Minsk rychtuje maštabnuju pierabudovu Čyžoŭki ciaham dziesiaci hadoŭ

Idzie hramadskaje abmierkavańnie prajekta raźvićcia terytoryi žyłoha rajona Čyžoŭka. U asnoŭnym jon praduhledžvaje budaŭnictva sacyjalnych abjektaŭ i padzieleny na dva etapy realizacyi: pieršy — da 2030 hoda, druhi — da 2035-ha. Jakija źmieny prapanujucca, piša «Minsk-Naviny».

Padrychtavana novaja viersija detalovaha płana, jaki achoplivaje terytoryju ŭ miežach vuł. Čyžeŭskich — łandšaftna-rekreacyjnaj zony — vuł. Haładzieda — vuł. Taškienckaj — vuł. Ubareviča — MKAD. U prajekcie ŭdakładniajucca miežy ŭčastkaŭ i ich pryznačeńnie, a taksama prapanujucca varyjanty zabudovy. U asnoŭnym havorka idzie pra ŭźviadzieńnie sacyjalnych abjektaŭ, nieabchodnych žycharam rajona. Mnohija ź pieraličanych nižej abjektaŭ — heta płany i prapanovy, jakija mohuć i nie realizavacca.

Čyžoŭka-1

Tut płanujecca stvaryć hramadski abjekt — haścinicu pa adrasie: vuł. Krasnasłabodskaja, 5. Z prajekta nie jasna, budzie heta rekanstrukcyja isnujučaha budynka pad novyja funkcyi ci novaje budaŭnictva.

Čyžoŭka-2

Na miescy aŭtastajanki pamiž MKAD i vuł. Ubareviča prapanujecca ŭźvieści niekalki abjektaŭ kamunalna-absłuhoŭvajučaha pryznačeńnia z hramadskimi funkcyjami. Jašče adna padobnaja placoŭka — pamiž žyłym domam na Taškienckaj, 6/2, i budynkam servisnaha pryznačeńnia na vuł. Haładzieda, 49. Miarkujučy pa ŭsim, havorka idzie pra šmatuzroŭnievyja parkoŭki z dadatkovymi pamiaškańniami, dzie mohuć raźmiaščacca handlovyja i servisnyja pradpryjemstvy. Płoskasnyja stajanki ŭzdoŭž kalcavoj u prajekcie nie zachoŭvajucca. Adnak dla budaŭnictva parkinhaŭ sa spadarožnymi servisami patrabujucca inviestary, i kali jany nie znojducca, usio moža zastacca bieź źmien.

Čyžoŭka-3

Tut, jak i ŭ Čyžoŭcy-4, miarkujecca ŭźviadzieńnie šmatkvaternaha žylla. Niekatoryja damy zapłanavany daŭno, ale źjaviŭsia i novy ŭčastak dla zabudovy — u miežach vuł. Ubareviča — Kleckaj — Kapylskaj — Kapylskaha tupika, dzie ciapier raźmiaščajucca kala dziesiaci pryvatnych siadzib. U budučyni tut prapanujecca stvaryć šmatkvaternaje žyllo. Taksama ŭzdoŭž MKAD płoskasnyja stajanki zamieniać šmatuzroŭnievymi parkinhami sa spadarožnymi funkcyjami.

Pavialičyć

Čyžoŭka-4

U hetym mikrarajonie na miescy siadzib u miežach vuł. Kapylskaj — Kleckaj — Ubareviča byli zapłanavany try šmatpaviarchoviki. Akramia hetaha, u Čyžoŭcy-4 pavinny źjavicca novyja sacyjalnyja abjekty: stamatałahičnaja paliklinika pobač sa šmatuzroŭnievym parkinham na Ubareviča, 86/1, fizkulturna-azdaraŭlenčy centr pamiž vulicami Niaśvižskaj i 2‑j Kalcavoj, a taksama abjekt hramadskaha pryznačeńnia ŭzdoŭž vuł. Haładzieda (kala doma 5/4 i budynka № 5B). Jak i ŭ inšych rajonach, stajanki ŭzdoŭž MKAD mohuć zamianić šmatuzroŭnievymi parkinhami.

Čyžoŭka-6

Tut płanujecca budaŭnictva vieterynarnaj kliniki z haścinicaj dla žyvioł. Jana moža raźmiaścicca ŭ prajeździe Ubareviča, niedaloka ad kaścioła. Taksama ŭ susiedniaj zialonaj zonie majuć namier abstalavać nievialikuju spartyŭnuju placoŭku ahulnaha karystańnia. Aŭtastajanki ŭzdoŭž kalcavoj darohi i haražny masiŭ unutry mikrarajona prapanujecca zamianić šmatpaviarchovymi parkinhami — viadoma, kali dla takich źmien znojdziecca inviestar.

Čyžoŭka-6a

Heta adzin z samych maładych mikrarajonaŭ, tamu tut płanujuć dadać niekalki sacyjalnych abjektaŭ. Naprykład, na svabodnym učastku pamiž domam № 32 na vuł. Karziuki i hipiermarkietam chočuć pabudavać palikliniku na 690 naviedvańniaŭ u źmienu. Na dvarovaj terytoryi pamiž žyłymi damami mahčyma raźmiaščeńnie dziciačaha centra — pa prajekcie nie ŭdakładniajecca, ale chutčej za ŭsio, heta dziciačaja muzyčnaja škoła abo padobnaja ŭstanova. Taksama pobač z raźviazkaj na skryžavańni vuł. Turava i Karziuki znajšli miesca dla spartyŭnaha kompleksu.

Darohi i transpart

Prajekt praduhledžvaje ŭźviadzieńnie transpartnaj raźviazki z prachodžańniem vulicy Taškienckaj pad MKAD. Padobnuju infrastrukturu haradskija ŭłady ŭžo razhladali raniej. Ciapier jana viartajecca ŭ płany horadabudaŭnikoŭ, bo zdolnaja značna palepšyć transpartnuju dastupnaść rajona.

Akramia taho, u detalovym płanie praduhledžana pašyreńnie prajeznaj častki vuł. Haładzieda. Pry jaje rekanstrukcyi razvarotnaje kalco tralejbusaŭ «Čyžoŭka-1» budzie pieraniesiena na pierśpiektyŭnaje kalco na skryžavańni vuł. Haładzieda i Ubareviča. Razvarotnaje kalco DS «Čyžoŭka-6» budzie likvidavana, a tralejbusnyja maršruty praciahnuć da žyłoha rajona Łošyca.

Hramadskaje abmierkavańnie prajekta praciahniecca pa 10 listapada. Z 29 kastryčnika na sajcie administracyi Zavodskaha rajona čakajecca jaho videaprezientacyja.

• 0
• 0
• 0
• 4
• 0
• 2
• 0
• 0