Kalekcyju karcin Viktara Babaryki raspradajuć ź vialikimi źnižkami. Ale biez samaha darahoha dla jaho tvora
Kalekcyju Viktara Babaryki raspradajuć amal za biescań. Karciny, jakija jašče niadaŭna aceńvali ŭ sotni tysiač rubloŭ, ciapier iduć z małatka ŭ razy tańniej. Abjavy apublikavanyja na sajcie «BiełJurZabieśpiačeńnia». Ale hałoŭnaja strata nie ŭ canie: los samaj darahoj dla eks-bankira raboty Marka Šahała nieviadomy, piša «Lusterka».
Z małatka čarhovy raz sprabujuć pradać karciny z asabistaj kalekcyi eks-bankira i palitviaźnia Viktara Babaryki. Pieršapačatkova košt 19 rabot aceńvaŭsia ahulnaj sumaj 344 tysiačy rubloŭ. Paźniej niekatoryja tvory mastactva pradali, inšyja ž — nie. Ciapier ich vystavili pa cenach, jakija ŭ razy sastupajuć pieršaj acency.
Naprykład, samy darahi łot z vystaŭlenych na aŭkcyjon — tvor «Arlekin» francuzska-polskaha mastaka Jaŭhiena Zaka — pieršapačatkova vystaŭlali ad 99 312 rubloŭ. Zaraz startavaja cana apuściłasia da 39 724,8 rubla.
«Bukiet kvietak» pendźla hetaha samaha aŭtara pieršapačatkova sprabavali pradać pa canie ad 66 208 rubloŭ. Ciapier jaje źnizili da 26 483,2 rubla.
«Piejzaž» Michaiła Kikoina byŭ vystaŭleny za 56 277 rubloŭ. Jaho ž «Jabłyni» — za 49 656. Ciapier pieršaja karcina pradajecca pa canie ad 22 510,8 rubla, a druhaja — ad 19 862,4 rubla.
U niadaŭnim intervju ŭ «TOKu» Viktar Babaryka raskazaŭ, što z usich karcin jaho asabistaj kalekcyi samaj kaštoŭnaj dla siabie jon ličyŭ kalarovuju litahrafiju Marka Šahała «Leśvica Jakava»:
«Mnie prosta sam siužet vielmi padabajecca — i jana ŭ mianie visieła ŭ spalni. Jaje mnie, napeŭna, bolš za ŭsio škada… Što jaje zabrali i pradali», — pryznaŭsia Babaryka.
Varta adznačyć, što Šahał niekalki razoŭ źviartaŭsia da siužeta «Leśvica Jakava», adlustroŭvajučy jaho roznymi mietadami i materyjałami. Vierahodna, u kalekcyi eks-bankira mahła być litahrafija 1977 hoda.
Miž tym siarod vystaŭlenych na aŭkcyjon na placoŭcy «BiełJurZabieśpiačeńnia» tvoraŭ mastactva z kalekcyi eks-bankira nie było «Leśvicy Jakava» ci luboj inšaj pracy Šahała. Jaki los aryštavanaj karciny, nieviadoma.
Babaryka raskazaŭ, čamu pierad vybarami nie šukaŭ padtrymki ŭ Rasii. I jak jaho chacieli zvolnić ź Biełhazprambanka za łozunh «Žyvie Biełaruś!»
Babaryka chacieŭ bałatavacca ŭ prezidenty ŭ 2015-m. Ale nie dazvoliła žonka
Babaryka: Da svajho vyzvaleńnia ja ŭvohule nie bačyŭ Ivana Kraŭcova. Nie viedaju, što jon rabiŭ
Babaryka: Nie mohuć zdymacca sankcyi z pradpryjemstvaŭ i ludziej, zadziejničanych u vajnie. Vypuścicie palitviaźniaŭ canoj zabojstva ŭkraincaŭ?
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury6
Kamientary