Z pravaabaroncy Stefanoviča patrabujuć 37 młn rubloŭ nibyta ŭtojenaha padatku
Padatkovaja inśpiekcyja Partyzanskaha rajona Minska nakiravała isk u sud ab spahnańni z pravaabaroncy Valancina Stefanoviča bolš jak 37 młn. rubloŭ nibyta ŭtojenaha padatku, paviedamiŭ kaleha Stefanoviča Uładzimir Łabkovič.
Pavodle jaho słoŭ, padatkovaja inśpiekcyja pastanaviła spahnać sa Stefanoviča 31,5 młn rubloŭ padatku, a taksama 6 młn. rubloŭ pieni. Padatkaviki nakiravali ŭ sud Partyzanskaha rajona isk ab spahnańni hetych hrošaj u suviazi ź ich niaŭpłataj u dobraachvotnym paradku. Data pasiadžeńnia suda pakul nie pryznačanaja.
Jak adznačyŭ Łabkovič, adpaviednaja suma nibyta nie vypłačanych Stefanovičam padatkaŭ raźličana ź jaho zamiežnych rachunkaŭ, infarmacyja pra jakija była pieradadzienaja ŭ Biełaruś ź Litvy i Polščy. «Sam Stefanovič zajaŭlaje pra svaju niazhodu z vystaŭlenymi pretenzijami Ministerstva pa padatkach i zborach. Srodki na jaho rachunkach nie źjaŭlajucca jaho dachodam i adpaviedna nie padlahajuć padatkaabkładańniu. Roznyja fondy dasyłali hetyja hrošy na jaho asabisty rachunak vyklučna na pravaabarončuju dziejnaść, u tym liku dla pieradačy trecim asobam u jakaści dapamohi», — skazaŭ Łabkovič.
«Spravazdačy pa vykarystańni srodkaŭ byli nakiravanyja fondam. Nijakich pretenzij ź ich boku da nas niama. A što da asabistych dachodaŭ Stefanoviča, to jon štohod vypłačvaŭ padatak, zapaŭniaŭ dekłaracyju ab dachodach. Tamu jon ličyć, što hetyja hrošy nie pavinny padlahać padatkaabkładańniu», — skazaŭ Łabkovič.
Jon taksama paviedamiŭ, što Stefanovič nie maje namieru chavacca ad suda i płanuje pradstavić u sudzie adpaviednyja dokazy ad samich fondaŭ. Ciapier pravaabaronca vymušany znachodzicca za miežami Biełarusi, bo čakajecca šerah važnych sustreč, u tym liku pa spravie aryštavanaha Alesia Bialackaha.
Ciapier čytajuć
Dziaciej-futbalistaŭ z Rečycy pavieźli ŭ Hielendžyk pa pryfrantavoj vobłaści Rasii. U aŭtobus papaŭ bieśpiłotnik36
Dziaciej-futbalistaŭ z Rečycy pavieźli ŭ Hielendžyk pa pryfrantavoj vobłaści Rasii. U aŭtobus papaŭ bieśpiłotnik
Cichanoŭskaja pra ŭdar pa aŭtobusie ź biełaruskimi dziećmi: Nie ryzykujcie žyćciom — nie jedźcie ŭ Rasiju, jakaja viadzie złačynnuju i niespraviadlivuju vajnu77
Kamientary