Kitaj zamianiŭ pałovu rasijskaj nafty pastaŭkami z Brazilii i Anhoły

U lutym marskija pastaŭki nafty z Rasii ŭ KNR źmienšylisia da 500 tysiač barelaŭ u sutki suprać 1,05 młn u siarednim za papiarednija try miesiacy, paviedamlaje Reuters sa spasyłkaj na statystyku Kpler.

Rasijskija bareli Kitaj zamianiaje pastaŭkami z Brazilii i Anhoły: pieršaja pavialičyła ekspart na kitajski rynak z 0,91 da 1,05 młn u dzień, a druhaja — amal udvaja, z 0,67 da 1,13 młn barelaŭ štodzień.

Indyja, naadvarot, pavialičyła zakupki, kab atrymać jak maha bolš hruzaŭ da 27 lutaha — daty, kali sankcyi ŭstupajuć u poŭnuju siłu. U lutym na indyjski rynak z Rasii pastupała 1,71 młn barelaŭ u dzień — maksimalny abjom za try miesiacy.

Dalejšy los rasijskaj nafty, jakuju, akramia Indyi i Kitaja, u vialikich abjomach nie kuplaje nivodnaja kraina śvietu, zastajecca niajasnym. Sakratar indyjskaha ministerstva nafty Pankaž Žain zajaviŭ na hetym tydni, što party krainy hatovyja prymać tolki hruzy na tankierach, jakija nie trapili pad sankcyi. Heta aznačaje, što i kolkaść sudnaŭ, i abjomy pastavak źmienšacca, raskazali Reuters krynicy na indyjskich NPZ.

Sproba damovicca ź indyjcami na kanfierencyi India Energy Week, kudy ad Rasii jeździŭ kiraŭnik padsankcyjnaha «Saŭkamfłotu» Ihar Tankavidaŭ, skončyłasia ničym. Indyjskija pakupniki admovilisia apłačvać pasłuhi kampanii ŭ lubych valutach, uklučajučy rupii, paviedamili surazmoŭcy Reuters.

Raniej anałahičnyja abmiežavańni ŭviali party kitajskaj pravincyi Šańdun, u tym liku Cyndaa, jaki ŭvachodzić u top-5 u krainie. Pavodle śviedčańnia adnoj z krynic Reuters, pastaŭki rasijskaj nafty ŭ Kitaj užo ŭ sakaviku mohuć abvalicca na 70%, abo na 700-800 tysiač barelaŭ u sutki adnosna studzienia. Dziaržaŭnyja NPZ, chutčej za ŭsio, buduć admaŭlacca ad rasijskich barelaŭ, bo z-za sankcyj skaraciłasia kolkaść pasiarednikaŭ i strachoŭščykaŭ, hatovych udzielničać u takich ździełkach, tłumačyć surazmoŭca ahienctva.

Ciažkaści z prodažam nafty rasijskija naftaviki adčuvajuć užo ciapier. Pavodle acenak Goldman Sachs, 17 młn barelaŭ, jakija nie znajšli pakupnikoŭ, drejfujuć u mory ŭ tankierach, pieratvoranych u płavučyja schoviščy. Da leta hety abjom moža pavialičycca da 50 młn barelaŭ, prahnazujuć analityki banka.

Heta moža prymusić naftavyja kampanii skaracić zdabyču. Pakul ža jany sprabujuć pryvabić klijentaŭ dadatkovymi źnižkami.

Cana hatunku Urals — asnoŭnaj rasijskaj ekspartnaj marki ŭ partach Bałtyjskaha mora — upała nižej za $60 za barel. U čaćvier, 13 lutaha, pavodle Reuters, partyi Urals pradavalisia pa $59,33 za barel. Heta amal na 15% nižej za ŭzrovień, zakładzieny ŭ biudžet-2025 ($69,7 za barel).

• 7
• 1
• 1
• 0
• 0
• 1
• 0
• 0