Minekanomiki voźmiecca za hrečku

Ministerstva ekanomiki Biełarusi abiacaje «spyniać antykankurentnyja dziejańni» pastaŭščykoŭ hreckich krup.

Jak vynikaje z paviedamleńnia pres-słužby ministerstva, «departamient cenavaj palityki Minekanomiki Biełarusi i ŭpraŭleńni antymanapolnaj i cenavaj palityki abłvykankamaŭ i Minharvykankama pravodziać manitorynh i analiz cen na hreckija krupy, što realizujucca ŭ roznych rehijonach krainy, u metach vyjaŭleńnia i spynieńnia antykankurentnych dziejańniaŭ asobnych subjektaŭ tavarnaha rynku, jakija ažyćciaŭlajuć uvoz hetych krup u krainu».

Pres-słužba adznačaje, što ŭ adpaviednaści z zakanadaŭstvam dziaržrehulavańnie cen na hreckija krupy nie praduhledžana, adpusknyja ceny na ich farmirujucca arhanizacyjami-vytvorcami i imparciorami z ulikam kanjunktury rynku, a roźničnyja ceny vyznačajucca handlovymi arhanizacyjami z ulikam handlovaj nadbaŭki da 30% da adpusknych cen.

Pry hetym u Minekanomiki pryznajuć, što vytvorčaść hrečki ŭ krainie «ažyćciaŭlajecca ŭ niedastatkovych abjomach». Spažyviec unutranaha rynku zabiaśpiečvajecca pieravažna za košt uvozu hreckich krup z Rasii i Ukrainy. Adnak z-za składanych umoŭ nadvorja ŭ 2010 hodzie ŭradžaj zbožžavych kultur u hetych krainach značna źniziŭsia. Adpaviedna Rasija i Ukraina abmiežavali ekspart zbožža i hreckich krup. Tak, pavodle źviestak Minsielhascharča, u 2010 hodzie ŭ Biełaruś było zavieziena hrečki kala 33% ad uzroŭniu 2009-ha.

«Prymajučy da ŭvahi abmiežavanaść resursaŭ hrečki, pastaŭka hreckich krup ajčynnaj vytvorčaści na ŭnutrany rynak krainy ažyćciaŭlajecca ŭ adpaviednaści z hrafikam pastaŭki, uzhodnienym Minsielhascharčam i Minhandlu», — paviedamlaje pres-słužba.

Roźničnyja ceny na krupy hreckija fasavanyja, što vyrablajucca biełaruskimi pradpryjemstvami (AAT «Homielchlebapradukt» i PVUP «Skidalahrapradukt»), u lutym 2011 hoda skłali ad 5.670 da 7.790 rubloŭ za kiłahram u zaležnaści ad hatunku. U suviazi z pastaŭkami hreckich krup z Rasii, dzie adznačajecca značny rost cen na ich, roźničnyja ceny na krupy hreckija na spažyvieckich rynku krainy ŭzraśli da 8.900–16.900 rubloŭ za kiłahram.

Zaraz «u metach bieśpierabojnaha zabieśpiačeńnia spažyŭcoŭ hreckimi krupami arhanizacyjami chlebapraduktaŭ ažyćciaŭlajucca pracedury zakupki ziernia hrečki i krup hreckich, aptovyja arhanizacyja pravodziać arhanizacyjnuju pracu pa zakupcy hreckich krup u Rasijskaj Fiederacyi, va Ukrainie i ŭ Kitai», adznačaje pres-słužba. Da kanca lutaha 2011 hoda čakajecca pastaŭka hreckich krup z Kitaja, roźničnuju canu na jakija, z ulikam zatrat pa dastaŭcy i fasoŭcy, płanujecca ŭstanavić na ŭzroŭni 11–12 tys. rubloŭ za kiłahram, havorycca ŭ pres-relizie.

• 0
• 0
• 0
• 0
• 0
• 0
• 0
• 0