Nie stralajcie ŭ Miaśnikoviča. I Prakapoviča

Alaksandr Łukašenka spraviadliva adznačyŭ, što toj, chto nie zabiaśpiečyŭ stabilnaść u krainie, pavinien syści ŭ adstaŭku. Adnak pryhraziŭ jon hetaj pierśpiektyvaj zusim nie tym, kamu treba.

Aficyjny sajt prezidenta paviedamlaje, što Alaksandr Łukašenka paabiacaŭ adpravić urad u adstaŭku, «kali jon nie zabiaśpiečyć stabilnaść u krainie». Pra heta było zajaŭlena na naradzie, pryśviečanaj aktualnym pytańniam ekanomiki.

Sam pa sabie pasył piarečańniaŭ nie vyklikaje: u šerahu krain śvietu vysokapastaŭlenyja kiraŭniki źlatali z pasadaŭ i za mienšyja hrachi, čym devalvacyja na 54%. Voś tolki ŭ našym vypadku hałoŭnyja adkazčyki vybranyja nie zusim karektna.

Na tym ža sajcie možna znajści cikavy dakumient pad nazvaj «Kanstytucyja Respubliki Biełaruś».

Heta, što datyčyć de-jure. Zaraz pahavorym pra de-fakta. Pa ŭradzie Michaiła Miaśnikoviča nichto śloz lić nie budzie, ale i valić na jaho ŭsie hrachi taksama nie varta. Urešcie, hety kabiniet pracuje mienš za paŭhoda, i ciapierašniuju kašu zavarvaŭ nie jon.

Ź Piatrom Prakapovičam situacyja składaniejšaja. Jon rulić Nacyjanalnym bankam z 1998 hoda. Uniosak Prakapoviča ŭ emisiju, jakaja stała adnoj z hałoŭnych pryčyn ciapierašniaha «pažaru» (vyznačeńnie Łukašenki), niesumnieŭna. Adnak burnaja dziejnaść Piatra Piatroviča ŭ hetym napramku zusim niadaŭna atrymała najvyšejšuju ŭchvału: u studzieni ŭkazam kiraŭnika dziaržavy termin paŭnamoctvaŭ staršyni praŭleńnia Nacbanka pradoŭžany da kanca 2015 hoda.

Tak što, nie stralajcie ŭ Miaśnikoviča i Prakapoviča — jany ihrajuć, jak umiejuć. Adkazvać pavinien toj, chto zamaŭlaje muzyku. Urešcie, nie ciapierašnija prem'jer-ministr i šef Nacbanka abiacali davieści siaredniuju zarpłatu da kanca 2010 hoda da 500 dalaraŭ. Prakapovič, viadoma, hruntoŭna prykłaŭ ruku da biazdumnaha vykanańnia hetaj zadačy. Ale ŭ ramkach ciapierašniaj sistemy «vystupać» pierad kiraŭnikom dziaržavy nie toje kab nie pryniata — niemahčyma.

Uvohule, usie strełki tak ci inakš pakazvajuć na Alaksandra Łukašenku.

Łukašenka, praŭda, pasprabavaŭ jašče vyklikać pačućcio viny ŭ suajčyńnikaŭ. Pavodle jaho śćvierdžańnia, 25% biełarusaŭ na pytańnie «Chto vinavaty ŭ paharšeńni ŭ vašym žyćci?» adkazali: «My sami». Ale narod zvolnić u lubym vypadku niemahčyma. Tak što, miarkujučy pa vykładzienych vyšej padstavach kiraŭniku dziaržavy maje sens zadumacca ab ułasnaj adstaŭcy.

…Ja, darečy, całkam dapuskaju, što 25% vybarščykaŭ, jakija realna prahałasavali za Łukašenku na niadaŭnich vybarach, ciapier kažuć sabie: «Sami vinavatyja!»

• 0
• 0
• 0
• 0
• 0
• 0
• 0
• 0