U minskim HC, dzie niadaŭna zakryŭsia hipiermarkiet, adkryjuć hipierdyskaŭntar
U minskim handlovym centry DiaMond City, dzie niadaŭna zakryŭsia hipiermarkiet «Hipa», źjavicca novaja krama ŭ farmacie hipierdyskaŭntara. Jak vyśvietliła vydańnie Blizko.by, na jaho miescy adkryjecca «Majak».
«Hipa» pracavaŭ u hetym HC ź lipienia 2018 hoda i zajmaŭ bolš za 6 tysiač kvadratnych mietraŭ. Krama zakryłasia 13 lutaha 2026 hoda paśla amal siami hadoŭ pracy. Paśla hetaha ŭ siecivie źjaviłasia šmat čutak pra toje, chto zojmie vyzvalenuju płošču.
Infarmacyja pra novaha arandatara stała viadomaja dziakujučy vakansijam, raźmieščanym na sajtach pa pošuku pracy. U abjavach paznačana, što sietka «Kapieječka», «Majak», «Dabranom» nabiraje supracoŭnikaŭ u novy mahazin «Majak» u HC DiaMond City.
Patrabujucca hruzčyki, tavaraznaŭcy, kantralory-kasiry, mierčandajziery, administratar handlovaj zały i inšyja rabotniki.
Pavodle infarmacyi, atrymanaj na haračaj linii kampanii «Dabranom», adkryćcio kramy płanujecca prykładna ŭ mai 2026 hoda. U niekatorych krynicach adznačajecca, što heta budzie farmat hipiermarkieta.
«Majak» — heta hipierdyskaŭntar, jaki raźvivaje kampanija «Dabranom». Sietka pazicyjanuje siabie jak kankurent inšych hipierdyskaŭntaraŭ. U Minsku pieršaja krama «Majak» adkryłasia ŭ žniŭni 2021 hoda, a ciapier u stalicy pracuje ŭžo kala dvuch dziasiatkaŭ takich abjektaŭ, usiaho pa krainie — bolš za 150.
Farmalna DiaMond City znachodzicca nie ŭ miežach Minska, a na terytoryi Ščomyślickaha sielsavieta za MKAD, nasuprać rajona Malinaŭka-6. Adnak mnohija ŭsprymajuć jaho jak haradski handlovy centr, choć biez aŭtamabila dabiracca tudy niazručna.
Ciapier čytajuć
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club7
Kamientary