Šeście invalidaŭ-vazočnikaŭ da Administracyi prezydenta

5 traŭnia ŭ eŭrapiejskich krainach invalidy tradycyjna ładziać Dzień pratestu za roŭnyja pravy i suprać dyskryminacyi. Sioleta biełaruskija invalidy zładzili šeście ad płoščy Banhałor da Administracyi prezydenta.

Mitynh invalidaŭ-vazočnikaŭ na płoščy Banhałor pačaŭsia ŭ 11:00. Kala 60 jaho ŭdzielnikaŭ uchvalili zvarot da Alaksandra Łukašenki z zaklikam «spynić raspačatuju kampaniju hienacydu invalidaŭ». Udzielniki akcyi vystupajuć suprać uniasieńnia źmienaŭ u zakon «Ab sacyjalnaj abaronie invalidaŭ u Biełarusi». Jany pierakananyja, što vierahodnaje źmianieńnie zakonu pahoršyć stan invalidaŭ, «zrobić ich biespraŭnymi i biezabaronnymi».

U 11:45 invalidy-vazočniki pačali ruchacca da Administracyi prezydenta (vuł.Marksa, 38), kab pieradać zvarot, pryniaty na mitynhu. Častka ŭdzielnikaŭ mitynhu skiravałasia da Adminstracyi na svaich mašynach. U rajonie Kastryčnickaj płoščy DAI zablakavała hetyja mašyny i nie dazvalała padjechać da budynku.

Tym časam invalidy, jakija jechali da Administracyi na svaich vazkach, vyjechali na prajeznuju častku. Jany nie zmahli spuścicca ŭ padziemny pierachod la Kamaroŭskaha rynku, bo jon nie prystasavany dla vazkoŭ. Pobač nie było supracoŭnikaŭ DAI, kab pierakryć ruch transpartu. Invalidy nia mieli nijakaj symboliki — tolki nalepki na śpinach: čałaviek u invalidnym vazku, pierakreśleny nadpisam «dyskryminacyja». Milicyjanty papiaredzili invalidaŭ-vazočnikaŭ, što za ŭdzieł u niesankcyjanavanym šeści jany buduć administracyjna pakaranyja. Supracoŭniki MUS zahadali źjechać z prajeznaj častki praspekta Niezaležnaści na chodniki. Udzielniki šeścia padparadkavalisia.

A 13-j, na padjezdach da Administracyi, la cyrku, specnaz zablakavaŭ ich kalonu. Udzielnikam šeścia zahadali zvaročvać z praspektu Niezaležnaści. U dvarach susiednich budynkaŭ vidavočcy bačyli aŭtazaki j milicejskija mašyny. Ale praź dziesiać chvilinaŭ ruch invalidaŭ da Administracyi adnaviŭsia.

Nastupny raz specnaz spyniŭ invalidaŭ-vazočnikaŭ prosta la buynku Administracyi prezydenta. Tudy sama padjechała 3 mašyny ź milicyjaj. Specnazaŭcy kazali ŭdzielnikam šeścia, što siońnia — niepryjomny dzień, što heta režymny abjekt i znachodzicca tut zabaroniena.

Adnak paśla im było dazvolena pieradać petycyju. Čynoŭniki na čale z načalnikam pryjomnaj Piatrom Katuškinym paviedamili, što hatovyja pryniać 5 čałaviek. I tut paŭstała novaja prablema: udzielniki šeścia nie mahli patrapić u pryjomnuju Administracyi, bo dźviery pryjomnaj — vielmi vuzkija. Tudy nielha ŭjechać na vazku. Daviałosia vyklikać ślesara, kab adčyniŭ druhuju stvorku dźviarej. Tym časam Milicyja zabaraniła videazdymki la budynku Administracyi.

U pryjomnaj invalidy byli kala hadziny. U 14.55 jany pakinuli budynak.

Pavodle Radyjo Svaboda , uł.inf.

Pavialičyć

Pavialičyć

Pavialičyć

Fota Julii Daraškievič

• 0
• 0
• 0
• 0
• 0
• 0
• 0
• 0