U Minsku pasažyrka pasvaryłasia z kiroŭcam tralejbusa. Chto byŭ vinavaty?
U tyktoku minčanka paskardziłasia na kiroŭcu tralejbusa, jakaja nibyta nie pradała bilety pa pieršaj prośbie. Čym skončyŭsia kanflikt, pišuć Minsk-naviny.
Incydent pamiž pasažyrkaj i vadzicielkaj tralejbusa № 90 adbyŭsia na pačatku lutaha. Pavodle słoŭ minčanki, jana ŭ śpiešcy zaskočyła ŭ sałon praz zadnija dźviery i nakiravałasia da kiroŭcy, kab kupić bilety. Adnak taja nibyta praihnaravała pasažyrku — transpart pačaŭ adjazdžać ad prypynku. Na skryžavańni, kali tralejbus stajaŭ na śviatłafory, minčanka znoŭ pasprabavała nabyć tałony.
— Adsoŭvaje, značyć, svajo kresła kiroŭcy, pavaročvajecca da mianie i kaža: «Ja što, vam tut, kasir? Ty što, nie bačyš, što ty mianie adciahvaješ? Ja na śviatłafory staju», — pierakazvaje dyjałoh minčanka.
— Ja kažu: «Vy ž nie jedziecie? Vy staicie». Jana pačynaje svarycca, kryčać na mianie, ja taksama ź joj spračajusia. U vyniku jana advaročvajecca i kaža: «Dy pajšła ty».
Pasažyrka śćviardžaje, što łajanka praciahnułasia i na nastupnym prypynku, a sam videamanałoh zakančvajecca razvažańniami: minčanka nie vinavataja ŭ tym, što vadzicielaŭ abaviazvajuć pradavać tałony.
U «Minsktransie» razabrali situacyju — hrubaść z boku kiroŭcy była paćvierdžana:
— Za parušeńnie pracoŭnaj instrukcyi ŭ častcy kultury absłuhoŭvańnia pasažyraŭ kiroŭca tralejbusa pryciahnuta da adkaznaści. Taksama ź joj praviali dadatkovy instruktaž ab niedapuščeńni padobnych vypadkaŭ, — paviedamili na pradpryjemstvie, adnak adznačyli, što mierkavańnie haradžanki abjektyŭna nie adlustroŭvaje sutnaści i nie raskryvaje ŭsich abstavin kanfliktu.
Tak, sama pasažyrka padziakavała kiroŭcy za toje, što taja pačakała jaje i dała mahčymaść zajści praz zadnija dźviery (minčanka nie čakała transpart na prypynku, a padbiahała da tralejbusa). Paśla hetaha vadzicielka pačała ruch, a heta značyć, što joj nieabchodna pierakanacca ŭ biaśpiecy pačatku ruchu ad prypynku, i ŭsia jaje ŭvaha zasiarodžanaja na darozie. Prodaž bileta ŭ hety momant niemahčymy.
Śpiecyjalisty nahadali, što dla nabyćcia bileta ŭ kiroŭcy nieabchodna zachodzić u transpartny srodak praź piarednija dźviery. Pry hetym prodaž biletaŭ ažyćciaŭlajecca tolki na prypynkavych punktach. Zabaraniajecca adciahvać kiroŭcu ad kiravańnia transpartnym srodkam i zaminać jamu padčas ruchu.
Ciapier čytajuć
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk27
Kamientary
A toje, što jość mahčymaść apłacić najaŭnymi, heta tolki plus .
Ale hetaja minčanka vybrała sposab opłaty papiarovym biletam sama!
Moral takaja - što kiroúca tralejbusa sama sabie znajšła problemy PAČAKAÚŠY skaržčycu)
Nie rabi ludziam dabra - nie pałučyš zła!