Biełaruś pakul nie zaklučyła kantraktu na pastaŭku nafty ŭ lutym

Alaksandar Łukašenka siońnia padčas uručeńnia dyplomaŭ novym daktaram navuk i prafesaram vystupiŭ z šeraham zajaŭ nakont biełaruska‑rasiejskich dačynieńniaŭ. U pryvatnaści, jon paviedamiŭ, što Biełaruś pakul nie zaklučyła kantraktaŭ na pastaŭku nafty ŭ lutym hetaha hodu.

Pavodle A.Łukašenki, pryčyna taho, što kantraktaŭ na pastaŭku nafty ŭ lutym niama, zanadta vysoki (vyšejšy za ŭsiaśvietny) košt syraviny, prapanavany rasiejskim bokam. Spadar Łukašenka zahadaŭ biełaruskaj delehacyi, što viadzie pieramovy ab pastaŭkach nafty ŭ lutym: kampanii, jakija buduć prapanoŭvać zavyšanuju canu na naftu, buduć abkładacca dadatkovym mytam na tranzyt praź biełaruskuju terytoryju dziela kampensacyi biełaruskich strat.

Razam z tym, Alaksandar Łukašenka zajaviŭ, što i rasiejskamu, i biełaruskamu kiraŭnictvu treba achałanuć, asensavać apošnija padziei i admovicca ad «nahniatańnia abstanoŭki ŭ tym kirunku, ź jakoha nia budzie vyjścia».

«Nam hetaja bojka nie patrebnaja, tamu što my słabyja», – pryznaŭsia spadar Łukašenka. Adnak ža pry hetym jon znoŭ abvinavaciŭ Rasieju ŭ cisku i žadańni «pryšpilić Biełaruś da siabie». A.Łukašenka zajaviŭ: kali Rasieja jašče raz pasprabuje ŭdaryć Biełaruś pa balučych miescach, «my taksama viedajem hetyja balučyja miescy i viedajem, dzie ŭdaryć».

Niezaležny admysłoviec u naftavaj halinie Taciana Manionak nazvała zajavu A. Łukašenki ab tym, što rasiejskija kampanii pradajuć Biełarusi naftu pa cenach, vyšejšych za ŭsiaśvietnyja, pierabolšańniem. U studzieni nafta pastaŭlajecca ŭ Biełaruś pa 272 dalary za tonu, što pryblizna na 100 dalaraŭ tańniej za ŭsiaśvietny košt. Chacia spadarynia Manionak pryznaje, što novyja ŭmovy pastavak značna horšyja za letašnija, adnak, na jaje dumku, u hetym vypadku nie vyjaŭlajecca palityčnaha cisku Rasiei: paprostu naftavyja kampanii sprabujuć damahčysia lepšych umoŭ dla pracy na biełaruskim rynku paśla taho, jak stracili vyhody ad davalnickaj pierapracoŭki nafty ŭ Biełarusi.

Manionak: «Kali raniej jany pierapracoŭvali naftu na biełaruskich NPZ i mieli prybytak ad ekspartu naftapraduktaŭ, to ciapier praviły hulni nie dazvalajuć hetaha rabić. I ja mahu mierkavać, što jany, kaniečnie ž, vyhandloŭvajuć umovy. Tamu što ciapier im nievyhodna tut pracavać».

Pavodle źviestak Taciany Manionak, u studzieni ni adna rasiejskaja naftavaja kampanija nie pastaŭlała na biełaruskija NPZ dla pierapracoŭki svajoj syraviny na davalnickich umovach.

Manionak: «Idzie taki handal, taki surjozny, žorstki. I heta spravakavała biełaruskaha prezydenta na zajavu: kali niejkija rasiejskija kampanii nia buduć zhodny pastaŭlać na biełaruski rynak naftu, to buduć pierahledžany ŭmovy transpartyroŭki ich syraviny praź biełaruskuju terytoryju. Ale heta niekarektnaja zajava, bo transpartyroŭkaj zajmajucca nia naftavyja firmy, ale admysłovaja kampanija «Tranśniefť».

• 0
• 0
• 0
• 0
• 0
• 0
• 0
• 0