Siońnia ŭ šviedskim parłamiencie ŭ Stakholmie adbyłasia dyskusija pa pytańniu Čempijanatu śvietu pa chakiei, što maje adbycca ŭ Minsku ŭ 2014.Hałoŭnym udzielnikam sustrečy byŭ Kryster Enhłund (Christer Englund), staršynia Šviedskaj nacyjanalnaj fiederacyi chakieja i adzin z kiraŭnikoŭ Mižnarodnaj fiederacyi chakieja z šajbaj.
Kryścijan Cholm, deputat parłamienta (Partyja Maderataŭ/Kansiervatary) i arhanizatar sustrečy, razam sa svaimi kalehami, mieŭ na mecie vykazać krytyčnuju pazicyju parłamienta Šviecyi da praviadzieńnia čempijanatu.
Na sustrečy prysutničali paru dziesiatkaŭ čałaviek, jakija pradstaŭlali roznyja palityčnyja partyi i pravaabarončyja arhanizacyi, a taksama zvyčajnyja supracoŭniki parłamienta, ale ŭsie mieli adnolkavy pasył da pradstaŭnika arhanizacyi, jakaja prymała rašeńnie pa nadańni Biełarusi pravoŭ pa praviadzieńni čempijanatu — Biełaruś i biełaruski narod zasłuhoŭvajuć takoje spabornictva, ale nie Łukašenka i jahony režym.
Parłamientary padzialajuć mierkavańnie, što sport i palityka musiać być asobna, ale prysutnyja palityki, jak i Kryścijan Cholm, miarkujuć, što navat sport nie pavinien stracić kaštoŭnaściaŭ demakratyi i pravoŭ čałavieka, i vysokija patrabavańni ŭ hetaj śfiery sadziejničajuć padtrymcy i raźvićciu demakratyi va ŭsim śviecie.Kryścijan Cholm, jaki taksama źjaŭlajecca staršyniom hrupy pa pytańniach Biełarusi ŭ parłamiencie Šviecyi, ličyć, što samo rašeńnie dać Łukašenku prava praviadzieńnia čempijanatu jość vialikaj pamyłkaj ad samaha pačatku.
Kryster Enhłund, u svaju čarhu, adznačyŭ, što adzinaje, z čym Mižnarodnaja fiederacyja chakieju ličycca pieradusim — heta techničnyja mahčymaści krainy na arhanizacyju i praviadzieńnie čempijanatu, adchiliŭšy hetym usie fakty parušeńniaŭ pravoŭ čałavieka ŭ Biełarusi.
Adno z patrabavańniaŭ, jakoje Mižnarodnaja fiederacyja chakieju budzie mieć da biełaruskich ŭładaŭ tyčycca vizavaha pytańnie.
Tak, ad biełaruskich uładaŭ budzie patrabavacca poŭnaje palahčeńnie vizavaha režymu dla zamiežnych žurnalistaŭ i hulcoŭ čempijanatu, ci poŭnaje skasavańnie vizavaha režyma dla dadzienaj hrupy ludziej.
«Nielha abmiažoŭvacca kłopatam tolki pra zamiežnych žurnalistaŭ. My musim dumać pieradusim pra pradstaŭnikoŭ miascovych, niezaležnych ŚMI ŭ Biełarusi», — dadaŭ Kryścijan Cholm.
Na pytańnie, ci adreahavała Mižnarodnaja fiederacyja chakieja na padziei paśla prezidenskich vybaraŭ 2010 i ciapierašniuju situacyju ŭ krainie, pradstaŭnik fiederacyi adznačyŭ, što jany fakusujuć svaju ŭvahu na techničnym prahresie Biełarusi pa arhanizacyi čepmijanatu.«U časie sustrečy, my vykazali naš pohlad pa dadzienym pytańni, i što my ščyra spadziajemsia na mahčymy pieranos čempijanatu ź Biełarusi, viedajučy pra represiŭny režym Łukašenki. Asabista ja liču, što spartovaje mierapryjemstva padobnaha maštabu nie pavinna pravodzicca ŭ dyktatury. Pakul režym trymaje ŭ zakładnikach palityčnych viaźniaŭ i nie pravozić anijakich demakratyčnych reformaŭ, kraina pavinna być całkam vykreślinaja navat ź listu mahčymych kandytataŭ na praviadzieńnie takich mierapryjemstvaŭ», — adznačyŭ Kryścijan Cholm padčas sustrečy.
Kamientary