Natalla Piatkievič zaprašała Kramera ŭ kaviarniu

Pamočnik dziaržsakratara ZŠA Devid Kramer ź vizytam u Miensku: «ZŠA hatovyja palepšyć adnosiny ź Biełaruśsiu pry vykanańni niekalkich umovach. Kali hetaha nia budzie, adnosiny buduć dalej paharšacca».

U stalicy Biełarusi znachodzicca ź vizytam pamočnik dziaržsakratara ZŠA Devid Kramer. U sieradu jon sustreŭsia z pradstaŭnikami biełaruskich niedziaržaŭnych ŚMI. Toje, što sp.Kramer nie źbirajecca sustrakacca ź «dziaržaŭnymi žurnalistami», jon paviedamiŭ jašče ŭ Vašynhtonie pasłu Chvastovu.

Devid Kramer paviedamiŭ, što mieŭsia pryjechać u Biełaruś jašče raniej, ale ŭ jaho ŭźnikli prablemy z atrymańniem biełaruskaj vizy. «Mnie nie tłumačyli pryčyny i prosta admaŭlalisia vydavać vizu. Peŭna, im nia vielmi spadabaŭsia moj papiaredni vizyt», — žartavaŭ amerykaniec. Minuły vizyt Kramera ŭ Biełaruś pryjšoŭsia letaś na luty, akurat pierad prezydenckimi vybarami, jakija ZŠA nie pryznała lehitymnymi i demakratyčnymi.

Jak adznačyŭ, Devid Kramer hałoŭnym punktam jahonaha sioletniaha vizytu jość sproba palapšeńnia biełaruska‑amerykanskich adnosinaŭ. Kramer adznačyŭ, kali Biełaruś raźličvaje palepšyć adnosiny z Amerykaj, to jana pavinna vyzvalić absalutna ŭsich palitźniavolenych, spynić kryminalnyja spravy suprać apazycyjnych aktyvistaŭ (u pryvatnaści, jon adznačyŭ spravu «Maładoha frontu»), dać mahčymaść mirnaha praviadzieńnia «Čarnobylskaha šlachu», a taksama nie pieraškadžać u praviadzieńni Kanhresu demakratyčnych siłaŭ. Kali hetyja patrabavańni nia buduć vykananyja, to adnosiny z ZŠA mohuć stać jašče horšymi.

Na lahičnaje pytańnie žurnalistaŭ, kudy jašče horš, Devid Kramer skazaŭ, što adnosiny sapraŭdy kiepskija, ale «jašče jość kudy ruchacca». Mohuć być uviedzienyja vizavyja sankcyi suprać jašče bolšaha koła dziaržaŭnych čynoŭnikaŭ, a taksama ŭviedzienyja sankcyi suprać dziaržaŭnych pradpryjemstvaŭ. «Jość i inšyja varyjanty. Čytajcie «Akt ab demakratyi ŭ Biełarusi» tam skazana pra bolšaść ź ich», — adznačyŭ Kramer.

Razam z tym jon skazaŭ, što ŭ vypadku vykanańnia patrabavańniaŭ ZŠA biełaruskija pradpryjemstvy atrymajuć nieabmiežavanuju mahčymaść handlu z amerykanskimi pradpryjemstvami. «Mnohija amerykanskija handlovyja ahienctvy pa siońniašni dzień nia majuć mahčymaści pracavać u Biełarusi. Palapšeńnie adnosinaŭ pavialičyć mahčymaść kantaktaŭ pamiž Biełaruśsiu i ZŠA. Ad atrymanaha budzie vyhadna, jak amerykanskamu, tak i biełaruskamu narodu».

Učora sp.Kramer mieŭ sustrečy z pradstaŭnikami aficyjnaj ułady. Jon sustreŭsia ź ministram zamiežnych spravaŭ Siarhiejem Martynavym. Pa słovach Kramera, hetaja sustreča była nieabchodnaja dziela taho, «kab nie było nijakaj dvuchsensoŭnaści ŭ pazycyi ZŠA adnosna Biełarusi». Adnosna pytańnia, ci atrymaŭ pradstaŭnik Biełaha domu niejkija zapeŭnivańni z boku Martynava. Kramer skazaŭ, što pakul rana heta kamentavać. My nieadnarazova čuli z boku biełaruskaha boku, što ich adnosiny z Eŭropaj palapšajucca, ale my nia bačym kankretnych zruchaŭ».

Taksama Devid Kramer sustrakaŭsia z namieśnicaj kiraŭnika administracyi prezydenta Natallaj Piatkievič. Hetaja sustreča nie była zaplanavanaja, pra jaje asabista paprasiła spn.Piatkievič i prachodziła jana ŭ niefarmalnaj abstanoŭcy, u adnoj ź mienskich kaviarniaŭ. Kramer skazaŭ, što źmiest toj razmovy istotna ničym nie adroźnivaŭsia ad razmovy z Martynavym. Amerykaniec nie razhladaje hety momant, jak niejki nievialiki krok da mahčymaha dyjalohu. «Ameryka budzie čakać kankretnych krokaŭ», ‑‑ adznačyŭ jon.

Siońnia z ranicaj Devid Kramer mieŭ sustreču z pradstaŭnikami biełaruskaj apazycyi. Jon adznačyŭ, što za apošni hod ubačyŭ u šerahach apazycyi adzinstva, jakoje ŭvieś čas raście. Taksama Kramer adznačyŭ, što praviadzieńnie Kanhresu jość vielmi dobrym znakam.

Naprykancy pres‑kanferencyi pamočnik dziaržsakratara adznačyŭ, što Ameryka budzie vielmi zacikaŭlena sačyć za praviadzieńniem «Čarnobylskaha šlachu».

• 0
• 0
• 0
• 0
• 0
• 0
• 0
• 0