Tolki try z 153 sabranych im podpisaŭ byli atrymany z dapamohaj internetu.
Błohier Jaŭhien Lipkovič zajaviŭ ab vychadzie z kampanii pa vybarach u deputaty Minharsavieta.
Lipkovič źbiraŭ podpisy dla vyłučeńnia kandydatam u deputaty pa Vałhahradskaj vybarčaj akruzie №54. Pavodle jaho słoŭ, kampanija była ekśpierymientam. Błohier źbiraŭsia pravieryć stupień upłyvu na krainu internieta, jaki z 1 lipienia budzie bolš žorstka rehulavacca dziaržavaj u adpaviednaści z ukazam prezidenta № 60.
Lipkovič adznačyŭ, što videaintervju z zajavaj ab namiery bałatavacca «za adzin dzień dało 17 tys zakačak». Inicyjatyŭnaja hrupa kolkaściu 10 čałaviek była całkam sfarmavana praź interniet.
Adnak tolki try z 153 sabranych podpisaŭ, jakija nie vyklikali sumnieńnia, byli atrymany z dapamohaj suśvietnaj sietki. «Heta navat nie statystyčnaja pahrešnaść, — adznačyŭ Lipkovič. — Interniet i sacyjalnyja sietki ŭ našaj krainie nie karystajucca nijakim upłyvam, što i patrabavałasia dakazać. Tyja, chto rychtavaŭ ukaz № 60 ab rehulavańni bajnieta, — sapraŭdnyja paranoiki, jakija bajacca ŭłasnaha cieniu».
Pavodle słoŭ Lipkoviča, u jaho niama palityčnych ambicyj, a duchoŭna jon naležyć da pakaleńnia, «jakoje havaryła, što lepš leźci ŭ hraź, čym u palityku». U hetaj suviazi błohier vyrašyŭ nie zdavać sabranyja podpisy.
Padčas kampanii Lipkovič zajaŭlaŭ ab nieabchodnaści zachavańnia staličnaha Sievastopalskaha parka. Pavodle jaho mierkavańnia, za jaho los možna nie tryvožycca. U pryvatnaści, «źjavilisia realnyja, a nie naminalnyja ŭłaśniki budaŭničaj kampanii, jakaja pretenduje na zabudovu parka». Pytańniem zachavańnia parka buduć zajmacca inšyja kandydaty pa hetaj akruzie, ličyć Lipkovič.
Svaju kampaniju pretendent, pavodle jaho słoŭ, pravodziŭ za košt ułasnych srodkaŭ. Raschody skłali 191 tys. rubloŭ.
Lipkovič adznačyŭ, što ŭcisku z boku ŭład nie adčuvaŭ.
Kamientary