U Haazie sudziać mierkavanaha biełaruskaha špijona

U Niderłandach na minułym tydni raspačaŭsia sudovy praces nad 37-hadovym piłotam nacyjanalnych vajskova-pavietranych siłaŭ Krysam V. Jaho aryštavali sioleta 17 sakavika ŭ suviazi z abvinavačvańniem va ŭciečcy dziaržaŭnych vajennych sakretaŭ, a taksama ŭ špijanažy na karyść Biełarusi.

Dahetul pradstaŭniki śledstva ŭstrymlivalisia ad aficyjnych kamientaroŭ pa spravie kapitana šmatmetavaha źniščalnika čaćviortaha pakaleńnia F-16 (Fighting Falcon). Było viadoma, što Krys V. pracavaŭ lotčykam u sistemie VPS Niderłandaŭ da 2009 hodu. Jak paviedamlali sa spasyłkaj na nataŭskich ekśpiertaŭ miascovyja ŚMI, hety piłot moh vałodać infarmacyjaj, cikavaj dla Biełarusi, čyj lidar Łukašenka maje pryjaznyja stasunki ź inšymi dyktatarskimi režymami pa ŭsim śviecie. Žurnalisty taksama pisali pra toje, što paśla sychodu z VPS u Krysa V. byli vialikija finansavyja i psichalahičnyja prablemy. Jon sprabavaŭ zasnavać ułasnuju kampaniju i vioŭ dziela hetaha pieramovy ź inviestarami, u tym liku ź Biełarusi dy Rasii. Tady, nibyta, biełaruskija śpiecsłužby i zavierbavali byłoha vajskovaha piłota.

Aficyjna abvinavačvańni byli ŭpieršyniu publična ahučanyja ŭ čaćvier na pieršym pasiedžańni ŭ zale Haahskaha suda prakuroram Kampsam, jaki padkreśliŭ usiu surjoznaść praviedzienaha pa hetaj spravie rasśledavańnia.

Tym časam sam Krys V. užo na pieršym sudovym pasiedžańni zajaviŭ, što adrynaje ŭsie abvinavačańni ŭ špijanažy. Jon paćvierdziŭ, što sapraŭdy mieŭ stasunki ź biełaruskimi piłotami. Pavodle jahonych słovaŭ, jon paznajomiŭsia ź imi na avijašoŭ u Polščy. Dvoje z hetych lotčykaŭ tady raźbilisia, i Krys paśla hetaha trahičnaha zdareńnia staŭ bolš kantaktavać z adnym pałkoŭnikam biełaruskaj avijacyi.

Advakat padazravanaha Džeram Choste źviarnuŭsia ŭ sud z chadajnictvam ab źmienie miery strymańnia svajmu klijentu i vyzvaleńni jaho z-pad varty pad zakład. Jon matyvavaŭ heta tym, što abvinavačvańnie nie maje dastatkovych dokazaŭ, što jaho padabaronny pieradavaŭ sakretnyja materyjały zamiežnym śpiecsłužbam.

Adnak sud nie ŭziaŭ pad uvahu chadajnictva advakata i pahadziŭsia z arhumientami prakuratury, što Krys V., kali jaho vyzvalać, moža ŭciačy. Mierkavany biełaruski špijon, takim čynam, zastajecca pad vartaj u turmie «Zoetermeer». Čarhovaje sudovaje pasiedžańnie pryznačanaje na 23 žniŭnia.

• 0
• 0
• 0
• 0
• 0
• 0
• 0
• 0