Most cieraz Sož u Homieli da Dnia horada nie adkryli, a abiacańni hetaha ciškom vydalili
Da 13 vieraśnia, kali ŭ Homieli adznačali Dzień horada, miascovyja ŭłady raźličvali zrabić haradžanam «padarunak» — adkryć paśla ramontu piešachodny most praz Sož. Ale hetaha nie adbyłosia, piša «Fłahštok».
Nijakich bujnych infrastrukturnych abjektaŭ u hety śviatočny dzień u Homieli ŭ ekspłuatacyju nie ŭviali. Zamiest hetaha haradžanam pradstavili niekalki «suvieniraŭ», zroblenych pradpryjemstvami za pazabiudžetnyja srodki: mietaličnyja fihury rysi, samalota, paravozika i kambajna.
Što da samoha mosta, to jašče ŭ siaredzinie žniŭnia dziaržaŭnyja ŚMI paviedamlali, što jaho płanujuć adkryć mienavita da Dnia horada. Ale paśla taho, jak stała zrazumieła, što ramont zaciahvajecca, hetyja materyjały pačali źnikać abo redahavacca.
Tak, na sajcie ANT infarmacyju prosta vydalili, a ŭ artykule na «SB. Biełaruś siehodnia» zamiest radka pra adkryćcio ŭ vieraśni źjaviłasia farmuloŭka «da kanca hoda». Zachavanyja skrynšoty heta paćviardžajuć.
Aktualnych dakładnych terminaŭ ułady ciapier nie nazyvajuć. Apošniaje, što prahučała ŭ aficyjnym telehram-kanale «Homielŝina oficialno» naprykancy žniŭnia, — most płanujuć adkryć «vosieńniu». Pry hetym na sajcie abłasnoha telebačańnia jašče ŭ pačatku vieraśnia ŭ zahałoŭku zastavaŭsia aptymistyčny prahnoz — «u vieraśni».
U samim siužecie telebačańnia adznačałasia, što ramont idzie bieź pierapynkaŭ: zamienienaja manalitnaja plita, umacavanyja apory i belki, a mostavoje pałatno faktyčna sabrana nanoŭ. Akramia hetaha, abiacajuć ustalavać novaje aśviatleńnie, šklanyja ahladnyja placoŭki nad rakoj i dekaratyŭnyja elemienty, kab abnaŭleńnie vyhladała nie tolki techničnym, ale i estetyčnym.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam10
Kamientary