Pavarotny momant u hramadzianskaj vajnie ŭ Sudanie: uradavyja vojski zaniali prezidencki pałac
Sudanskaja armija ŭziała pad kantrol prezidencki pałac u Chartumie, jaki dahetul znachodziŭsia ŭ rukach Sił chutkaj padtrymki — vajenizavanaha farmavańnia, ź jakim jana ŭžo amal dva hady viadzie kryvavuju hramadzianskuju vajnu, piša Bi-bi-si.
Sałdaty radujucca pieramozie, razmachvajuć zbrojaj i stanoviacca na kaleni dla malitvy. Vierahodna, armija viartaje sabie kantrol nad sudanskaj stalicaj, ź jakoj jaje vyciaśnili Siły chutkaj padtrymki amal dva hady tamu.
Aficyjny pradstaŭnik armii Nabil Abdała zajaviŭ u efiry dziaržaŭnaha telebačańnia, što vajskoŭcy zaniali pałac i ministerstvy ŭ centry Chartuma.
«Našy siły całkam źniščyli bajevikoŭ i techniku praciŭnika, a taksama zachapili vialikuju kolkaść zbroi i ryštunku», — dadaŭ Abdała. Jon paabiacaŭ, što armija budzie zmahacca «da poŭnaj pieramohi».
Siły chutkaj padtrymki pakul ustrymlivajucca ad kamientaryjaŭ. U Chartumie amal dva hady iduć žorstkija bai — z pačatku kryvavaj hramadzianskaj vajny, jakaja raskałoła krainu.
Paśla źviaržeńnia amal 30-hadovaha prezidenctva Amara al-Bašyra ŭ 2021 hodzie Sudanam kiravała vajennaja chunta. Adnak nieŭzabavie pačaŭsia kanflikt pamiž dvuma hienierałami — Abdelem Fatacham al-Burchanam, hałoŭnakamandujučym uzbrojenymi siłami i faktyčnym kiraŭnikom krainy, i jaho namieśnikam — kamandujučym Sił chutkaj padtrymki hienierałam Machamiedam Chamdanam Dahała, viadomym taksama jak Chiemiety. Kanflikt viasnoj 2023 hoda pieraros u paŭnavartasnuju vajnu.
Z pačatku bajavych dziejańniaŭ Siły chutkaj padtrymki kantralavali bolšuju častku stalicy i zachodnija rehijony Sudana. Viartańnie Chartuma stanie vializnaj pieramohaj dla sudanskaj armii i pavarotnym punktam u supraćstajańni. U apošnija tydni armija dabiłasia pośpiechaŭ i ŭ centralnych rehijonach krainy.
U čaćvier śviedki paviedamlali pra vybuchi ŭ vyniku atak dronaŭ i avijaŭdaraŭ kala Respublikanskaha pałaca. U subotu Chiemiety ŭ videazvarocie paabiacaŭ abaraniać prezidencki pałac i prylehłyja terytoryi, jakija kantralujuć jaho vojski, i pryhraziŭ novymi napadami ŭ šerahu haradoŭ na poŭnačy krainy.
Pavodle danych AAN, vajna ŭ Sudanie stała pryčynaj najbujniejšaha humanitarnaha kryzisu ŭ śviecie. Abodva baki abvinavačvajucca ŭ masavych parušeńniach pravoŭ čałavieka. Sproby mirnaha ŭrehulavańnia nieadnarazova ciarpieli niaŭdaču, bo ni adzin z bakoŭ nie chacieŭ sastupać u baraćbie za kantrol nad stratehičnymi terytoryjami.
Suprać Sił chutkaj padtrymki byli ŭviedzieny sankcyi ZŠA, Vašynhton abvinavaciŭ ich u hienacydzie.
Jašče da pačatku hramadzianskaj vajny Chiemiety naładžvaŭ kantakty z Rasijaj — viadoma, što jon jeździŭ u Maskvu, dzie sustrakaŭsia z čynoŭnikami, u tym liku ź ministram zamiežnych spraŭ Siarhiejem Łaŭrovym i sakratarom Savieta biaśpieki Rasii Mikałajem Patrušavym. CNN paviedamlaŭ pra suviazi Chiemiety z PVK «Vahnier», adnak Jaŭhien Pryhožyn hetyja źviestki admaŭlaŭ.
U lutym 2025 hoda stała viadoma, što Rasija i ŭrad Sudana damovilisia pra budaŭnictva ŭ krainie rasijskaj vajenna-marskoj bazy.
Kamientary