Litva naniesła maštabny ŭdar pa «bałonikavaj» mafii: zatrymanyja kiraŭniki i dziasiatki kantrabandystaŭ
Pravaachoŭnyja orhany Litvy praviali biesprecedentnuju apieracyju suprać arhanizavanaj hrupoŭki, jakaja zajmałasia kantrabandaj cyharet ź Biełarusi z vykarystańniem mietearałahičnych pavietranych šaroŭ. U vyniku apieracyi byŭ zatrymany 21 čałaviek, u tym liku mierkavanyja lidary złačynnaj arhanizacyi.
U praviadzieńni apieracyi i ŭ pieratrusach udzielničali bolš za 140 aficeraŭ, u tym liku supracoŭniki atrada pa baraćbie z teraryzmam «Aras», paviedamlaje 15min.lt.
Rankam u aŭtorak byŭ zatrymany 21 čałaviek, u tym liku arhanizatary złačynnaj hrupoŭki.
Akramia kantrabandy, ich padazrajuć u sadziejničańni zamiežnaj dziaržavie ŭ dziejnaści suprać Litvy.
Paśla praviadzieńnia bolš za 80 pieratrusaŭ, byli znojdzieny i kanfiskavany cyharety ź biełaruskimi banderolami, SIM-karty, abstalavańnie dla sačeńnia i suviazi, ahniastrelnaja zbroja i inšaje.
Kanfiskavana i aryštavana majomaść, u tym liku elitnyja aŭtamabili i inšyja kaštoŭnaści, na ahulnuju sumu kala 720 tysiač jeŭra.
Pavodle źviestak śledstva, złačynnaja hrupoŭka dziejničała sistemna, ź vielmi strohaj kanśpiracyjaj i raźmierkavańniem rolaŭ. Arhanizatary padtrymlivali pramyja kantakty z pamahatymi ŭ Biełarusi. Ź Biełarusi pry spryjalnych umovach nadvorja zapuskalisia pavietranyja šary z kantrabandaj.
Dla adsočvańnia pieramiaščeńnia bałonaŭ vykarystoŭvałasia GPS-abstalavańnie i śpiecyjalnyja prahramy. Vykanaŭcam pieradavalisia dakładnyja kaardynaty pasadki na terytoryi Litvy.
Pravaachoŭnyja orhany padkreślivajuć, što hetaja kryminalnaja dziejnaść niesła vializarnuju škodu nacyjanalnaj biaśpiecy i ekanamičnym intaresam krainy, a taksama stvarała pahrozu cyvilnaj avijacyi.
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu46
Kamientary