii i Polščy, vykarystoŭvajučy nielehalnych mihrantaŭ. Jon (płot) pabudavany dla taho, kab nielehałam było składaniej prajści na terytoryju ES i kab pamiežnikam było lahčej zreahavać i chutka spynić sprobu nielehalnaha pierasiačeńnia miažy».
Kamientary