Levyja no pasaran

13 krasavika Viarchoŭny sud admoviŭ Sajuzu levych partyj (SŁP) u isku da Ministerstva justycyi Biełarusi.

Nahadajem, Miniust admoviŭsia zarehistravać Sajuz levych partyj u suviazi z tym, što jaho ŭstanoŭčaja kanfierencyja prajšła nie ŭ Biełarusi, a va Ukrainie — u Čarnihavie. Pradstaŭniki partyj, jakija ŭvachodziać u sajuz, asprečyli heta rašeńnie ŭ Viarchoŭnym sudzie. Sud pryznaŭ abhruntavanaj admovu Miniusta ŭ rehistracyi na padstavie taho, što źjezd SŁP prajšoŭ za miežami Biełarusi, faktyčna adchiliŭšy šerah inšych pretenzij da SŁP Ministerstva justycyi.

Siońniašniamu rašeńniu Viarchoŭnaha suda papiaredničali sprečki bakoŭ. U svaim vystupleńni lider Partyi kamunistaŭ Biełaruskaj Siarhiej Kalakin ukazaŭ, što ŭžo nie ŭpieršyniu jon sutykajecca z ahulnym padychodam Miniusta da zakanadaŭstva. Pavodle jaho słoŭ, zakony zaklikany zadavalniać kanstytucyjnyja pravy hramadzian na svabodu abjadnańniaŭ i ŭstupleńnia ŭ palityčnyja partyi i Ministerstva justycyi nie moža zabaraniać toje, što nie zabaroniena zakonam. Pry hetym S.Kalakin zajaviŭ, što ŭ zakonie ab palityčnych partyjach Biełarusi niama nivodnaj normy, jakaja napramuju zabaraniaje praviadzieńnie jakich‑niebudź mierapryjemstvaŭ palityčnych partyj za miežami respubliki.

Taksama S.Kalakin padkreśliŭ, što statuty ŭsich troch palityčnych partyj — Partyi kamunistaŭ Biełaruskaj, Biełaruskaj sacyjał‑demakratyčnaj partyi (Hramada) i Biełaruskaj partyi žančyn «Nadzieja» — padrazumiavajuć udzieł u kanfierencyjach, źjezdach i inšych mierapryjemstvach za miažoj.

Lider PKB padkreśliŭ, što ŭ statutach usich troch partyj jość punkty ab kaardynacyi dziejnaści pamiž palityčnymi partyjami Biełarusi ŭ pytańniach najbolš efiektyŭnaha raźvićcia respubliki. U suviazi z hetym jon prasiŭ Viarchoŭny sud pryznać niezakonnym rašeńnie Miniusta ab admovie ŭ rehistracyi Sajuza levych partyj i adnieści raschody pa praviadzieńni sudovaha pasiadžeńnia na rachunak adkazčyka.

Pradstaŭnik Miniusta Alaksandr Charyton u svaim vystupleńni nie pahadziŭsia z dokazami S.Kalakina. Pavodle jaho słoŭ, praviadzieńnie ŭstanoŭčaj kanfierencyi SŁP za miežami Biełarusi, u Čarnihavie, heta parušeńnie normy ab tym, što palityčnyja partyi ažyćciaŭlajuć svaju dziejnaść na terytoryi Biełarusi. Na jaho dumku, hety źjezd źjaŭlajecca ŭnutranaj spravaj troch biełaruskich palityčnych partyj i nie byŭ skiravany na mižnarodnaje supracoŭnictva hetych partyj ź inšymi strukturami za miažoj.

Taksama jon vykazaŭ šerah pretenzij da statuta Sajuza levych partyj.

Prakuror padtrymaŭ mierkavańnie Ministerstva justycyi i pryznaŭ, što dla admovy ŭ rehistracyi jość padstavy, a praviadzieńnie ŭstanoŭčaha źjezda ŭ Čarnihavie — heta parušeńnie statutaŭ usich troch partyj. U vyniku Viarchoŭny sud admoviŭ u isku SŁP da Miniusta.

Jak zajaviŭ BiełaPAN paśla vyniasieńnia vierdyktu S.Kalakin, takoje rašeńnie suda «prosta vydatnaje». Pavodle jaho słoŭ, «usie inšyja pretenzii — ab niestatutnaj formie dziejnaści i zadačach Sajuza levych partyj abo ab niejkich inšych techničnych momantach — nie majuć pad saboj padstavy». Pavodle jaho słoŭ, SŁP u najbližejšy čas praviadzie anałahičnuju kanfierencyju na terytoryi Biełarusi i tady ŭ Miniusta nie pavinna ŭźniknuć nijakich pytańniaŭ.

• 0
• 0
• 0
• 0
• 0
• 0
• 0
• 0