I pryznaŭ apazicyjny Nacyjanalny saviet pasiarednikam u pieramovach.
Jeŭraźviaz pryznaŭ stvorany livijskaj apazicyjaj Nacyjanalny saviet pierachodnaha pieryjadu «zakonnym pasiarednikam u pieramovach» i zaklikaŭ Muamara Kadafi admovicca ad ułady, zajaviŭ prezident Jeŭrasajuza Hierman Van Rompiej pa zakančeńni samitu ES u piatnicu. Samitu papiaredničali dvoje sutak kansultacyj,
adnak ES usio ž nie advažyŭsia całkam padtrymać prajekt rezalucyi, jakuju rychtavali Francyja i Vialikabrytanija -- nie tolki začynić dla palotaŭ nieba nad Livijaj i pryznać paŭstancki Nacyjanalny saviet adzinym zakonnym orhanam ułady ŭ krainie, ale i padtrymać ideju kropkavych bambavańniaŭ.
Rašeńni pa vajennym pytańni pryniatyja nie byli, patłumačyŭ Van Rompiej: Jeŭraźviaz hatovy da ŭžyvańnia «lubych mier», ale tolki paśla sankcyi Savieta biaśpieki AAN.
«My jasna dali zrazumieć libijskim kaleham, što prymianieńnie siły suprać hramadzian pavinna być spynienaje. Asoby, adkaznyja za heta, paniasuć surjoznyja pakarańni.
Ciapierašniaje kiraŭnictva Livii pavinna admovicca ad ułady. Usie 27 krain adnahałosna paćvierdzili heta»,-- skazaŭ Rampiej.
Napiaredadni Nikala Sarkazi, paśla sustrečy z pradstaŭnikami livijskaj apazicyi, zajaviŭ, što Francyja pryznaje ŭ paŭstancach adziny zakonny ŭrad Livii i zaklikaje inšyja krainy ES brać ź jaje prykład. Kancler Niamieččyny Anhieła Mierkiel paćvierdziła fakt pieramovaŭ ź livijskimi apazicyjanierami, adnak udakładniła, što heta nie aznačaje pryznańnia za imi ŭsioj paŭnaty ŭłady ŭ krainie.
«Hety saviet nikoha nie prezientuje. Heta prosta hrupa bandytaŭ.Jak moža Jeŭrasajuz, lubaja kraina, što pavažaje siabie, mieć znosiny z hetym prydumanym orhanam?» -- pieraścierahaŭ napiaredadni samitu ES sakratar narodnaha schodu Livii Machamied Abduł Kasim al-Zuai. Jon paŭtaryŭ abvinavačvańni Kadafi ŭ adras savieta ŭ supracoŭnictvie z "Al-Kaidaj" i zaklikaŭ Jeŭrasajuz nie dapuścić «źjaŭleńnia ŭ Livii płacdarmu« Al-Kaidy », niebiaśpiečna blizkaha da Jeŭropy».
U subotu livijskaja prablema budzie abmiarkoŭvacca i na sustrečy pradstaŭnikoŭ krain, jakija ŭvachodziać u Lihu arabskich dziaržaŭ. Adnak šancy ŭzhadnić adzinuju pazicyju pa pytańni ab «zakrytym niebie» nad Livijaj i pryznańni ŭłady Nacyjanalnaha savieta nievialikija, ličać ekśpierty, apytanyja Reuters: Siryja i Ałžyr, vierahodna, nie stanuć padtrymlivać hetyja sankcyi, mnohaje budzie zaležać ad pazicyi Jehipta.
Tym časam viernyja Kadafi vojski praciahvajuć brać pad kantrol zachoplenyja paŭstancami nasielenyja punkty. U piatnicu pad prykryćciom avijacyi i pry padtrymcy artyleryi jany vybili paŭstancaŭ z partovaha horada Ros-Łanuf.
Kamientary