Vybary ŭ akruzie z zaparkam

Pa Taškienckaj vybarčaj akruzie №5 zarehistravanyja čatyry kandydaty ŭ deputaty Mienharsavietu. Dvoje ad palityčnych partyjaŭ: vykładčyk Humanitarnaha liceju Alaksiej Janukievič, siabra BNF (vyłučany zboram podpisaŭ), i inžynerka Halina Suvorava — ŁDPB. Pracoŭnyja kalektyvy Mienskaha aŭtazavodu i kamandna-inžynernaha instytutu MNS vyłučyli svaich supracoŭnikaŭ Alaksandra Ažhireja (taksama zboram podpisaŭ) i Ŭładzimiera Vierabjova adpaviedna.

Ja naradziŭsia tut

Na Varvašeni, 8 zaŭsiody vietliva sustrakajuć kožnaha. Što praŭda, harbatu prapanujuć abranym — na ŭsich nia chopić. Sieviaryniec šparka chodzić pa pakojach i vitaje za ruku ŭsich, kaho bačyć; Viačorka strymana kivaje hałavoj tolki znajomym; tudy-siudy snoŭdaje moładź, abmiarkoŭvajučy spartovyja naviny, — karaciej, uviečary tut žyćcio viruje.

Hałoŭnym kozyram svajoj vybarčaj kampanii Janukievič ličyć «vialikuju kolkaść siabroŭ». Navat na ŭlotkach Janukieviča pobač z banalnym «Čyžoŭka budzie lepšaj» staić lozunh-vysłoŭje «Ja naradziŭsia tut i budu žyć tut». Alaksiej i sapraŭdy naradziŭsia j žyvie ŭ svajoj Taškienckaj akruzie, na vulicy Ŭbareviča. Nivodzin ź jahonych kankurentaŭ hetym pachvalicca nia moža. Tut žyvuć usie Alaksiejevy adnakašniki, mnohija ŭžo majuć siemji. Musić, tamu davoli chutka za jaho byli sabranyja ažno 503 podpisy (dla rehistracyi patrebna 150). «U majoj kamandzie mnoha dziaŭčat — a jany ahitavać umiejuć!»

Aryjentujecca Janukievič na vybarnika 25—50 hadoŭ, čałavieka adukavanaha i siamiejnaha, choć u svajoj prahramie namahajecca zakranuć usich. Jaje asnoŭnyja tezy: hrošy z haradzkoha biudžetu pavinny vydatkoŭvacca tolki na ŭsieahulnyja patreby, kramy rajonu musiać być zabiaśpiečanyja tavarami, vulicy — dobra aśvietlenyja, škoły dy palikliniki — dahledžanyja.

Upeŭnienaść i metanakiravanaść Alaksieja daspadoby jahonym susiedziam. Adna kabieta ź jahonaha domu skazała mnie: «Jon choć i z BNF, ale tałkovy».

Viedali Janukieviča i padletki, jakich ja sustreŭ blizu SŠ №43 (jaje ŭ 1993 h. skončyŭ kandydat). «Varta pichać va ŭsie hetyja saviety i pałaty maładych dy svaich, mo viesialej budzie», — kažuć jany z hetym typovym niaŭmieńniem pahladzieć surazmoŭcu ŭ vočy.

Treci raz za rodny MAZ

Pavialičyć

Pryniaŭ Ažhirej mianie ŭ svaim kabiniecie. Na pytańnie, kolki ŭ nas času na razmovu, «bos» kinuŭ: čym mieniej, tym lepiej. Paśla doŭhaje dyskusii pra «apazycyjnuju» presu, narešcie ŭdałosia zadać pytańnie nakont vybaraŭ. Ale nijakaj infarmacyi spadar Alaksandar davać nie źbiraŭsia: «Lipavaja vašaja niva, a Janukievič nie saśpieŭ na deputata jašče». Voś i pahutaryli...

Ažhirej balatujecca treci raz, dahetul nie šancavała. Hałoŭnaje jahonaje apiryšča — pracaŭniki MAZu, što žyvuć u Taškienckaj akruzie. Palapšeńnie ich dabrabytu sp.Alaksandar ličyć svajoj hałoŭnaj metaj. Kozyry Ažhireja — vialiki dośvied i, jak jon kaža, «padrychtavanaść». Niekali sp.Alaksandar pracavaŭ staršyniom dziaržplanu ŭ Mienharvykankamie, tamu dobra viedaje ekanamičnuju systemu horadu.

Ažhirej — kandydat staroj farmacyi. Hetki typovy čynoŭnik, jaki mnohaje niedahavorvaje, na pytańni adkazvaje dvuchsensoŭna i niapeŭna, ale zaŭsiody viedaje, što robić i što z hetaha vyjdzie. Prahramu dy inšyja pieradvybarnyja materyjały kandydat pakazać admoviŭsia, skazaŭšy pry hetym, što ciapier dla jaho hałoŭnaja prablema — «kab zavod nia staŭ».

Ekanamičnyja padvažniki

U kamandna-inžynernym instytucie MNS režym strohi. Kab dajści da kabinetu načalnika, treba minuć dziažurnaha, prachadnuju dy kamandzira, jaki ŭvažliva razhledzić tvaje dakumenty. Ale zaśpieć Uładzimiera Vierabjova na miescy nie ŭdałosia. Pracoŭny hrafik u jaho vielmi ščylny, da taho ž instytut ahladała delehacyja z Polščy. Pa telefonie spadar Uładzimier skazaŭ: «Vy tolki nie padumajcie, što ja paźbiahaju sustrečy, sapraŭdy hety i nastupny tydzień buduć vielmi napružanymi». Naŭzamien Vierabjoŭ prapanavaŭ navat vysłać pa mianie mašynu, kab daviezła na Mašynabudaŭnikoŭ, 25, dzie mieścicca instytut. Jechać druhi raz na ŭskrainu Miensku vialikaha žadańnia nie było, tamu ciaham 30 chvilinaŭ my hutaryli pa telefonie.

«Možacie napisać, što ja samy stary kandydat», — žartavaŭ Vierabjoŭ. Jamu 58 hadoŭ — na hod starejšy za Ažhireja. Sp.Uładzimier słužyŭ na Cichaakijanskim flocie, pracavaŭ u Akademii navuk, paśla — u pažarnickim padraździaleńni. Instytut ačolvaje ź pieršaha dnia jahonaha isnavańnia. Doŭhija hady «načalnictva» jaho nie sapsavali — na taktoŭnaść nie zabyvajecca. Adno tolki spytaŭ, ci nie źbirajusia ja vykarystać jaho dla «reklamavańnia» Janukieviča. Elektaratam svaim Vierabjoŭ ličyć biudžetnikaŭ — nastaŭnikaŭ, daktaroŭ i pensijaneraŭ. Jon spadziajecca, što zdoleje naładzić choć adrasnuju dapamohu tym, kamu jana nieabchodnaja. Nie zabyvajecca načalnik i na moładź: «U instytucie my ŭžo adkryli kolki spartovych sekcyj, dzie zajmajucca padletki». Nieabyjakavy jamu i vyhlad rajonu: «Vy pahladzicie na hetyja damy: «chruščoŭki» pieratvarylisia ŭ «chruščoby», a jak pafarbavanyja šmatpaviarchoviki...» Vierabjoŭ źbirajecca kantralavać ramontnyja raboty ŭ svajoj akruzie. Jon «abydziecca biez palityki» i budzie vykarystoŭvać u ahitacyi dyj u mahčymaj deputackaj dziejnaści ekanamičnyja ryčahi.

Paradak va ŭsim

Znajści kandydatku ad ŁDPB Halinu Suvoravu było najskładaniej. U štabie partyi telefon maŭčyć, a pracuje spadarynia Halina za miežami Miensku — inžynerkaj na dośledna-mechaničnym zavodzie «Ahratechmaš». Ale pahutaryć usio ž atrymałasia. Hałoŭnym čynam kandydatku niepakojać prablemy biespracoŭja, bo sama z hetym niekali sutyknułasia: «Maładyja nia mohuć uładkavacca, bo patrebny staž, a daśviedčanyja ludzi ŭžo ličacca starymi».

Nievykanalnych abiacańniaŭ vybarcam davać jana nia choča: «Pahladzicie, jakija kapiejki atrymlivaje budučaja maci, što sychodzić u dekret. Pakul ja mahu chiba paspačuvać joj». Što ŭ Rasiei, naprykład, «budučyja maci» atrymlivajuć jašče mienš, čym u Biełarusi, kandydatka nia viedała.

Taksama vyklikaje abureńnie ŭ kandydatki masavaja zabudova terytoryi cerkvami, choć suprać relihii jana ničoha nia maje: «Nu što tut kazać, kali znosiać dziciačuju placoŭku, a zamiest jaje buduć čarhovuju carkvu?»

Palityčny dośvied Suvorava maje — pracavała ŭ vybarčych kamisijach. Tamu razumieje, što šancy nie va ŭsich roŭnyja, — «pieramahajuć tyja, u kaho jość hrošy». Na maju prośbu dasłać elektronnaj poštaj ahitacyjnyja materyjały jana adkazała, što na kamputar jašče nie zarabiła.

Kandydatka havoryć, što aryjentujecca na žančynaŭ. Jaje lozunhi vielmi emacyjnyja: «Paradak va ŭsim! Čynoŭniki pavinny adpracoŭvać svoj čas, dvorniki — mieści vulicy, a zavody — pracavać! Kali hetaha nia budzie, to niechta pavinien adkazać za heta! I adkaža!»

Kali viarstaŭsia numar, stała viadoma, što Vierabjoŭ źniaŭ svaju kandydaturu. «Biespartyjnaha» kandydata nia stała, zatoje stała jasna, chto ź «biespartyjnych» idzie ad partyi ŭłady.

Chto ž pieramoža ŭ Čyžoŭcy? Hałoŭny vorah usich pretendentaŭ — nizkaja aktyŭnaść vybarcaŭ u hetym adnym z najbiadniejšych rajonaŭ stalicy. Papiarednija vybary tut adbyvalisia nie zaŭsiody. Dva kandydaty ad palityčnych partyj — Janukievič i Suvorava — padzielać hałasy niezadavolenych.

Kvartpłata raście kaśmičnymi tempami. Kab zrabić analiz kryvi, treba vystajać hadzinnuju čarhu ŭ paliklinicy. Kab zarehistravać svoj biznes, prychodzicca miesiacami chadzić pa kabinetach. «Kišennyja» deputaty papiarednich sklikańniaŭ abmiažoŭvalisia pasłuchmianym adabreńniem rašeńniaŭ ułady i drobnym «prabivańniem» intaresaŭ svajoj «firmy» — zavodu ci kantory. Ludziam ad ich nie było ni počutu, ni tołku. Nia dziva, što vybarcy i staviacca da miascovych vybaraŭ abyjakava. Nia dziva i što moładź kandydatam staroj farmacyi nie daviaraje.

Siarhiej Budkin, Čyžoŭka

• 0
• 0
• 0
• 0
• 0
• 0
• 0
• 0