Zvolnili kiraŭnicu RNPC «Kardyjałohija», jakuju ŭ 2020-m pryznačyli zamiest prafiesara Mročaka
19 lutaha vydańnie «Lusterka» daviedałasia pra płany zvolnić dyrektarku RNPC «Kardyjałohija» Natallu Mićkoŭskuju. Ciapier ža zhadka pra jaje źnikła z sajta miedcentra — na adpaviednaj staroncy źviestki pra inšaha kiraŭnika.
Jak paviedamlali krynicy «Lusterka», pra toje, što Natallu Mićkoŭskuju chočuć zvolnić z pasady kiraŭnika RNPC, stała viadoma jašče 17 lutaha. Adnak ža doktarka z takoj situacyjaj nie pahadziłasia i 18 lutaha sabrała dla vyrašeńnia svajho pytańnia kamisiju.
Čym skončylisia sproby miedycynskaj načalnicy zachavać pracu, było na toj momant nieviadoma. Ale kali pa stanie na 19 lutaha Mićkoŭskaja na sajcie RNPC jašče była paznačanaja jak dyrektarka, to ŭ subotu, 22 lutaha, zhadki pra jaje tam užo niama.
Ciapier miedcentr uznačalvaje Marharyta Bielskaja. Mienavita jana vykonvała abaviazki Mićkoŭskaj, kali tolki źjaviłasia infarmacyja pra zvalnieńnie jaje papiarednicy.
Dyrektarkaj RNPC «Kardyjałohija» Natalla Mićkoŭskaja stała 14 vieraśnia 2020 hoda, paśla taho jak z hetaj pasady ŭ kancy žniŭnia zvolnili viadomaha kardyjołaha Alaksandra Mročaka, jaki kiravaŭ centram 12 hadoŭ. Heta adbyłosia ź inicyjatyvy Ministerstva achovy zdaroŭja paśla abarony Mročakam supracoŭnikaŭ centra, jakija vychodzili na pratesty.
Jak paviedamlaje telehram-kanał «Biełyje chałaty», Natallu Mićkoŭskuju nie charaktaryzavali jak «dziejna «kryvažernuju», ale pry hetym jana nie rabiła nijakich namahańniaŭ dla taho, kab abaranić svaich supracoŭnikaŭ.
«Kali ŭ centr prychodzili śpisy ź pieralikam tych, kaho treba zvolnić, pažadańni vykonvalisia niaŭchilna», — paviedamlaŭ telehram-kanał.
Ciapier čytajuć
Siarhiej Cichanoŭski pierabraŭsia žyć u Łos-Andželes63
Kamientary