Sacpakiet ajcišnika ŭ Minsku schudnieŭ? Jakimi pluškami zavablivajuć Lesta, EPAM dy inšyja

Lesta Games aktyŭna najmaje ludziej u minski ofis. U apisańni vakansij kampanija papiaredžvaje ŭsich kandydataŭ pra najaŭnaść u kampanii work-life balance: «prychodzim u ofis z 9 da 10, sychodzim z 18 da 19». Pry hetym supracoŭnikam harantavana «dastaŭka karparatyŭnymi šatłami mietro — ofis «Chvala».

Pieralik plušak uražvaje:

• pašyrany polis dobraachvotnaha miedycynskaha strachavańnia ź pieršaha miesiaca pracy;
• dapłaty pa listach niepracazdolnaści da 30 dzion u hod;
• trenažornaja zała i dušavyja ŭ ofisie;
• kampiensacyja sportu;
• padarunki i vypłaty supracoŭnikam na značnyja daty (pieršy dzień u kampanii, dzień naradžeńnia, viasielle, naradžeńnie dziaciej);
• pakoi adpačynku z nastołkami, prystaŭkami, biljardam, tenisnymi stałami, a taksama rełaks-zony z masažnymi kresłami;
• ad 500 da 1000 adzinak hulniavoha zołata na akaŭnt u hulni štodnia.

Taksama kampanija kampiensuje košt charčavańnia ŭ karparatyŭnaj stałoŭcy. Jašče ŭ druhoj pałovie 2023 hoda Lesta Games, kab stymulavać supracoŭnikaŭ naviedvać ofis, prapanavała ŭsim biaspłatnyja śniadanki i viačery.

Jak raspaviadali supracoŭniki, kampanija sama vyznačała kolkaść śniadankaŭ i viačeraŭ, a taksama jakija stravy ŭklučać u mieniu. Taksama kampanija kampiensavała košt abiedaŭ.

Andersen, jakaja buduje svaju stratehiju najmu pieravažna na pracaŭładkavańni paśla stažyrovak, abiacaje ŭsim navičkam jarkaje karparatyŭnaje žyćcio: viečaryny/dni picy/PlayStation/sadavina/kava/zakuski/kino.

U sacpakiet, raspracavany dla supracoŭnikaŭ, uvachodzić pryvatnaje miedycynskaje strachavańnie i kampiensacyja vydatkaŭ na zaniatki sportam. Taksama supracoŭniki mohuć raźličvać na kampiensacyju za siertyfikacyju (AWS, PMP i h.d.), refieralnuju prahramu i kursy anhlijskaj movy.

Abjomny sacpakiet dla supracoŭnikaŭ dziejničaje ŭ «Navuksoft». Naprykład, u pytańniach zdaroŭja supracoŭnikam, akramia standartnaha miedstrachavańnia, taksama abiacany lekavyja preparaty ŭ ofisie i siezonnaja vakcynacyja.

Dla amataraŭ aktyŭnaha adpačynku praduhledžany viełaparkoŭka, spartyŭnaja placoŭka ŭ dvary ofisa, nastolny futboł i aerachokiej. Taksama navički mohuć raźličvać na nasyčanaje karparatyŭnaje žyćcio.

A voś u EPAM davoli ścipły sacpakiet — prynamsi ŭ apisańniach vakansij — z akcentam na zdaroŭje. Supracoŭniki mohuć raźličvać na kompleksny pakiet miedycynskich i siamiejnych pasłuh i siem dzion davieranaha kiravańnia ŭ hodzie (balničny bieź miedycynskaj daviedki).

Što tyčycca roznych plušak, to rabotniki kampanii mohuć skarystacca źnižkami na tavary i pasłuhi ad 800+ partnioraŭ (spartyŭnyja mierapryjemstvy, restarany, kramy). Źnižki na tavary i pasłuhi ŭ kampanij-partnioraŭ (ad piceryjaŭ i knižnych da kram bytavoj techniki) fihurujuć u pieraliku plušak i ŭ Innowise. Taksama supracoŭnikam dastupnyja hulniavyja pakoi, kavorkinhi, łaunž-zony. Samo saboj harantavana dobraachvotnaje miedycynskaje strachavańnie.

U raspracoŭščyka płatformy dla kiravańnia infarmacyjaj RocketData jość svaja fiška dla pryciahnieńnia navičkoŭ — dog-friendly ofis u Minsku. Taksama rabotniki mohuć raźličvać na 3 days off na pieršy pracoŭny hod z nastupnym pavieličeńniem i dobraachvotnaje miedycynskaje strachavańnie (ale tolki paśla vyprabavalnaha terminu z 50% kampiensacyjaj).

Akramia taho, u RocketData dziejničaje sistema dapamohi i padtrymki supracoŭnikaŭ. Rabotnikam vypłačvajuć materyjalnuju dapamohu, naprykład, u suviazi ź viasiellem, naradžeńniem dziciaci i inšymi značnymi padziejami.

Itransition kampiensuje svaim supracoŭnikam vydatki na zdaroŭje i sport (trenažornyja zały, karparatyŭnyja spartyŭnyja spabornictvy, uklučajučy kibiersport). Taksama rabotnikam harantavany 5 dzion apłačvanaha adačynku pa chvarobie ŭ hod bieź nieabchodnaści pradastaŭleńnia daviedki pra chvarobu.

U liku adukacyjnych padarunkaŭ — kursy anhlijskaj movy anłajn. Taksama ŭ pieraliku plušak jość i zabavy — karparatyŭnyja viečaryny i mierapryjemstvy dla supracoŭnikaŭ i ich dziaciej.

• 1
• 0
• 0
• 0
• 0
• 0
• 0
• 0