Łukša raskazaŭ, jak sustreŭsia ŭ adnoj kamiery z Pačobutam. I pieradhistoryju ich daŭniaha kanfliktu

U vypusku TOKu były palitviazień Dźmitryj Łukša zhadaŭ pra svaje sustrečy za kratami z žurnalistam Andžejem Pačobutam.

Pa słovach Łukšy, kali jon užo znachodziŭsia ŭ źniavoleńni na Vaładarcy try miesiacy, u adzin ź dzion u ich kamieru zaviali troch novych ludziej. Siarod ich byŭ i Andžej Pačobut:

«Adčyniajucca dźviery, zachodziać try čałavieki. Ja pajšoŭ daviedvacca. (…) [Pytajusia], u kaho jakija artykuły. I Andžej niešta skazaŭ: 130-ja i jašče niešta. Ja taki: «A, pa palityčnych». Ja kažu: «Kidaj rečy. Potym padydzieš, patłumaču, jak i što».

raspalvańnie varožaści

Jon hladzić na mianie i pytajecca: «A ty nie Łukša vypadkova?» Ja kažu: «Tak. A ty chto?» I Andžej kaža: «Nu, jašče daviedaješsia! Ja Pačobut». My z Andžejem pierasiakalisia, kali ja jašče pracavaŭ na BT».

@tokbelarus Chudšij tielekanał Biełarusi. Sohłasny? #tielevidienije #milicijabiełarusi #biełaruś #milicija #policija #našaniva #łukašienko ♬ stellar (Slowed + Reverb) - .diedlonely & énouement

Łukša paličyŭ, što pamiž imi abaviazkova ŭźniknie kanflikt:

«Ja padumaŭ: «Voś heta zaraz viasielle pačniecca! Voś ža my ź im sčepimsia». Jon pakłaŭ rečy, i litaralna adrazu pravierka. My ŭsie šychtujemsia, i Andžej stanovicca pobač sa mnoju. Ja pamiataju, staju i dumaju: «Nu navošta ty pravakuješ? Nu navošta ty siudy staŭ? Nu zavodzić ža mianie!» A jon prosta staić i havoryć: «Nu jak, Dzima, niazvykła?»

Adnak kanfliktu nie adbyłosia. «U toj ža viečar jon padyšoŭ, my ź im pahavaryli».

Łukša zhadvaje, što pieršaja jaho sustreča z Pačobutam adbyłasia prykładna ŭ 2009 hodzie, kali jon zdymaŭ siužet ab sprečcy vakoł «Doma palakaŭ» u adnym z haradoŭ Biełarusi. Sajuz palakaŭ Biełarusi źviarnuŭsia ŭ sud.

«Sa słoŭ Andžeja, ja padyšoŭ da Anžaliki Borys zapisać ź joj intervju. Ja zapisvaju, a Andžej prachodziŭ niedzie pobač. Jon bačyć, što Borys daje mnie intervju — a jon viedaje, chto ja — i [kaža]: «Ej, ty kamu intervju daješ? Heta ž toj betešnik». I pačynaje niešta na mianie. U nas pačynajecca łajanka. (…)

Paźniej ja ŭ niekaha spytaŭ, chto heta. Mnie adkazali, što Pačobut», — raskazvaje Łukša i zaŭvažaje, što byŭ ździŭleny, što Pačobut pamiataje pra vypadak, jaki adbyŭsia šmat hadoŭ tamu.

Łukša kaža, što siabrami jany z Pačobutam nie stali, ale mieli narmalnyja adnosiny.

«Mnie Pačobut padabaŭsia jak čałaviek, jak sapraŭdy mocnaja asoba. Jon mienavita asoba, vielmi pryncypovy, razumny. Mnie padabałasia nazirać, jak jon siabie paviadzie ŭ roznych situacyjach. Kali jaho pieravodzili ŭ SIZA Hrodna, niahledziačy na etap, pierajezd, bo sam hety praces vielmi niepryjemny, jon byŭ ščaślivy.

My ŭ jaho pytali: «Andžej, moža ty nie razumieješ, što ciabie čakaje?» Jon kazaŭ: «Chłopcy, ja ŭsio razumieju, ja jedu damoŭ. Ja jedu ŭ svoj horad, jaki ja lublu, ja budu dychać pavietram hetaha horada». I bačna było, što heta nie pafas, što jon mienavita čakaje svajho horada. Jon budzie doma, i jaho heta budzie sahravać.»

***

Dźmitryj Łukša naradziŭsia ŭ 1989 hodzie. U kancy 2000-ch i pieršaj pałovie 2010-ch pracavaŭ na BT, byŭ viadučym «Zony Ch».

U 2020 zdymaŭ pratesty dla kazachstanskaha telekanała «Chabar». U 2022 byŭ aryštavany i prysudžany da 4 hadoŭ źniavoleńnia za ŭdzieł u demanstracyjach i «dyskredytacyju Biełarusi». Razam ź im była asudžanaja jaho žonka Palina Pałavinka. Adbyvaŭ pakarańnie ŭ kałonii ŭ Škłovie.

Vyzvaliŭsia 3 lipienia 2024 hoda pa pamiłavańni adnačasova z žonkaj, paśla čaho siamja źjechała ŭ Polšču.

Hladzicie całkam:

• 7
• 1
• 1
• 2
• 1
• 0
• 4
• 0