Uładzimir Asipienka padtrymaje na vybarach Sańnikava

Vaŭkavyski pradprymalnik Uładzimir Asipienka maje namier na prezidenckich vybarach padtrymać kandydaturu lidara hramadzianskaj kampanii «Jeŭrapiejskaja Biełaruś» Andreja Sańnikava. Ab hetym jon 10 listapada.

«My z Sańnikavym jašče nie havaryli, ale abaviazkova pahavorym. Spačatku ja chaču sustrecca ź ludźmi, jakija abaraniali mianie padčas usioj spravy. Ja jašče nie całkam uliŭsia ŭ situacyju. My z Andrejem heta abmiarkujem, i niachaj jon mianie ŭviadzie ŭ kurs spravy. Ja jašče tolki pryjšoŭ. U mianie jašče abmiežavańni pa zachavańni režymu, ja nie viedaju, što nie mahu parušać i što mahu rabić. Ź inšaha boku, ja dla siabie vyznačyŭsia i chaču addać hołas za jaho», — zajaviŭ Asipienka.

Pavodle słoŭ pradprymalnika, paŭnavartasna ŭdzielničać u kampanii jon naŭrad ci zmoža. «Mianie papiaredzili, što kali budzie choć adno administracyjnaje pravaparušeńnie, to da mianie buduć prymienieny surjoznyja miery i surjoznyja sankcyi. Tamu ja pavinien strymlivać siabie i, mahčyma, navat čakać pravakacyj. Tamu ja budu maksimalna aściarožny. Ja maju namier vykonvać usie patrabavańni zakanadaŭstva. Ja narmalny čałaviek, i mnie nie chočacca znoŭ hublać svabodu,« — skazaŭ Asipienka.

«Try miesiacy pryjdziecca čakać usio roŭna. Umoŭnaja svaboda — heta jašče nie svaboda», — dadaŭ jon.

Pradprymalnik paviedamiŭ, što ŭ najbližejšy čas źbirajecca pabyć ź siamjoj. «Ja vielmi daŭno jaje nie bačyŭ, i budu zaviaršać tyja spravy, jakija nie zaviaršyŭ. Heta ramont u kvatery, jaki ja pačynaŭ, ale nie skončyŭ. Źjeździć u Kijeŭ, dzie za čas majho źniavoleńnia pamierła stryječnaja siastra, jakaja vielmi mianie lubiła i čakała majho viartańnia, naviedać jaje mahiłu. Chaču źjeździć da dački Volhi, jakaja žyvie na Kipry, — jany z mužam daŭno mianie zaprašali. I, viadoma, budu brać udzieł u pieradvybarnaj kampanii. Ale samaje hałoŭnaje — ja salidarny z Aŭtuchovičam i my budziem sprabavać pryciahnuć da adkaznaści śledčych, jakija niezakonnymi mietadami viali našu spravu», — zajaviŭ Asipienka.

56-hadovy vaŭkavyski pradprymalnik Uładzimir Asipienka 5 listapada byŭ umoŭna-daterminova vyzvaleny ź ivacevickaj papraŭčaj kałonii № 22. 6 maja jon byŭ pryhavorany Viarchoŭnym sudom da troch hadoŭ pazbaŭleńnia voli z adbyvańniem pakarańnia ŭ kałonii ahulnaha režymu. Asipienka byŭ pryznany vinavatym u zachoŭvańni i pieravozcy zbroi i vybuchovych rečyvaŭ (artykuł 295 Kryminalnaha kodeksa).

Pravaabaroncy ličać Asipienku i inšych asudžanych vaŭkavyskich pradprymalnikaŭ palitviaźniami, ukazvajučy na surjoznyja pracesualnyja parušeńni, zafiksavanyja padčas suda.

• 0
• 0
• 0
• 0
• 0
• 0
• 0
• 0