15 trupaŭ i złamanaje kryło. Pad Minskam biazdumna zahubili cełuju kałoniju šerych čaplaŭ
Incydent zdaryŭsia 24 maja kala vioski Kajkava Michanavickaha sielsavieta. U hetym miescy doŭhi čas isnavała kałonija ptušak. Adnak padčas uborki suchastoju ŭzdoŭž darohi byli źniščanyja drevy, na jakich znachodzilisia hniozdy. Raboty pravodzilisia biez uliku taho, što ŭ hety pieryjad ptuški hniazdujucca, piša pristalica.by.
Pavodle śviedčańniaŭ miascovych žycharoŭ, paśla vysiečki na ziamli zastalisia 15 miortvych ptušak. Darosłyja čapli jašče niekalki dzion kružyli nad miescam, dzie raniej byli ich hniozdy, šukajučy ptušaniat.
Adnamu ptušaniaci ŭdałosia vyžyć, ale jano atrymała pierałom kryła — ciapier jaho sprabujuć vyratavać vałanciory.
Na miesca vyjechali śpiecyjalisty Minskaha abłasnoha kamiteta pryrodnych resursaŭ i achovy navakolnaha asiarodździa razam ź inśpiekcyjaj. Jany paćvierdzili fakt vysiečki i znajšli śviedku zdareńnia. Padčas ahladu vyjavili taksama miesca, dzie byli pachavanyja cieły zahinułych ptušak. Paśla raskopak paćvierdziłasia ich masavaja hibiel.
Zhodna z zakanadaŭstvam Biełarusi, z 16 lutaha pa 14 žniŭnia zabaroniena vysiakać drevy, bo heta pieryjad hniezdavańnia ptušak. Razbureńnie hniozdaŭ u hety čas ličycca surjoznym parušeńniem i ciahnie administracyjnuju adkaznaść.
Ciapier pravodzicca razbor, kab vyznačyć, chto mienavita pravodziŭ raboty i źniščyŭ hniozdy. Vinavatym pahražaje štraf.
Kamientary