№ 5 (162), 31 studzienia — 7 lutaha 2000 h.
BT vačyma biełarusa
NIEDAHAVORY I PIERAVAROTY
Rasčaravała novaja prahrama «Staličny hit», što vyjšła dva razy na miescy «Barchatnaha sezonu». Iznoŭ ulezła «Alfa-radyjo» u šyroki efir: u vyniku ŭsia kraina musiła tolki słuchać, jakaja heta fajnaja pieradača i jak jana ŭsim patrebnaja. I lubiać ža na BT ź ničoha vialikuju pieradaču raźdźmuć. Paŭhadziny (dyj z paŭtoram) u «Našym krai» raspaviadali pra biełaruski ŭdzieł u pieršaj suśvietnaj vystavie ŭ Londanie, 1851 h. Ažno dva tavary prapanoŭvałasia tady — les ź mienskaj huberni dy aviečaja voŭna z Horaŭ-Horak. Nie raspaviali čamuści, kudy toje hora-horackaje bahaćcie padziełasia, čamu zaraz ad znakamitych statkaŭ zastalisia adny vaŭnianyja švedry... Prahrama była zroblena dla prapahandy ŭdziełu Biełarusi ŭ Hanovery-2000, dzie dla paviljonaŭ krainy budzie 600 kv.m płoščy. Ale nie skazali, što heta, uličvajučy pamiery vystavy, paraŭnalna z dvuma tavarami ŭ siaredzinie minułaha stahodździa...
«Krok-2» adroźnivaŭsia praŭdzivaściu. Bajkiery zapeŭnivali, što milicyja ich nie haniała, moładź uvohule — što ŭsio ŭ nas kłasna. A na pytańnie, chto bolš spadabaŭsia: bajkiery, brejkiery ci tatuiroŭščyki, adna dzieŭčyna ščyra adkazała: «Spadabałasia, jak małady čałaviek raspranaŭsia».
Zatoje ŭ apošnim «Našym krai» hutarki ŭdzielnikaŭ pra žyćcio palakaŭ u Biełarusi vialisia na biełaruskaj i polskaj — bieź pierakładu! Raniej tolki z rasiejskaje nie pierakładali...
Z apošniaha dnia studzienia z efiru źnikajuć «Dobry viečar, Biełaruś!», «Biełaruski hit-parad», «Barchatny sezon», «Pa zapavietnych miaścinach». «Barchatu» tak i treba. «Dobry viečar», mahčyma, nie madernovaj i nia lepšaj prahramaj byŭ — ale razam ź im źnikajuć čaściakom narmalnyja siužety pra cikavyja padziei, a taksama parady Piatroviča dy «Kotki». I što ŭzamien? Dakumentalny ekran?! Nu, a «Hit-paradu» prosta škada, škada, škada.
Pad pahrozaj rasfarmavańnia jašče cełaja redakcyja — litaraturna-dramatyčnaja. «Revalucyja» na BT tłumačycca niedachopam srodkaŭ i rejtynhu — ale zachady dla jaho padvyšeńnia dy ekanomii niejkija dziŭnyja — źniknuć najbolš prystojnyja biełaruskamoŭnyja pieradačy. ATN ža zastajecca.
U 17.35 u piatnicu «Naš kraj» pra historyju Lelčycaŭ. (A jakaja ŭ tych Lelčyc historyja była? Niešta nie pryhadvajecca. Niaŭžo znoŭ pra zmahańnie ź biełahvardziejcami?) A 22-j u čaćvier — «Krok-2» pra moładzievuju muzyku. A ŭ piatnicu-subotu paŭtor Novaha hodu. I heta pravilna. Što jašče rabić, kab ničoha nie rabić?
Arciom Łukjanovič
Ciapier čytajuć
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk31
Kamientary