Z ukrainskich uchilantaŭ ad vojska ŭ Biełarusi vyciahvajuć raźviedvalnuju infarmacyju
Ukrainskich mužčyn pryzyŭnoha ŭzrostu, jakim udajecca nielehalna trapić u Biełaruś, padviarhajuć dopytam ludzi ŭ cyvilnym adzieńni. Ich cikaviać źviestki pra pieramiaščeńnie ŭkrainskaj vajskovaj techniki, a taksama pra miescy traplańnia rasijskich rakiet i dronaŭ. Pra heta daviedalisia žurnalisty ŭkrainskaha vydańnia «Ślidstva.Info» i Biełaruskaha rasśledavalnickaha centra.
Mužčyny, jakija ŭžo zdoleli ŭciačy z Ukrainy, abmieńvajucca dośviedam u telehram-čatach z tymi, chto tolki płanuje pierachod. Jany śćviardžajuć, što dopyty źjaŭlajucca abaviazkovymi i, na ich dumku, pravodziacca pradstaŭnikami śpiecsłužbaŭ. Padčas takich razmoŭ ich faktyčna prosiać vydavać pazicyi i maršruty pierasoŭvańniaŭ ukrainskaj armii.
Surazmoŭcy žurnalistaŭ raskazvajuć, što ŭ ich zabirajuć dakumienty i telefony, a admovicca ad adkazaŭ amal niemahčyma, bo nijakija pravy ŭ Biełarusi faktyčna nie dziejničajuć. Ludziej staviać u situacyju poŭnaj biezabaronnaści pierad siłavikami.
Pradstaŭnik Dziaržaŭnaj pamiežnaj słužby Ukrainy Andrej Dziemčanka adznačaje, što rost kolkaści ŭciokaŭ praź Biełaruś źviazany ź dziejnaściu arhanizavanych złačynnych hrup. Pavodle jaho słoŭ, bolšaść mužčyn karystajecca pasłuhami pasiarednikaŭ, jakija arhanizujuć nielehalny maršrut.
U arhanizacyi byłych siłavikoŭ «Bajpoł» ličać, što patok uchilantaŭ vyhadny režymu Łukašenki. Hetych ludziej biaruć pad kantrol, atrymlivajuć ad ich patrebnuju infarmacyju, a paśla faktyčna nakiroŭvajuć u bok miežaŭ Jeŭrapiejskaha Sajuza. Asnoŭnaja meta, jak śćviardžajecca, — zbor raźviedvalnych źviestak.
Žurnalist Andrej Sałdataŭ, hałoŭny redaktar sajta Agentura.ru, nie vyklučaje, što sabranaja infarmacyja moža pieradavacca rasijskamu kiraŭnictvu i śpiecsłužbam.
Pavodle danych ukrainskich pamiežnikaŭ, u 2025 hodzie bolšaść ukrainskich mužčyn, jakija sprabavali ŭciačy praź Biełaruś, zatrymlivalisia ŭ Rovienskaj i Žytomirskaj abłaściach, radziej — u Vałynskaj, Kijeŭskaj i Čarnihaŭskaj.
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud25
Kamientary
I što, vydajuć?
Hetyja ŭkraincy zusim nie ŭ kursie, što ŭ Biełarusi tvorycca, jaki tam režym?
Biełarusy, kali z zamiežža ŭ Biełaruś jeduć, usie telefony čyściać, vydalajuć usio, navat łajki ŭ internecie, usie paviedamleńni, fota, ŭlikovyja zapisy, telehram i ŭsio astatniaje. I heta tyja biełarusy, jakija nie zaśviacilisia ŭ pratestach ci akcyjach za miažoj, nie apazicyjaniery, nie aktyvisty.
U Bajpole jak zvyčajna: va ŭsim vinavaty Łukašenka. Nikoli nie vinavaty Pucin. A ciapier nie vinavatyja i sami zdradniki Ukrainy - uchilanty i tyja ŭkraincy, jakija zarablajuć na arhanizacyi patoka ŭchilanitaŭ.