Łukašenka pryznaje paharšeńnie stanu ekanomiki

Alaksandr Łukašenka adznačaje paharšeńnie pracy šerahu halin biełaruskaj ekanomiki. «Pakazčyki šerahu halin ekanomiki pahoršylisia. 8 paramietraŭ prahnozu nie vykananyja», — zajaviŭ biełaruski kiraŭnik u piatnicu na naradzie pa vynikach sacyjalna‑ekanamičnaha raźvićcia Biełarusi za pieršy kvartał.

U toj samy čas Łukašenka papiaredziŭ urad pra toje, što «naša ekanamičnaja palityka pavinna zachavać sacyjalnuju skiravanaść». «A toje, što va ŭradzie pačali razdavacca hałasy z nahody nieabchodnaści karektoŭki i źmianieńnia ekanamičnaha kursa, budziem ličyć heta pryvatnym mierkavańniem», — zajaviŭ A.Łukašenka.

Pa jaho słovach, da pytańniaŭ sacyjalna‑ekanamičnaha raźvićcia krainy nieabchodna padychodzić «uzvažana, pradumana, jak my i abiacali narodu». Łukašenka ličyć, što «prajšło dastatkova času, kab urad pazbaviŭsia ad šoku i razhublenaści».

Surjoznaje vyprabavańnie dla ŭsioj haspadarki krainy

Biełaruski kiraŭnik adznačyŭ, što «ciapierašni hod my pačali va ŭmovach rezkaha padvyšeńnia cenaŭ na enierharesursy, što stała surjoznym vyprabavańniem dla ŭsioj narodnaj haspadarki krainy». U suviazi z hetym A.Łukašenka patrabavaŭ ad premjer‑ministra Siarhieja Sidorskaha vykłaści płan dziejańniaŭ ŭrada «pa minimizacyi nastupstvaŭ padvyšeńnia cenaŭ na enierhanośbity».

A.Łukašenka vykazaŭ zakłapočanaść u suviazi z tym, što ŭ pieršym kvartale «pa biudžecie niedafinansavany šerah prahram». «Mahčyma, pieranapružyŭsia naš ministr finansaŭ?» — spytaŭ prezident.

Akramia taho, kiraŭnik dziaržavy padčas spravazdačy ŭrada maje namier spytać ab vykanańni daručeńniaŭ u śfiery enierhazachavańnia i enierhaefiektyŭnaści. Taksama A.Łukašenka pacikaviŭsia tym, «jak idzie pieraabstalavańnie našaha naftapierapracoŭčaha kompleksu, madernizacyja enierhietyčnaj sistemy, i jak vyhladaje situacyja ŭ ahrapramysłovym kompleksie?». «Mianie cikavić, jak našy tavaravytvorcy buduć kankuravać na ajčynnym rynku z napłyvam rasiejskich tavaraŭ u suviazi z padpisańniem pahadnieńnia z uradam Rasiei ab mierach pa raźvićci handlova‑ekanamičnaha supracoŭnictva. Jak mianie aryjentujuć, hetaje pytańnie chvaluje siońnia kiraŭnikoŭ biełaruskich pradpryjemstvaŭ», — zajaviŭ kiraŭnik respubliki. Pry hetym jon adznačyŭ: «Ja papiaredžvaŭ urad, što hetyja libieralnyja zamaški, jak u Rasiei, nam nieprydatnyja».

Barbiekiu nie subsidavać!

A.Łukašenka taksama patrabavaŭ ad urada rastłumačyć situacyju ŭ dačynieńni dalejšaha subsidavańnia realnaha siektara ekanomiki. «Naprošvajecca pytańnie: niaŭžo vy budziecie znoŭ prapanoŭvać ahulna padtrymlivać vytvorčaść barbiekiu, vizitoŭnic, fotaalbomaŭ i inšych padobnych tavaraŭ?» — spytaŭ kiraŭnik dziaržavy. «U nas što, prablema z barbiekiu?» — dadaŭ jon.

A Łukašenka taksama nahadaŭ u svaim daručeńni ŭradu zanieści prapanovy pa kampiensavańni strat ad padvyšeńnia cenaŭ na rasiejskija enierharesursy za košt pasłuh, jakija my robim Rasiei.

A.Łukašenka, akramia taho, čakaje ad urada i kiraŭnikoŭ abłaściej abhruntavanych prapanoŭ pa ekanomii biudžetnych srodkaŭ. «Jakija peŭnyja dziejańni vyznačajucca ŭ metach zabieśpiačeńnia stanoŭčaha salda ŭ źniešnim handli?» — zadaŭ pytańnie jon.

Biełaruski kiraŭnik taksama źviarnuŭ uvahu na žyllova‑kamunalnuju śfieru. «My pryniali nakont hetaha rašeńnie», — zajaviŭ A.Łukašenka, adznačyŭšy, što «ŭ hałovach asobnych słužboŭcaŭ jość dumki ab padvyšeńni taryfaŭ na žyllova‑kamunalnyja pasłuhi».

U cełym, jak zajaviŭ Łukašenka, jon maje namier pačuć ad urada «kanstruktyŭnaje razumieńnie situacyi».

• 0
• 0
• 0
• 0
• 0
• 0
• 0
• 0