Hałoŭnakamandujučy Uzbrojenych sił Łatvii: U Rasii jość akno dla ahresii da 2030 hoda
Hienierał-major Kaspars Pudanc raspavioŭ DW, jak Łatvija vykarystoŭvaje vajenny dośvied Ukrainy i čamu rasijskija pravakacyi nie dasiahajuć svajoj mety.
«My hladzim na Rasiju z roznych punktaŭ hledžańnia. Adzin ź ich — histaryčny, što prymušaje nas pavyšać pilnaść. Ale za apošniaje dziesiacihodździe my ŭvažliva nazirajem za tym, što Rasija robić va Ukrainie, a taksama ŭ infarmacyjnaj i kibierprastory. I, viadoma, my dobra ŭśviedamlajem, što znachodzimsia ŭ śpisie tych, što «zasłuhoŭvajuć pakarańnia». Jany peŭna nie darujuć nam vychadu ź ich śfiery ŭpłyvu, ustupleńnia ŭ NATO i ES. I, viadoma, naša adkrytaja padtrymka Ukrainy apošnija 4—5 hadoŭ taksama złuje Rasiju», — raskazaŭ Pudans.
Jon źviartaje ŭvahu na toje, što ciapier bolšaść rasijskich sił ciapier zaniata va Ukrainie, i Łatvija ŭdziačnaja ŭkraincam za toje, što jany ich strymlivajuć.
«Tym nie mienš, na našych miežach fiksujecca rasijskaja aktyŭnaść — sačeńnie, pravakacyi. Takoje pavodziny my nazirali i da 2022 hoda ŭ Bałtyjskim mory i pavietranaj prastory. Rasija taksama vykarystoŭvaje cisk mihrantami na miežy, i Maskva vidavočna aryjentavana na bolš šyrokija dziejańni: dyviersii, zapałochvańnie. Ale heta pakazvaje słabaść Rasii — jany vykarystoŭvajuć takija mietady, bo nie majuć inšych instrumientaŭ. Pry hetym hublajecca efiekt niečakanaści», — miarkuje hałoŭnakamandujučy.
Kaspar Pudans taksama adkidaje ideju stvareńnia «sieparatysckich respublik» u krainach Bałtyi, jak było va Ukrainie ŭ 2014 hodzie z DNR i ŁNR.
«Dumaju, Rasii było b nierazumna znoŭ sprabavać taki scenar. Z 2014 hoda my jaho prapracavali. Śpiecsłužby, palicyja i pamiežniki adsočvajuć situacyju. Razmovy pra «sieparatysckija respubliki» — heta chutčej infarmacyjnaja apieracyja. U nas jość razumieńnie, chto za hetym staić. Realnych resursaŭ u Maskvy dla hetaha niama. Ludzi ŭžo mienš vierać u naratyŭ pra parušeńnie ich pravoŭ u Łatvii», — kaža jon.
«Kali ŭjavić, što vajna va Ukrainie zamarožvajecca, praz kolki hadoŭ Rasija znoŭ stanie realnaj pahrozaj dla Łatvii?» — spytaŭsia žurnalist.
«Varta nazirać, što budzie z mabilizavanymi. Častka ich nie budzie demabilizavana. Častku mohuć pierakinuć na bazy ŭ inšych rehijonach. My ŭžo bačym budaŭnictva novych vajskovych abjektaŭ na poŭnačy Rasii, bližej da Finlandyi. Najbolš vierahodny scenar — pierakidvańnie sił da našych uschodnich miežaŭ. Rasija ŭžo asłabiła tam svaje pazicyi z 2013 hoda. Kali b ja byŭ u Kramli, ja b skazaŭ, što majo «akno mahčymaściaŭ» — 2027—2029 hady. Paśla 2030 hoda jano moža zakrycca: Rasija stanie macniejšaj, ale i Jeŭropa, i NATO taksama», — miarkuje Kaspars Pudans.
Kamientary