Ukrainskija ekśpierty razabralisia, z čaho zrabili rasijski «Arešnik»

Pavodle źviestak krynic ukrainskaha partała Defense Express, «Arešnik» mahli sabrać u 2017-2018 hadach na bazie mižkantynientalnaj balistyčnaj rakiety (MBR) «Jars», i z tych časoŭ jon lažaŭ na składzie.

Na adnoj z detalaŭ «Arešnika» byli znojdzienyja sieryjny numar i data vytvorčaści — 12 krasavika 2017 hoda. Mienavita ŭ hetym hodzie Rasija źbirałasia pačać razhortvańnie stratehičnaha rakietnaha kompleksu RS-26 «Rubiež», jaki byŭ dalejšym raźvićciom prajekta RS-24 «Jars». Ale ŭ sakaviku 2018 hoda Minabarony admoviłasia ad płanaŭ pa ŭkaranieńni R-26 u svoj arsienał i vyklučyła jaho ź dziaržprahramy ŭzbrajeńniaŭ da 2027 hoda, zasiarodziŭšysia na hipierhukavym RK «Avanhard».

Ekśpierty ličać, što raspracoŭku «Arešnika» pačali bolš za 7 hadoŭ tamu, jak minimum u 2010-ch, tamu što 2017-y — heta hod vytvorčaści kankretnaj detali, jakuju pavinny byli vykarystoŭvać dla hatovaha prajekta.

Defense Express taksama źviartaje ŭvahu, što znojdzienaja detal maje indeks «JEFIT 302811.002». Analityki źviazvajuć hetuju markiroŭku z navukova-vytvorčym centram aŭtamatyki i pryborabudavańnia imia akademika Piluhina (NVCAP), jaki ŭvachodzić u «Raskosmas» i pastaŭlaje sistemy kiravańnia dla rakiet «Zienit», «Praton-M» i razhonnych błokaŭ «Frehat». Heta dazvalaje vykazać zdahadku, što NVCAP taksama zabiaśpiečvaje «Arešnik», jaki źbirajecca z kampanientaŭ MBR «Jars». 

U Pientahonie raniej taksama pryjšli da vysnovy, što «Arešnik» źjaŭlajecca madyfikavanaj viersijaj RS-26 «Rubiež», jakuju vyprabavali jašče ŭ 2011 hodzie. Minabarony Vialikabrytanii taksama ličyć «Arešnik» varyjantam hetaj MBR, adznačajučy, što Rasija maje abmiežavany zapas takich rakiet.

Techničnyja charaktarystyki «Arešnika» zastajucca nieviadomymi. Adnak kali vykazać zdahadku, što kanstrukcyja identyčnaja RS-26, to startavaja masa rakiety moža dasiahać 40-50 ton, a dalokaść palotu — 6000 km. 

Pra toje, što «Arešnik» nielha ličyć pieradavoj raspracoŭkaj, raniej kazaŭ inžynier-rakietčyk, były supracoŭnik ukrainskaha KB «Paŭdniovaje» Alaksandr Kačatkoŭ. Pavodle jaho słoŭ, sistema ŭjaŭlaje saboj skaročanuju viersiju «Jarsa» ź vialikaj kolkaściu bojehałovak.

«Bajavaja efiektyŭnaść «Arešnika» bieź jadziernaha abstalavańnia vielmi sumniŭnaja — heta ŭsio roŭna što karjernym samazvałam picu razvozić. Dakładnaść budzie plus-minus 100 mietraŭ, a to i horš, a zvyčajnaj vybuchoŭki kožnaja bojehałoŭka moža nieści kala 100 kh — toje ž samaje, što rasijskaja sistema załpavaha ahniu «Tarnada», jakuju ahresar vykarystoŭvaje z pačatku ŭvarvańnia», — padkreślivaŭ Kačatkoŭ.

• 18
• 0
• 26
• 3
• 2
• 1
• 0
• 0