Maxar пацвердзіў, што адключыў доступ Украіны да спадарожнікавых здымкаў па рашэнні ўрада ЗША
Кампанія Maxar Technologies адказала на запыт аддзела фактчэкінгу кампаніі BBC Verify аб адключэнні доступу Украіны да спадарожнікавых здымкаў.
«У Maxar ёсць кантракты з урадам ЗША і дзясяткамі краін-саюзнікаў і партнёраў па ўсім свеце, у рамках якіх кампанія надае спадарожнікавыя здымкі і іншыя геапрасторавыя даныя. Кожны кліент самастойна прымае рашэнні аб тым, як выкарыстоўваюцца і з кім яны дзеляцца гэтымі данымі.
Адзін з такіх кантрактаў — GEGD (Глабальная пашыраная праграма пастаўкі даных геапрасторавай разведкі), праграма ўрада ЗША, якая дае доступ да камерцыйных спадарожнікавых здымкаў, атрыманых на замову амерыканскага ўрада. Урад ЗША пастанавіў часова прыпыніць дзеянне ўкраінскіх уліковых запісаў у GEGD», — гаворыцца ў заяве кампаніі.
Для далейшай інфармацыя кампанія прапанавала Бі-бі-сі звярнуцца да прэс-службы Нацыянальнага агенцтва геапрасторавай разведкі.
Нацыянальнае агенцтва геапрасторавай разведкі заявіла Associated Press, што доступ да спадарожнікавых здымкаў быў абмежаваны праз «указ адміністрацыі [прэзідэнта] аб падтрымцы Украіны». Іншых дэталяў ведамства не прывяло.
Пры гэтым, як піша выданне «Эканамічная праўда» са спасылкай на некалькі крыніц ва УСУ, ва ўкраінскіх вайскоўцаў ёсць альтэрнатыўныя шляхі атрымання спадарожнікавых даных.
«Доступ да даных ускладніўся, але планаванне аперацый працягваецца, шукаем больш альтэрнатыў», — сказаў адзін з суразмоўцаў выдання.
Раней пра тое, што Maxar, адзін з найбуйнейшых камерцыйных пастаўшчыкоў спадарожнікавых здымкаў, адключыў доступ да іх Украіне, паведамляла ўкраінскае выданне «Милитарный».
Цяпер чытаюць
Хто забараняе ў Беларусі кнігі — вось гэтыя 22 чалавекі4
Хто забараняе ў Беларусі кнігі — вось гэтыя 22 чалавекі
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары