Maxar paćvierdziŭ, što adklučyŭ dostup Ukrainy da spadarožnikavych zdymkaŭ pa rašeńni ŭrada ZŠA
Kampanija Maxar Technologies adkazała na zapyt adździeła faktčekinhu kampanii BBC Verify ab adklučeńni dostupu Ukrainy da spadarožnikavych zdymkaŭ.
«U Maxar jość kantrakty z uradam ZŠA i dziasiatkami krain-sajuźnikaŭ i partnioraŭ pa ŭsim śviecie, u ramkach jakich kampanija nadaje spadarožnikavyja zdymki i inšyja hieaprastoravyja danyja. Kožny klijent samastojna prymaje rašeńni ab tym, jak vykarystoŭvajucca i z kim jany dzielacca hetymi danymi.
Adzin z takich kantraktaŭ — GEGD (Hłabalnaja pašyranaja prahrama pastaŭki danych hieaprastoravaj raźviedki), prahrama ŭrada ZŠA, jakaja daje dostup da kamiercyjnych spadarožnikavych zdymkaŭ, atrymanych na zamovu amierykanskaha ŭrada. Urad ZŠA pastanaviŭ časova prypynić dziejańnie ŭkrainskich ulikovych zapisaŭ u GEGD», — havorycca ŭ zajavie kampanii.
Dla dalejšaj infarmacyja kampanija prapanavała Bi-bi-si źviarnucca da pres-słužby Nacyjanalnaha ahienctva hieaprastoravaj raźviedki.
Nacyjanalnaje ahienctva hieaprastoravaj raźviedki zajaviła Associated Press, što dostup da spadarožnikavych zdymkaŭ byŭ abmiežavany praz «ukaz administracyi [prezidenta] ab padtrymcy Ukrainy». Inšych detalaŭ viedamstva nie pryviało.
Pry hetym, jak piša vydańnie «Ekanamičnaja praŭda» sa spasyłkaj na niekalki krynic va USU, va ŭkrainskich vajskoŭcaŭ jość alternatyŭnyja šlachi atrymańnia spadarožnikavych danych.
«Dostup da danych uskładniŭsia, ale płanavańnie apieracyj praciahvajecca, šukajem bolš alternatyŭ», — skazaŭ adzin z surazmoŭcaŭ vydańnia.
Raniej pra toje, što Maxar, adzin z najbujniejšych kamiercyjnych pastaŭščykoŭ spadarožnikavych zdymkaŭ, adklučyŭ dostup da ich Ukrainie, paviedamlała ŭkrainskaje vydańnie «Militarnyj».
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie4
Kamientary