AB USIM PATROCHU

 AB USIM PATROCHU

sport

Pieramožcy z-nad Prypiaci

Mazyrskaja «Słavija» za try tury da zakančeńnia čempijanatu Biełarusi pa futbole stanovicca ŭładalnicaj załatych medaloŭ

Ad samaha pačatku sezonu akreślilisia dźvie zajaŭki na čempijonstva – ad mienskaha «Dynama» dy mazyrskaj «Słavii».

Uviesnu mienčuki apiaredžvali «Słaviju». Uletku, paśla adjezdu ŭ kiprskuju «Sałaminu» hałoŭnaha «zabivały» mienčukoŭ — Alaksandra Viaževiča – ichnyja spravy pajšli horaj… «Słavija» pačała adryvacca ad supiernikaŭ. I tut – dziŭnaja metamarfoza la šturvału mazyrskaha klubu. Kamanda idzie ŭ pieršym radku turnirnaj tablicy, nia maje nivodnaj parazy, i raptam — źmiena hałoŭnaha trenera. Zamiest Alaksandra Kuźniacova la rula «Słavii» staŭ juhasłaŭ Ułada Petravič, jaki dapamahaŭ Vujadzinu Božkavu rychtavać zbornuju Juhasłavii da EURO'2000. Adrazu ž sa źmienaj rulavoha «Słavija» pačała hublać ački, i ŭ apošnim tury pieršaha kruhu doma sastupiła 0:1 mienskim «dynamaŭcam», jakija ŭžo dychali mazyrčukam u śpinu…

Adnak, vidać, u pierapynku miž fazami čempijanatu juhasłaŭski trener znajšoŭ parazumieńnie z kamandaj. «Słavija» nie davała mienčukam šancaŭ nablizicca da siabie, zdabyvajučy pieramohu za pieramohaj.

19 kastryčnika. 27-y tur čempijanatu. Mienskaje «Dynama» jedzie na hulniu ŭ Barysaŭ da letašniaha pieramožcy pieršynstva – «BATE», jaki zaraz na treciaj pazycyi. Vielmi ciažkaja hulnia, uličvajučy stanoŭčy dla barysaŭcaŭ balans apošnich hulniaŭ pamiž supiernikami. «Słavija» doma maje tolki adno pytańnie ŭ sustrečy ź «Lidaj»: kolki zakacić biednamu aŭtsajderu sa stalicy biełaruskaha pivavarstva?.. I sapraŭdy: u toj hulni na bierahoch Prypiaci ŭ haspadaroŭ nie było prablemaŭ — 5:0! Prablemy byli ŭ mienskaha «Dynama» ŭ Barysavie. «BATE» vyrašyŭ dapamahčy «Słavii» dy zaadno pakinuć sabie šaniec na srebra – 3:1 – viktoryja «žoŭta-sinich», jakoj bolš radavalisia nie ŭ Barysavie, a ŭ Mazyry. «Słavija» stała niedasiahalnaj dla «Dynama». Mazyrčuki robiać u hetym sezonie dubl – da vyjhranaha Kubku Biełarusi dadajecca ciapier pieršaje miesca ŭ čempijanacie. A mienčukam jašče treba abaranić svajo srebra: «BATE» nia tracić nadziei vyrvacca na finišnaj pramoj z-za śpiny družyny Paŭła Radnionka dy ŭskočyć u druhi vahon biełaruskaha futbolnaha ciahnika.

Bohuś Bijatlanionak

DziaržUrnaList

Tavaryš Jekiel, staršynia Biełaruskaha sajuzu žurnalistaŭ, napiaredadni čarhovaha źjezdu svajoj arhanizacyi daŭ interviju BiełTA, dzie zajaviŭ, što "žurnalisty pavinny słužyć intaresam dziaržavy, u hetyja nialohkija časy stanaŭleńnia biełaruskaj dziaržaŭnaści i novaj ekanomiki pracavać na stvareńnie, a nie na razbureńnie, jak heta robiać pradstaŭniki vydańniaŭ, jakija nazyvajuć siabie niezaležnymi".

Kali b nie apošnija słovy, dyk možna było zasumniavacca: a mo hetaja staraja cytata z taho, što Leanid Jekiel kazaŭ u brežnieŭskija časy, kali było "ŭsio dla čałavieka, usio ŭ imia čałavieka", dy ŭsie viedali hetaha čałavieka.

Niečakana tav.Jekiela padtrymaŭ tavaryš Łukašenka. U vinšavańni dziasiatamu źjezdu dziaržurnalistaŭ jon napisaŭ: "Na žal, usio čaściej prajaŭlajecca tryvožnaja tendencyja sučasnaści - adychod ad čałavieka. Tak zdarajecca, što na złomie epochaŭ adbyvajecca pieraacenka duchoŭnaje spadčyny, padviarhajecca sumnieńniu toje, što źjaŭlajecca ŭnikalnym nabytkam nacyi".

Chto ŭ nas unikalny nabytak nacyi, napeŭna, taksama ŭsie viedajuć. Tamu, tavaryšy dziaržaŭnyja UrnaListy, trymajciesia jaho, nie adychodźcie!

Źmicier Kalaradzki

Dy-džei Adradžeńnia

16 kastryčnika ŭ Miensku startavali Trecija kursy dy-džejaŭ Adradžeńnia. Padrychtoŭku ŭniversalnych specyjalistaŭ u sfery šoŭ, PR, infarmacyjnych technalohijaŭ, kreatyvu j hramadzkaha liderstva siarod padletkaŭ i moładzi ažyćciaŭlajuć ciaham 3-ch miesiacaŭ na paniadziełkavych seminarach trenery z Maładoha Frontu, “Maładoha Adradžeńnia” i ZBM “Eŭrapiejski šlach”.

Rejtynhi, vyprabavańni, admysłovyja zadańni j interaktyŭny režym zaniatkaŭ dazvalajuć vyłučyć siarod udzielnikaŭ hrupu lepšych, jakija ŭ vyniku j atrymlivajuć admysłovyja sertyfikaty DJ Adradžeńnia, perspektyvu pracy ŭ hramadzkim sektary Biełarusi j mahčymaść palityčnaje karjery.

Pieršyja dva vypuski “duchovaha specnazu”, jak nazyvajuć DJ-jaŭ sami arhanizatary prajektu, stalisia sapraŭdnym furoram u biełaruskim moładzievym ruchu. U liku dyplamavanych DJ-jaŭ Adradžeńnia apynulisia i vunderkindy-prahramajstry, i palihloty, i pieramožcy respublikanskich vučnioŭskich alimpijadaŭ, i talenavityja maładyja mastaki, muzyki, žurnalisty. Siońnia pałova DJ-jaŭ — u kiraŭnictvie Maładoha Frontu j šerahu hramadzkich inicyjatyvaŭ.

Uvachod na kursy volny. Kantaktnyja telefony: 245-97-54, 284-50-12 (Pavał).

Małady Front

Majsterstva troch Instrumentaŭ

Pazaŭčora ŭ Miensku ładziłasia pieršaje nacyjanalnaje śviata-konkurs vycinanki “Ažurnyja fantazii”. Usiaho na festyval pryjechali 45 čałaviek, najbolš ź Viciebščyny j Mienščyny. Na festyvali prysutničali j “veterany” vycinanki, siarod jakich Viačasłaŭ Dubinka – jon razdavaŭ paśladoŭnikam aŭtohrafy na vydadzienym hetymi dniami šykoŭnym albomie svaich najlepšych rabot.

Pa zakančeńni konkursu prafesijanałaŭ adbyłosia spabornictva amataraŭ, što davodzić – vycinańnikam moža stać kožny, dla heta patrebny ŭsiaho tolki try instrumenty — papiera, nažnicy j fantazija.

Viktar Muchin