Kišynioŭ nie maje namieru «schilać hałavu» pierad Maskvoj, bo dla Małdovy svaboda daražejšaja za ekspart vina i sadaviny ŭ Rasiju.
Pra heta ŭ intervju rumynskamu telebačańniu zajaviŭ vykanaŭca abaviazkaŭ prezidenta Małdovy, staršynia parłamienta Michaj Himpu.
Jon nahadaŭ, što ŭ pieryjad, kali Małdova ŭvachodziła ŭ SSSR, małdaŭskija viny i sadavina ličylisia Maskvoj jakasnymi, a ciapier ich nie puskajuć na rasijski rynak. Na dumku Himpu, prablemy, jakija ŭźnikli ŭ małdaŭskich eksparcioraŭ vina i sadaviny ŭ Rasiju, źviazanyja z tym, što Maskva choča, kab «Małdova kazała i rabiła tolki toje, što padabajecca Rasii».
«Ale my nie adstupim, bo svaboda dla nas daražejšaja», — zajaviŭ v.a. prezidenta Małdovy. «My nie budziem žyć schiliŭšy hałavu tolki tamu, što našyja viny i vinahrad pradajucca na rasijskim rynku», — dadaŭ jon, adznačyŭšy, što Małdova znojdzie inšyja rynki zbytu svajoj pradukcyi.
Pry hetym Himpu adznačyŭ, što kiroŭny Aljans za jeŭrapiejskuju intehracyju nie vystupaje suprać dobrych stasunkaŭ z Rasijaj. «Bolš za toje, ciapierašniaja małdoŭskaja ŭłada ŭziała na siabie abaviazak zabiaśpiečyć narmalnyja adnosiny i z Rasijaj, i z ZŠA, ale ŭsio zaležyć ad rasijskaha kiraŭnictva», — zajaviŭ jon.
Nahadajem, adnosiny pamiž Kišyniovam i Maskvoj uskładnilisia paśla taho, jak prezident Małdovy Michaj Himpu abviaściŭ 28 červienia, dzień ustupleńnia savieckich vojskaŭ u Małdovu, dniom savieckaj akupacyi.
Kreml i Dziaržduma asudzili dziejańni Himpu jak sprobu pierapisać historyju. Nieŭzabavie paśla hetaha kiraŭnik Rasspažyŭnahladu Hienadź Aniščanka zajaviŭ, što jakaść impartavanaha z Małdovy vina pahoršyłasia, i «jaho chutčej treba vykarystoŭvać dla afarboŭki płatoŭ, a nie dla pićcia».
Kamientary