Z usioj krainy

Z usioj krainy

Pahroza ratavirusu

“NN” paviedamlała pra ŭspyšku virusnaje infekcyi nieviadomaha pachodžańnia ŭ Mahilovie, dzie ad jaje paciarpieli 250 dziaciej. I voś vypadak analahičnaha zachvorvańnia zafiksavany ŭ Zasłaŭi, paviedamlaje naš karespandent. U dziciaci trymajecca vysokaja temperatura, jaho vanitavała. Daktary miarkujuć, što dzicia mahło zarazicca ad baćkoŭ, u arhaniźmie jakich mieŭsia hety nieviadomy virus, ale nijak nie prajaŭlaŭsia. Zasłaŭskija daktary rajać hetymi dniami pilniej sačyć za asabistaj hihijenaj.

“Połymia” ledź kureje

№3—4 časopisu “Połymia” vyjdzie zdvojenym, jak i №5—6. Aŭtaram časopisu hanararaŭ nie płacili ad vieraśnia minułaha hodu.

B.T.

Novyja siabry AHP

Michaił Čyhir i Pavał Kazłoŭski ŭstupili ŭ rady Abjadnanaj hramadzianskaj partyi. U AHP pačynajecca “praces hurtavańnia prafesijanałaŭ”, kanstatavaŭ lider partyi Anatol Labiedźka. Treba adznačyć, što Kazłoŭski ŭstupaje ŭ AHP užo nia pieršy raz.

Sprava spyniena

Sud Centralnaha rajonu Miensku spyniŭ kryminalnuju spravu ŭ dačynieńni da namieśnika načalnika mienskaj milicyi hramadzkaj biaśpieki Viktara Rusaka i byłoha načalnika adździełu masavych mierapryjemstvaŭ Michaiła Kandracina (ciapier pracuje ŭ Akademii milicyi) pa spravie trahiedyi na “Niamizie” ŭ traŭni 1999-ha. Spravu zakryli ŭ suviazi sa skančeńniem terminu daŭnaści. Svajaki achviaraŭ aburanyja hetym rašeńniem.

Źmieny ŭ Instytucie sacyjalohii

Instytut sacyjalohii pieratvorany ŭ Instytut sacyjalohii i sacyjalnych technalohij. Jaho dyrektaram pryznačany rasiejski doktar sacyjalna-ekanamičnych navuk Hieorhij Javielkin, jaki dva hady vykonvaŭ abaviazki dyrektara. Zamiest raniejšych siami navukovych adździełaŭ u instytucie buduć dva adździeły i dva centry.

B.T.

Prablemy ŭ “Biełavija”

Tolki čatyry samaloty Tu-154M nacyjanalnaha avijaparku adpaviadajuć patrabavańniam Mižnarodnaj arhanizacyi cyvilnaj avijacyi (ICAO) pavodle ŭzroŭniu šumoŭ i ekalahičnaj biaśpieki, jakija nabyli siłu z 1 krasavika. Ciapier “Biełavii” daviadziecca ščylniej supracoŭničać z zamiežnymi avijakampanijami (najpierš rasiejskimi dy polskimi), jakija majuć “Boinhi”, “Aerobusy” dy inšyja sučasnyja samaloty. Heta paciahnie za saboj pavyšeńnie cenaŭ na bilety. I choć Vadzim Mielnik, pieršy namieśnik kiraŭnika Dziaržkamavijacyi, vykazaŭsia za nabyćcio amerykanskich samalotaŭ, nieviadoma, ci padtrymaje jaho ŭrad, jaki addaje pieravahu rasiejskim avijavytvorcam.

Perspektyvy “Ždanovič”

Na ŭniversalnym rynku “Ždanovičy” ŭ Miensku viadziecca budaŭnictva šaścipaviarchovaha hipermarkietu handlovaj płoščaj kala 25 tys. m2. U jaho skład uvojduć aŭtastajanka, vialiki praduktovy adździeł, niekalki adździełaŭ pa prodažy pramysłovych tavaraŭ, adzieńnia, pobytavaj techniki, a taksama paviljon mebli. Miarkujecca, što ŭładalniki handlovych miescaŭ na adkrytym rečavym i zakrytym praduktovym rynkach buduć pierajaždžać u hipermarkiet tolki pa žadańni. Zbudavać jaho majuć za dva hady. A ŭžo ŭ traŭni ŭ “Ždanovičach” budzie ŭviedzienaja ŭ ekspluatacyju druhaja krama adzieńnia “Śviet mody-2”. Uletku pačniecca budaŭnictva “Śvietu mody-3”. U perspektyvie ŭsie budynki musiać utvaryć adziny kompleks.

B.T.

BUDAVAĆ PRYVATNYJA DAMY ŭ miežach Miensku ciapier nielha. Ale rekanstrukcyju pryvatnaha sektaru nichto zabaraniać nia budzie, bo niama hrošaj na znos.

PIERŠY BIEŁARUSKI SUCHAHRUZ klasu “raka-mora” dabudujuć u krasaviku. Z pačatkam navihacyi jon budzie chadzić pa Dniapry ŭ party Čornaha mora. Pieravozić im miarkujuć pradukcyju “Biełaruśkaliju”.

MAROZAŬSTOJLIVUJU CEHŁU pačali vyrablać na Mienskim zavodzie budmateryjałaŭ. Jana nie raskryšycca za 60 hadoŭ i kaštuje ŭ 4 razy tańniej za zamiežnyja analahi.

CENY NA KVITKI ŭ mižharodnych aŭtobusach padvysilisia na 25%. U pryharadnych — skoknuli adrazu ŭ paŭtara razu.

NA 10% PADARAŽEJE TELEFON u krasaviku. Tłumačycca heta małym prybytkam “Biełtelekamu” — z pačatku hodu jon skłaŭ usiaho 1,7 młn. dalaraŭ.

KANTRABANDA CYHARETAŬ z Ukrainy i Rasiei za studzień-sakavik źmienšyła dachod biudžetu ad akcyzaŭ na impartnyja cyharety na 60% (700 tys. dalaraŭ).

KALA 1000 KRAMAŬ źlikvidavana z pačatku hodu ŭ nievialikich vioskach — ciapier ich absłuhoŭvajuć aŭtakramy. Letaś straty ad handlu ŭ vioskach skłali za 7 młn. dalaraŭ.

40 DROBNYCH MAŁAKAZAVODAŬ buduć začynienyja. Siońnia jany jość amal u kožnym rajonie, adnak pracujuć tolki napaŭsiły, bo pradukcyja zanadta darahaja i nia maje popytu. Za minuły hod niepradadzienyja zapasy masła pavialičylisia na 22%, syru — udvaja, a małočnych kanservaŭ — u 4 razy.

RADOVIŠČY NAFTY na 400 tys. tonaŭ znajšli biełaruskija hieolahi letaś. Heta prykładna 1/27 častka ad hadavoj patreby krainy.

KREDYTY NA 40 MŁN. DALARAŬ pavinny vydatkavać banki sielskaj haspadarcy na siaŭbu. Ci nie pałova kałhasaŭ i saŭhasaŭ dahetul nie spłaciła letašnich pazykaŭ, a tamu nia moža atrymać novych. U “Biełnaftachimie” kažuć, što sioleta paliva na zapraŭkach kolki chočaš, ale pradavać jaho buduć tolki tym, chto ŭ stanie zapłacić hrašyma.

PRYVATYZUJECCA Mahiloŭski zavod štučnaha vałakna. Sami mahiloŭcy chočuć, kab jaho kupili švajcarcy — kampanija “United Technology Corporation”. Kantrolny pakiet akcyjaŭ zastaniecca ŭ dziaržavy. Łukašenka padčas naviedańnia pradpryjemstva rezka raskrytykavaŭ jaho menedžeraŭ, bo, abchodziačy pamiaškańni, pabačyŭ pacukoŭ. “Pałovicie ščuroŭ — tady prychodźcie”, — złosna zajaviŭ jon dyrektaru.

NOVY “Mižnarodny rezervovy bank” stvorany ŭ volnaj ekanamičnaj zonie “Miensk”. Jaho zasnavali niekalki švajcarskich i rasiejskich firmaŭ. Napačatku jon budzie pracavać tolki z pradpryjemstvami.

Siaržuk Ivanoŭski