U Aŭstryi piatyja sutki šukajuć źnikłaha miesiac tamu 19‑hadovaha biełarusa. Voś što kaža siamja
U Aŭstryju Mikita Stalaroŭ pajechaŭ adzin, siabroŭ tam u jaho niama.
U Aŭstryi źnik 19‑hadovy chłopiec ź Biełarusi. Jaho zavuć Mikita Stalaroŭ. U Jeŭropu jon pajechaŭ u pošukach pracy. Apošni raz vychodziŭ na suviaź 3 maja. Pavodle blizkich, na nastupny dzień jon pavinien byŭ iści ŭ ofis na pracaŭładkavańnie, ale nijakich padrabiaznaściej pra pracadaŭcu ŭ ich niama. Taksama nieviadoma, u jakim mienavita horadzie ci rajonie chłopiec znachodziŭsia pierad źniknieńniem, piša Onliner.by.
1 červienia źjaviłasia infarmacyja, što Mikitu znajšli. Adnak paźniej stała viadoma, što heta nie tak. U sacyjalnych sietkach navinami pra pošuki dzielicca siabroŭka siamji.
Apošni raz Mikita vychodziŭ na suviaź z rodnymi 1 maja. Pavodle ich infarmacyi, jon pryjechaŭ u Vienu. Paźniej stała viadoma, što 3 maja chłopiec razmaŭlaŭ ź siabram. Tady jon jašče znachodziŭsia na terytoryi Aŭstryi, ale ŭdakładniŭ, što ŭžo niedaloka ad miažy sa Šviejcaryjaj.
Pavodle najaŭnaj infarmacyi, u toj momant jon byŭ u kampanii minimum troch čałaviek, mierkavana ruskamoŭnych.
Dziaŭčyna raspaviała žurnalistam, što ŭdałosia vyśvietlić, dzie byŭ zrobleny adzin z apošnich krasavickich fotazdymkaŭ. Vidy na fota supastaŭlali z kartami. Na zdymku trapiła «Fiederalnaje ahienctva pa spravach zamiežnikaŭ i prytułak» (BFA), korpus znachodzicca niepadalok ad Vieny. Z pradstaŭnikami arhanizacyi ŭžo sprabavali źviazacca, ale adkazu pakul nie atrymali. Dakładnych zdahadkaŭ, navošta chłopiec moh tam być, u blizkich niama.
Pošuki praciahvajucca. Na hety momant novaj infarmacyi ad palicyi Aŭstryi i konsulstva niama.
Prykmiety dla pošuku: małady chłopiec, 19 hadoŭ, siaredniaj kamplekcyi, śvietłyja karotkija vałasy.
Žurnalisty parazmaŭlali z bratam Mikity, Dzianisam, i voś što jon raspavioŭ:
— 1 maja u maich baćkoŭ hadavina — jon telefanavaŭ ich vinšavać. Padčas pošukaŭ i apytańnia siabroŭ vyśvietliłasia, što jon razmaŭlaŭ z adnym ź ich 3 maja. A adlik źniknieńnia viadziem z 4 maja, bo heta apošniaja jaho aktyŭnaść u Telegram.
30 maja my pryniali rašeńnie pačać pošuki, bo moj brat dastatkova doŭha nie vychodziŭ na suviaź, a baćki ŭsio bolš chvalavalisia.
Pierš za ŭsio my abzvanili ŭsich, kaho mahli, i sabrali ŭsie fatahrafii, jakija ŭ ich byli. Dalej pačali pisać u jeŭrapiejskija čaty z prośbaj ab dapamozie ŭ pošuku; pytalisia, ci viedaje chto-niebudź pra miescy z fotazdymkaŭ, kab zrazumieć, kudy jon moh ruchacca abo znachodzicca — amal usie łakacyi znajšli davoli chutka.
Dalej pajšli praz aficyjnyja struktury: pasolstvy Biełarusi ŭ Aŭstryi, Hiermanii, Italii i Polščy, napisali zajavu ŭ milicyju pra źniknieńnie, razasłali zapyty ŭ pošukavyja arhanizacyi, takija jak Čyrvony Kryž i anałahičnyja jeŭrapiejskija struktury. Niekatoryja ludzi raźviesili abviestki ŭ Aŭstryi pra źniknieńnie Mikity.
Dzianis raspaviadaje, što Mikita — kamunikabielny i adkazny chłopiec. Va ŭniviersitecie jon siabie aktyŭna prajaŭlaŭ: udzielničaŭ u moładzievych arhanizacyjach, naviedvaŭ mižnarodnyja kanfierencyi i šmat času pryśviačaŭ sportu. Mikita vučycca na mieniedžara.
U Aŭstryju chłopiec pajechaŭ adzin, siabroŭ tam u jaho niama. Płanavaŭ prabyć u krainie niekalki miesiacaŭ, kab padzarabić. Ale nijakich kankretnych padrabiaznaściej rodnym nie paviedamlaŭ. Pavodle słoŭ Dzianisa, u pasolstvach siamji dapamahli pravieryć, ci jość pra Mikitu infarmacyja ŭ palicyi abo balnicach, ale nijakich novych źviestak atrymać nie ŭdałosia. U bližejšy čas znajomyja pasprabujuć padać zajavu pra źniknieńnie ŭ palicyju Aŭstryi.
Kamientary