Sioleta ź 1 lipienia ZAT «Staličnaje telebačańnie» pačnie atrymlivać subsydyi ź dziaržbiudžetu. Pamier hrašovaj dapamohi budzie roŭny padatkam na prybytak i dadanuju vartaść, jakija STV musić spłačvać, zajmajučysia reklamaj dy pradprymalnickaj dziejnaściu. Faktyčna telekanał na try hady vyzvaleny ad hałoŭnych padatkaŭ.
| STV |
Zhodna z ukazam, subsydyi pavinny vykarystoŭvacca vyklučna na palapšeńnie pracy STV, stvareńnie j raźvićcio jaho vytvorčaje bazy. Nahladać za tym, kab kiraŭnictva telekanału vydatkoŭvała hrošy pavodle pryznačeńnia, budzie Ministerstva infarmacyi.
Letaś 19 lipienia była pryniataja takaja samaja pastanova pra viartańnie padatkaŭ na dadanuju vartaść dy prybytak telekanału ANT. Čamu telekanałam nie dazvolili prosta nie płacić padatkaŭ? Kab kantralavać hrošy. ANT dy STV musiać spačatku całkam vypłačvać sumy padatkaŭ, potym inspekcyja Ministerstva pa padatkach dy zborach u 5-dzionny termin pieravodzić tyja hrošy na rachunki telekanałaŭ u raździeł «metavyja finansavyja pastupleńni». STV dy ANT pavinny zaličać atrymanyja srodki ŭ svaje fondy raźvićcia. Kali b telekanały prosta nie płacili padatkaŭ, nielha było b adsačyć, na što jany vydatkavali srodki.
Sioletnija prybytki ad reklamnaj dy kamercyjnaj dziejnaści telekanału musiać skłaści bolš za 2,8 młrd. rubloŭ. 144 i 477 młn. rubloŭ — prykładnyja sumy, jakija kanał aščadzić na padatkach. Za try hady atrymlivajecca ekanomija amal na miljon dalaraŭ. I heta tolki padlik pa minimumie: kali STV udała madernizujecca dy pašyryć aŭdytoryju, prybytki ad reklamy ŭzrastuć.
Letaś u traŭni STV pačała tranślavacca na Mienskuju vobłaść na častacie rasiejskaha kanału «Kultura» praź pieradatčyki ŭ Miadziele dy Salihorsku. Alaksandar Zimoŭski, hieneralny dyrektar «Staličnaha telebačańnia», maje namier pašyryć viaščańnie na ŭsiu krainu. Hrošy jość.
U Biełarusi pačynajecca era miascovaha telebačańnia.
Aleś Kudrycki
Kamientary