Śledstva pa spravie Bašury skončana

Zaviaršyłasia raśśledavańnie spravy aktyvista «Havary praŭdu» Michasia Bašury, jakoha aryštavali ŭ pačatku žniŭnia i abvinavacili ŭ padrobcy dakumentaŭ.

Śledztva pa spravie Michasia Bašury ciaham amal miesiaca viała daznavalnica Savieckaha RAUS Miensku Vieranika Abzalimava. 3 vieraśnia milicyjantka Abzalimava naviedała Bašuru ŭ Žodzinskim śledčym izalatary i aznajomiła z kryminalnaj spravaj suprać jaho. Nahadajem, aktyvista kampanii «Havary praŭdu» Michasia Bašuru aryštavali 6 žniŭnia pavodle padazreńnia ŭ padrobcy daviedki ab prybytkach dla atrymańnia kredytu. Siońnia padčas aznajamleńnia sa spravaj prysutničała advakat Tamara Sidarenka. Advakat kaža, što ŭ kančatkovym vyhladzie abvinavačańnie nie źmianiłasia.

«Ničoha nie mianiałasia. Voś jak 16-ha žniŭnia jamu vystavili abvinavačańnie pa druhoj častcy 380-ha artykułu Kryminalnaha kodeksu, hetak usio i zastałosia.

Daznavalnica Vieranika Abzalimava ad kamentaru admaŭlajecca. Pavodle advakata Tamary Sidarenki, u paniadziełak 6-ha vieraśnia sprava budzie pieradadzienaja ŭ prakuraturu, i kali taja pahadzicca z dokazami, sabranymi śledztvam, praz peŭny čas trapić u sud.

«A ŭ sud prakuratura ŭžo praz 5 dzion moža nakiravać spravu, kali zhodnaja z abvinavačańniem. Što zvyčajna i zdarajecca».

Pavodle Tamary Sidarenki, Michaś Bašura nia skardziŭsia na ŭmovy ŭtrymańnia ŭ Žodzinskim śledčym izalatary, chacia i kazaŭ, što charčavańnie tam drennaje, i trymajucca viaźni za košt pieradačaŭ z voli. Viadoma, što aktyvist kampanii «Havary praŭdu» Michaś Bašura piša vieršy, z druku chutka vyjdzie jahony zbornik paezii. Ci pišacca Michasiu Bašuru za kratami, spytaŭ ja ŭ advakata.

Tam pisać vieršy ŭsio ž nia vielmi zručna, jak by jon mužna nie trymaŭsia.

«Pakul, kazaŭ, nie, ale mahčyma niešta i napišacca. Kaniešnie, tam pisać vieršy ŭsio ž nia vielmi zručna, jak by jon mužna nie trymaŭsia».

Advakat Tamara Sidarenka adrazu paśla aznajamleńnia jaje padaabaronnaha sa spravaj padała śledztvu chadajnictva ab źmienie miery strymańnia na padpisku ab niavyjeździe. Chadajnictva budzie razhledžanaje ciaham niekalkich dzion. Raniejšyja sproby advakata abskardzić pastanovu ab utrymańni Bašury pad vartaj vyniku nia dali. Taksama advakat chadajničała ab zakryćci spravy naohuł, pakolki ličyć Michasia Bašuru nievinavatym. I heta nia pieršaje analahičnaje chadajnictva — raniejšyja taksama nie zadavalnialisia.

U kampanii «Havary praŭdu», kaardynataram jakoj źjaŭlajecca Michaś Bašura, kažuć pra pieraśled svajho aktyvista z palityčnych pryčyn.

U traŭni ŭ ofisie kampanii «Havary praŭdu», a taksama ŭ kvaterach niekalkich dziesiatkaŭ aktyvistaŭ pa ŭsioj krainie prajšli pieratrusy. Tady byli kanfiskavanyja kamputary, ofisnaja orhtechnika i asabistyja hrošy niekatorych aktyvistaŭ, a ofis kampanii apiačatany. Kamputary i srodki dahetul nie viarnuli. Taksama ciaham troch dzion byli pad aryštam lider kampanii Uładzimier Niaklajeŭ i aktyvisty Siarhiej Vaźniak i Andrej Dźmitryjeŭ. Paźniej milicyja zatrymlivała i inšych aktyvistaŭ kampanii «Havary praŭdu». Praz sud viaducca sproby likvidavać ustanovu «Ruch napierad», u miežach jakoj dziejničaje kampanija «Havary praŭdu».

• 0
• 0
• 0
• 0
• 0
• 0
• 0
• 0