Na dachu žyłoha domu kala Praletarskaje płoščy ŭ Viciebsku źjaviŭsia bieł‑čyrvona‑bieły ściah. Heta ŭžo čaćviertaja ŭ hetym miesiacy akcyja nieviadomaha Mirona.
Na dachu žyłoha domu kala Praletarskaje płoščy ŭ Viciebsku źjaviŭsia bieł‑čyrvona‑bieły ściah. Heta ŭžo čaćviertaja ŭ hetym miesiacy akcyja nieviadomaha Mirona. Ciapier Miron źviarnuŭsia da ziemlakoŭ z prapanovaj bajkatavać miascovyja vybary.
Pavodle miascovaha apazycyjanera Barysa Chamajdy, z peŭnaj krynicy, vartaj davieru, jamu stała viadoma, što da ściaha była prymacavanaja cydułka sa słovami «Bajkot vybarčamu farsu!» i podpisam — Miron.
❏
Ad udziełu ŭ vybarach admoviŭsia staršynia viciebskaj arhanizacyi BNF
Kastuś Smolikaŭ byŭ zarehistravany kandydatam u deputaty abłasnoha savietu pa Kiraŭskaj vybarčaj akruzie №52. Jon apynuŭsia adzinym pradstaŭnikom apazycyi, vyłučanym na vybary ŭ abłsaviet ź Viciebsku.
Pavodle spadara Smolikava, rašeńnie admovicca ad udziełu ŭ vybarach jon pryniaŭ paśla taho, jak navat praz abłasny sud na kandydataŭ nie ŭdałosia zarehistravacca nivodnamu ź inšych demakratyčnych pradstaŭnikoŭ Viciebsku.
(Smolikaŭ: ) «Ja napisaŭ zajavu i siońnia adnios — pra toje, što ja zdymaju svaju kandydaturu z vybaraŭ u miascovyja deputaty. Matyvacyja prostaja: vybaraŭ u nas niama j hulać u hulni ŭłady ja nie chaču. Jak mnie viadoma, chto ni źviartaŭsia ŭ sud, usim admovili, i horad Viciebsk faktyčna zastaŭsia biez apazycyjnych kandydataŭ. Tamu my budziem rychtavacca da niejkich inšych padziejaŭ, i nia budziem brać udziełu ŭ hetych vybarach, u hetym farsie».
Paśla admovy ad udziełu ŭ vybarach Kastusia Smolikava kandydatam u deputaty abłasnoha savietu zastaŭsia adziny pradstaŭnik apazycyjnych strukturaŭ — siabar BSDP (Hramada) Leanid Haravy z Haradka. Uvohule ž vybary ŭ abłsaviet atrymalisia amal biezalternatyŭnyja: tolki ŭ 11 akruhach z 60 balatujucca dva i bolej kandydataŭ.
❏
Nahadajem, što na minułym tydni zaklikaŭ admovicca ad udziełu ŭ vybarach Alaksandar Kazulin.
Kamientary