Tolki 1% tych, chto vyžyŭ paśla Chirasimy i Nahasaki, paśla pamierli ad rakavych chvarob, vyklikanych radyjacyjaj
Novaje daśledavańnie, praviedzienaje praz 80 hadoŭ paśla jadziernych bambardzirovak Chirasimy i Nahasaki, pakazała: vysokija dozy radyjacyi ŭjaŭlajuć mienšuju ryzyku raku, čym zvyčajna ličycca.
Jak piša Financial Times, ličycca, što da kanca 1945 hoda ad nastupstvaŭ vybuchu jadziernych bombaŭ, vysokich tempieratur i vostraj pramianiovaj chvaroby zahinuli kala 140 000 žycharoŭ Chirasimy i 74 000 žycharoŭ Nahasaki.
Paśla katastrofy vyžyli kala 324 000 čałaviek (ich nazyvajuć chibakusia). Prafiesar kiravańnia ryzykami Brystalskaha ŭniviersiteta Filip Tomas acaniŭ, što z hetaj kolkaści 3100 čałaviek u budučyni pamierli ad pramianiovaha lejkozu ci raku ŭnutranych orhanaŭ i inšych tkanak, što składaje mienš za 1%. Vyniki daśledavańnia apublikavanyja ŭ Journal of Biological Physics and Chemistry.
«Heta daśledavańnie pakazvaje, što radyjacyja, choć i niebiaśpiečnaja, źjaŭlajecca słabiejšaj pryčynaj raku, čym mnohija dumajuć», — adznačyŭ Tomas, jaki raniej pracavaŭ u halinie jadziernaj pramysłovaści.
Navukoviec pašyryŭ analiz aficyjnaha japona-amierykanskaha Fondu vyvučeńnia efiektaŭ radyjacyi, jaki z 1950 hoda viadzie daśledavańnie praciahłaści žyćcia 87 000 chibakusia. Dadaŭšy miedycynskija i demahrafičnyja danyja, Tomas achapiŭ pryblizna ŭsich 324 000 čałaviek, jakija pieražyli niepasrednaje ŭździejańnie vybuchaŭ.
U daśledavańni vykarystoŭvalisia roznyja matematyčnyja i statystyčnyja mietady dla ekstrapalacyi śmiarotnaści ad raku z kanca 1940-ch hadoŭ da 2055 hoda, kali samamu maładomu čałavieku, jaki vyžyŭ, spoŭniłasia b 110 hadoŭ.
Ryzyka lejkozu, vyklikanaha radyjacyjaj, pačynaje pavyšacca praz 2-3 hady paśla ŭździejańnia i dasiahaje piku prykładna praz 10 hadoŭ, u toj čas jak niekatoryja rakavyja puchliny ŭnutranych orhanaŭ i inšych tkanak mohuć pačać raźvivacca navat praz bolš čym 50 hadoŭ.
«Navat tyja, chto vyžyŭ i atrymaŭ vielizarnyja dozy radyjacyi, pražyli nadzvyčaj doŭha», — adznačaje Tomas. Tak, tyja, chto atrymaŭ 2,25 Hr (u try razy bolš za ŭzrovień, jaki vyklikaje pramianiovuju chvarobu, i ŭ 100 razoŭ bolš za hadavy dapuščalny ŭzrovień dla rabotnikaŭ jadziernych abjektaŭ u Vialikabrytanii), pamirali ŭ siarednim va ŭzroście bolš za 78 hadoŭ.
Pa słovach prafiesara epidemijałohii raku z Łondanskaha instytuta daśledavańnia raku Emi Bierynhtan, ahulnyja vysnovy Tomasa supadajuć z papiarednimi daśledavańniami pa Chirasimie i Nahasaki, ale ekstrapalavać ich na inšyja vypadki biez detalovaj infarmacyi pra dozy treba z aściarohaj.
Bierynhtan dadaje, što daśledavańni chibakusia pakazali adsutnaść pieradačy ryzyki dla zdaroŭja ich dzieciam — heta było adnym z najbolšych strachaŭ ludziej, evakujavanych padčas kryzisu i avaryi na AES «Fukusima-1» u 2011 hodzie.
Daśledavańnie rabočych, jakija zaznali ŭździejańnie vysokaha ŭzroŭniu radyjacyi paśla avaryi na Čarnobylskaj AES u 1986 hodzie, taksama nie vyjaviła ŭpłyvu na dziaciej, narodžanych imi paśla hetaha.
Ciapier čytajuć
Biełaruskuju movu na CT vybiraje ŭsio mienšaja dola vypusknikoŭ škoł. Kali 20 hadoŭ tamu jaje zdavała amal pałova, ciapier — tolki kožny šosty7
Kamientary