A ci treba kłaścisia pad tank?

Asobnyja vykazvańni Milinkieviča ŭ Piciery navodziać na dumku: biełaruskaja apazycyja nie namacała patrebnaj tanalnaści što da pijaru na rasiejskuju aŭdytoryju.

Sam pa sabie hety vizyt, kaniešnie, maje sens. Na dumku palitolaha Andreja Fiodarava, Milinkievič, u pryvatnaści, sprabuje abvierhnuć imidž antyrasiejca, stvorany medyjami susiedniaj krainy. Zrešty, dla luboha biełaruskaha palityka pytańnie stasunkaŭ z Rasiejaj — ź liku tych, jakija nie abjedzieš. Inšaja reč — što i jak kazać.

Naturalna, ciažka impravizavać ŭ žyvym etery. Adnak słova nie vierabiej. Voś jak, naprykład, prakamentavaŭ Milinkievič "Rechu Maskvy ŭ Sankt-Pieciarburzie" naftahazavuju vajnu: maŭlaŭ, biełaruskaja ułada, jakaja doŭha atrymlivała preferencyi, u vyniku "akazałasia niaŭdziačnaj i stała vystupać suprać Rasiei. Mnie za heta soramna".

Što heta, kali nie padhulvańnie imperskim ujaŭleńniam pra vierałomnaha satelita? Chiba varta było zdavacca na litaść Kramla? I chiba Kreml u hetaj svarcy vyhladaŭ lepiej, kiravaŭsia vysakarodnymi pamknieńniami? Aboje raboje!

A jak vam razvahi pra svajo bačańnie sajuznaj dziaržavy?

Kaniešnie, varta ŭličvać, što tut my majem spravu ź interpretacyjami rasiejskich žurnalistaŭ. "Sajuznaja" terminalohija — heta ich zvykły słenh. Vidać, tak sfarmulavali pytańnie. Adnak što pieraškadžaje u adkaz — razam z tradycyjnymi tezami pra dobrasusiedzkija i ŭzajemavyhadnyja stasunki — artykulavać toje, što sam paniatak sajuznaj dziaržavy jość symulakram? I što kali chočam narmalovych dačynieńniaŭ, dyk treba najpierš pierastać tłumić mazhi elektaratu hetaj mitalohijaj. Dy i da naftahazavaj vajny pryviali mienavita hetyja niebiaśpiečnyja hulni ŭ sajuznuju dziaržavu. Kładučy ruku na serca, intaresam Biełarusi adpaviadała b tolki skasavańnie sajuznaj damovy.

Chaj sabie žorstka, ale praŭdziva.

Zrešty, mažliva, što fonam niešta takoje ŭ Piciery i prahučała, ale tamtejšyja ŚMI hetaha nie adlustravali. Adnak heta mała što mianiaje, bo artykulavać pazycyju varta nastolki vyrazna, kab žurnalisty choćki-niachoćki musili retranślavać.

Mnie mohuć zapiarečyć: a jak ža mierkavańni palitkarektnaści, zavajova sympatyjaŭ aŭdytoryi? Palityka musić być hnutkaj i dyplamatyčnaj!

Kaniešnie, hulnia na čužym poli vymahaje adpaviednaj taktyki. Nichto nia kaža, što picierskaja studyja — samaje ŭdałaje miesca dla adbornych filipikaŭ na adras rasiejskaha imperyjalizmu:) Ale ž, razam z tym, kiroŭnyja elity abiedźviuch dziaržaŭ u pytańni dvuchbakovych dačynieńniaŭ i tak nahruvaścili demahohii z kapturom. Chto, jak nie apazycyjny biełaruski palityk, musić nazvać rečy svaimi imionami, ačyścić pytańnie ad klejkaj chłuśni?

Biessensoŭna sprabavać padacca bolšym intehrataram, čym pieršy biełaruski prezydent. "Kłaścisia pad tanki" — heta apateoz. Na hetym poli rabić niama čaho. U rešcie reštaŭ, što b ni skazali Milinkievič ci, naprykład, Viačorka,— ad reputacyi nacyjanalistaŭ, prazachodnich palitykaŭ jany nie adkaraskajucca. I finansavać adpaviednuju palityčnuju płyń Maskva nikoli nia stanie, kali ŭžo na toje. Karaciej, ci treba nadta bajacca, što impercy skryviacca ad pryncypovaha farmulavańnia pohladaŭ u rasiejskim pytańni? Z toj publikaj ŭsio adno nie pa darozie. A miž tym prylizany ekspartny varyjant apazycyjnaha pijaru pakidaje prykry asadak u dušach śviadomych suajčyńnikaŭ. Ź inšaha boku, robicca padarunak aficyjnaj biełaruskaj prapahandzie. Znoŭ nazavuć piataj kalonaj (ciapier užo kramloŭskaj)!

"Na žal, u Milinkieviča dasiul niama mocnaj kamandy ekspertaŭ — kštałtu toj, što była ŭ Lecha Vałensy časoŭ "Salidarnaści", — ličyć analityk Raman Jakaŭleŭski.

Sapraŭdy, niaŭdałyja ekspromty pierad rasiejskaj publikaj navodziać na dumku, što ŭ biełaruskich apazycyjaneraŭ banalna adsutničaje piśmiennaja kancepcyja pijaru na aŭdytoryju susiedniaj krainy. Pracavać na hetu aŭdytoryju treba, ale tak, kab nie było soramna:)

• 0
• 0
• 0
• 0
• 0
• 0
• 0
• 0