Technika złamałasia na nastupny dzień paśla harantyi. Ci možna viarnuć hrošy?

Zakonam harantujucca 30 dzion

Ale jak pastupić, kali pry pieršym ahladzie tavaru vidočnych defiektaŭ nie vyjaŭlena, ale praź niekatory čas jany ŭsio ž prajavilisia.

Situacyja numar adzin: paśla pakupki niajakasnaha tavaru prajšło mienš za 30 dzion.

«Kali vy nabyli tavar nienaležnaj jakaści, to majecie prava na jaho viartańnie abo abmien na praciahu 30 dzion z momantu pakupki. U takim vypadku treba źviarnucca da pradaŭca z patrabavańniem ab viartańni abo zamienie. Razam z zajavaj nieabchodna pradstavić paćviardžajučyja dakumienty, takija jak ček abo harantyjny tałon», — rastłumačyŭ mahistr prava, juryskonsult Biełaruskaha tavarystva abarony spažyŭcoŭ Alaksandr Aleksandrovič.

Kab usio prajšło hładka, pakupniku treba napisać zajavu ŭ niekalkich ekziemplarach. Sabie treba pakinuć toj, na jakim staić adznaka ad pradaŭca. Jana paćviardžaje, što krama pryniała vyrab.

Situacyja numar dva: niedachopy vyjaŭleny praz 30 dzion z momantu pakupki.

U takich vypadkach pakupnik maje prava na biaspłatny ramont (pa harantyi). Tavar zamieniać abo viernuć hrošy tolki ŭ vypadku istotnych defiektaŭ.

Jakija dakumienty spatrebiacca

Kab skarystacca mahčymaściu harantyjnaha absłuhoŭvańnia, važna zachavać dakumienty na techniku. Heta moža być ček, harantyjny tałon i inšyja dakumienty. Ź imi treba źviarnucca ŭ servisny centr abo da pradaŭca.

«U bolšaści vypadkaŭ servisny centr, upaŭnavažany vytvorcam, prymaje tavary na harantyjny ramont. Vam treba budzie pradstavić dakumienty i tavar», — adznačyŭ Alaksandr.

Viartańnie hrošaj

Usie zvaroty juryst raić afarmlać u piśmovaj formie, bo mienavita heta dapamoža paćvierdzić vašy słovy ŭ vypadku sprečki z pradaŭcom. Padčas ramontu moža vyśvietlicca, što vyrab niajakasny. Tady pakupnik maje mahčymaść patrabavać zamienu na anałahičny tavar abo viartańnie hrošaj.

«Kali vyrab nie padlahaje ramontu, albo košt ramontu pieravyšaje 30% i bolš ad koštu tavaru, možna atrymać adpaviedny akt abo zaklučeńnie, jakoje heta paćviardžaje, i na jaho padstavie źviarnucca za viartańniem hrošaj», — reziumiravaŭ Alaksandr.

Dva hady na dokaz braku

Situacyja numar try: harantyja vytvorcy skončyłasia.

Zakanadaŭstva daje pakupniku dva hady, na praciahu jakich možna pradjavić pretenzii da jakaści tavaru. Kali za hety čas vyjaŭleny defiekt, a harantyjny termin na tavar skončyŭsia, spažyviec samastojna źviartajecca za praviadzieńniem ekśpiertyzy. Pry vysnovie, što paškodžańnie ŭźnikła nie z-za viny pakupnika, vydatki na ekśpiertyzu kampiensuje pradaviec abo vytvorca.

U pieryjad ža harantyjnaha terminu pravieści ekśpiertyzu abo acenku jakaści taksama abaviazany pradaviec (vytvorca).

Kudy źviartacca dla ekśpiertyzy

U Biełarusi ekśpiertyzu mohuć pravodzić jak kamiercyjnyja, tak i dziaržaŭnyja arhanizacyi — naprykład, Sudova-ekśpiertnaja kalehija, KDSE (Kamitet dziaržaŭnych sudovych ekśpiertyz). Košt rabot moža varjiravacca ŭ zaležnaści ad typu abstalavańnia i składanaści pravierki, udakładniajuć u hramadstvie spažyŭcoŭ.

Aktualnyja rascenki ŭ arhanizacyi lepš udakładnić zahadzia, pačynajucca jany prykładna ad Br600. Dakumienty ab ekśpiertyzie rekamiendujecca zachoŭvać na doŭhi čas.

• 0
• 1
• 0
• 0
• 0
• 0
• 0
• 0