«My tak zatrachali našych zachodnich partnioraŭ?» Prapahandysty lamantujuć paśla błakiroŭki ich kanałaŭ u jutubie

Videachostynh YouTube 3 krasavika vydaliŭ dziaržaŭnyja kanały BiełTA, STB i ANT. Prapahandysty masava adreahavali.

Na telehram-kanale BiełTA pišuć, što amierykancy «sami padšturchoŭvajuć da taho, kab my pajšli rasijskim šlacham u adnosinach da varožych placovak».

Kanał HUBAZiKa prapanavaŭ pryznać uvieś YouTube ekstremisckim i zabłakavać.

Ahulny tezis prapahandystaŭ užo vymalevaŭsia: «vydalili, bo zajzdrościać šalonaj papularnaści».

Aleh Hajdukievič navat zapisaŭ vinšavalnaje videa. Maŭlaŭ, prapahandysckija biełaruskija ŚMI vydalili, bo bajacca «toj praŭdy, jakuju jany raspaviadajuć» — nie tolki biełarusam, ale i ludziam, jakija žyvuć u zachodnich krainach.

Deputat i staršynia ŁDPB abvinavačvaje YouTube u tym, što jon pieraškadžaje svabodzie słova. I aburajecca tym, što biełaruskim prapahandystam zatykajuć raty.

Na dziva, Ryhor Azaronak pakul maŭčyć — abmiežavaŭsia repostam videa Hajdukieviča.

Ihar Tur taksama pakul tolki repościć vykazvańni kaleh pa prapahandzie — naprykład, Marynu Kardaman z ANT.

«My tak zatrachali našych zachodnich partnioraŭ, što jany ŭ isterycy rubanuli nas za chvilinu da arhazmu aŭdytoryi? Dyk mastactva nie prapješ. My paŭtorym», — napisała taja.

Paśla jašče pasprabavała pažartavać: «A moža pakryŭdzilisia za toje, što my ŭ Maku amierykana pierajmienavali?».

Telekanał STB aburyŭsia, što ich kampanija i kiraŭnictva nie znachodzicca pad sankcyjami, a ŭsio adno zabłakavali.

Telehram-kanał «Žoŭtyja źlivy» spytaŭ u aŭdytoryi, ci jana padtrymlivaje błakavańnie jutuba ŭ adkaz. Navat siarod ich čytačoŭ (i čytačoŭ kanałaŭ prapahandystaŭ i rajonak, jakija reposnuli apytanku) salidaryzavalisia nie ŭsie — 57%.

Pavialičyć

Hienieralny dyrektar Nacyjanalnaj biblijatekii, deputat Pałaty pradstaŭnikoŭ Nacyjanalnaha schodu Vadzim Hihin paabiacaŭ dziejničać razam z rasijanami: «Voś vam i chvalonaja svaboda słova! Čaho vy jašče čakali ad zachodnikaŭ! A čamu vydalili? Bo našyja kanały nabirali papularnaść. Tudy aktyŭna zachodzili hramadzianie krain ES. Što ž, idzie infarmacyjnaja vajna. I supiernik dziejničaje padstupna, nie hrebujučy nijakimi srodkami. I nam nie ŭpieršyniu sutykacca z padobnymi dyviersijami. Viedajem, jak adkazvać. Razam z bratami-rasijanami adkaz budzie maksimalna vynikovym».

Nasamreč, dola biełaruskich hledačoŭ na jutub-kanałach prapahandy małaja. Jany bolš źbirali hledačoŭ z prarasijskimi pohladami z krain SND i inšych.

Ministerstva infarmacyi «niehatyŭna acaniła hety niesiabroŭski i biespadstaŭny krok i pakidaje za saboj prava na pryniaćcie nieabchodnych mier reahavańnia».

Biełaruski sajuz žurnalistaŭ, jaki ihnaravaŭ, a to i vitaŭ represii supracoŭnikaŭ ŚMI ŭ krainie, cytuje svajho staršyniu praŭleńnia Andreja Kryvašejeva: «Biełaruski sajuz žurnalistaŭ aburany aktam infarmacyjnaha vandalizmu i palityčna matyvavanaj cenzury z boku antysacyjalnaj płatformy.

Chostynh nikčemny ŭ svajoj niedaskanałaj biełarusafobskaj pazicyi. Nacyjanalnaja miedyjasupolnaść praciahnie razmaŭlać sa svaim biełaruskim narodam na inšych płatformach».

Nie zastaŭsia ŭbaku i prapahandyst Russia Today Kanstancin Prydybajła. Jon navat zrabiŭ prahnoz, ci zakryjuć pakryŭdžanyja biełaruskija ŭłady YouTube u Biełarusi.

Miarkuje, što ŭsio ž nie: «Ale tam jość svoj videachostynh plus asabista zvodziŭ biełaruskich siabroŭ z RuTube. Dumaju, budzie cikava nazirać za sankcyjami ŭ adkaz u adras «svabodnaj płatformy»».

• 1
• 0
• 22
• 4
• 0
• 1
• 0
• 0