Indyja i Paŭdniova-Afrykanskaja respublika adchryścilisia ad prajekta stvareńnia valuty BRIKS

Nijakaha rašeńnia ab stvareńni adzinaj valuty z metaj skaracić vykarystańnie dalara nie prymałasia, zajaviŭ 6 śniežnia Reziervovy bank Indyi.

«Valuta BRIKS — heta była ideja, vyłučanaja adnym z členaŭ [błoka], jana abmiarkoŭvałasia, ale nijakaha rašeńnia pryniata nie było, — skazaŭ na pres-bryfinhu kiraŭnik Centrabanka Šaktykanta Das. — Treba taksama mieć na ŭvazie hieahrafičnuju raznarodnaść krain — u adroźnieńnie ad hieahrafična źviazanaj jeŭrazony».

Indyja imkniecca stymulavać vykarystańnie svajoj rupii ŭ transhraničnych raźlikach. Heta robicca ŭ ramkach palityki premjer-ministra Narendry Modzi pa ŭzmacnieńni krainy na mižnarodnaj arenie i jaje pazicyjanavańni ŭ jakaści vytvorčaj alternatyvy Kitaja.

Ale, jak i ŭ vypadku z Kitajem, hetamu pieraškadžaje, u pryvatnaści, toje, što valuta nie źjaŭlajecca svabodna kanviertavannaj i dziejničajuć abmiežavańni na ruch kapitału. Praz heta, naprykład, rasijskija pastaŭščyki nafty ŭ Indyju doŭha nie mahli atrymać apłatu za tavar i rupii źbiralisia na rachunkach u miascovych bankach.

«My nie robim nijakich krokaŭ pa dedalaryzacyi, — zajaviŭ Das. — My chočam źnizić ryzyki dla indyjskaha handlu, pakolki zaležnaść ad adnoj valuty časam moža być prablematyčnaj z-za pavyšeńnia ci panižeńnia kursu».

Za čatyry dni da taho suprać ahulnaj valuty BRIKS vykazałasia Paŭdniova-Afrykanskaja Respublika. U krainy niama płanaŭ stvarać takuju, zajaviła Ministerstva zamiežnych spraŭ PAR:

«U apošni čas niedakładnyja paviedamleńni pryviali da źjaŭleńnia niasłušnaha ŭjaŭleńnia pra toje, što BRIKS płanuje stvaryć novuju valutu. Heta nie tak. Dyskusii ŭ ramkach BRIKS viaducca pra handal pamiž krainami — členami błoka z vykarystańniem ich ułasnych nacyjanalnych valut».

Zajavy Indyi i PAR prahučali nieŭzabavie paśla taho, jak abrany prezident ZŠA Donald Tramp zajaviŭ, što kali BRIKS pasprabuje znajści alternatyvu dalaru i stvaryć ułasnuju valutu, Vašynhton uviadzie 100%-ja pošliny na pradukcyju krain błoka.

Ale i biez pahrozy Trampa praktyčnyja šancy na stvareńnie ahulnaj valuty imknulisia da nula. Bo pry jaje najaŭnaści patrebna adzinaja hrašova-kredytnaja palityka, a jak možna pravodzić takuju, naprykład, u Kitai i Rasii, kali pieršy staić na parozie deflacyi, a druhaja zmahajecca z (aficyjnaj) inflacyjaj u 9% z dapamohaj staŭki na ŭzroŭni 21%?

Kali ž heta budzie sintetyčnaja adzinka, pa anałohii sa śpiecyjalnymi pravami zapazyčańni (Special Drawing Rights, SDR, — valuta MVF na bazie košyka valut raźvitych krain), to jana nie pryžyviecca, jak nie pryžylisia i SDR, ličyć prafiesar Harvardskaj škoły Kienedzi Džefry Frenkiel, adzin z najbujniejšych ekśpiertaŭ pa valutach i hrašovaj palitycy.

Sintetyčnaja valuta pazbaŭlenaja pieravahi «chatniaj bazy» — ekanomiki, dzie jana b vykarystoŭvałasia ŭ jakaści nacyjanalnaj. Ciažka ŭjavić, što piać takich roznych krain mahli b žyć z adzinaj valutaj, budzie heta juań ci niejkaja sintetyčnaja adzinka, ličyć Frenkiel.

Na kastryčnickim samicie BRIKS u Kazani Pucin prapanavaŭ dla vyrašeńnia prablem z raźlikami zapuścić sistemu płaciažoŭ, alternatyŭnuju dalaravaj. Jon taksama prademanstravaŭ simvaličnuju «kupiuru BRIKS». Adnak prapanavanuju jašče ŭ 2023 hodzie ideju ahulnaj valuty ŭdzielniki samitu navat nie abmiarkoŭvali, u vynikovaj dekłaracyi nie zhadali, a pra płaciežnuju sistemu abyšlisia ahulnymi słovami.

• 0
• 1
• 7
• 0
• 0
• 0
• 0
• 0