Siońnia svoj 63‑ci dzień narodzinaŭ śviatkuje Zianon Paźniak.
Zianon Paźniak naradziŭsia 24 krasavika 1944 h. u miastečku Subotniki (siońnia heta Iviejski r‑na Haradzienskaj vobłaści). Jahony baćka Stanisłaŭ byŭ mabilizavany ŭ Čyrvonuju armiju ŭletku 1944 h. i zahinuŭ na froncie na terytoryi Polščy ŭ śniežni 1944 h.
Z. Paźniak skončyŭ siaredniuju škołu ŭ rodnych Subotnikach, u 1967 h. skončyŭ Biełaruski dziaržaŭny teatralna‑mastacki Instytut, u 1972 h. aśpiranturu pry Instytucie etnahrafii, mastactvaznaŭstva i falkloru AN Biełarusi. U 1981 h. abaraniŭ dysiertacyju ŭ Leninhradzie pa historyi biełaruskaha teatru.
Zajmaŭsia mastactvaznaŭstvam. Paśla čarhovych palityčna‑administracyjnych represijaŭ (1974 h.) i pazbaŭleńnia pracy ŭ Instytucie mastactvaznaŭstva zajmaŭsia archiealohijaj (z 1976 h.). Pracavaŭ staršym navukovym supracoŭnikam u adździele archiealohii Instytuta historyi Akademii Navuk. Vyvučaŭ peryjad poźniaha siaredniaviečča ŭ Biełarusi: raskopki Miensku, Łosku i inšych biełaruskich haradoŭ i miastečak. Šmat zrabiŭ dla zachavańnia histaryčnaj spadčyny i pomnikaŭ architektury staroha Miensku. Adstajaŭ ad razbureńnia histaryčnyja kvartały Miensku: Trajeckaje pradmieście, Vierchni horad, Rakaŭskaje pradmieście.
U 1988 hodzie adkryŭ dla biełaruskaj i suśvietnaj hramadzkaści i archiealahična daśledavaŭ masavyja pachavańni ludziej u Kurapatach, rasstralanych savietami. Zianon Paźniak — adzin z aktyŭnych zasnavalnikaŭ i Staršynia Martyralohu Biełarusi (1988 h.) i Biełaruskaha Narodnaha Frontu «Adradžeńnie» (1988 h.).
Z traŭnia 1990 hoda pa studzień 1996 h — deputat Viarchoŭnaha Savietu 12‑ha sklikańnia, kiraŭnik deputackaj apazycyi BNF u Viarchoŭnym Saviecie. Najbolš važnyja spravy, ździejśnienyja pad jaho kiraŭnictvam u hety čas: adkryćcio praŭdy biełarusam pra maštaby Čarnobylskaj katastrofy (1989‑1990 hh.), viartańnie niezaležnaści Biełarusi (1991 h.), nacyjanalnaha Bieł‑Čyrvona‑Biełaha Ściahu, hierbu Pahonia i suverenitetu krainy, raspracoŭka sacyjalna‑ekanamičnaha zakanadaŭstva, jakoje stvaryła asnovu niezaležnaści krainy.
U sakaviku 1996 hoda, unikajučy aryštu, pakinuŭ Biełaruś. Ad hetaha času žyvie miž ZŠA, dzie atrymaŭ palityčny prytułak, i Varšavaj.
Pavodle sajtu pazniak.org
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk27
Kamientary