Buš i Boh

Dzień u Biełym domie pačynajecca zvyčajna z čytańnia Biblii. Haspadar zaachvočvaje svaich supracoŭnikaŭ šukać novych siłaŭ u Śviatym Piśmie. Sam Džordž Buš štodnia vyvučaje Bibliju i molicca. Pasiadžeńni ŭradu taksama pačynajucca z malitvy.

Antonimy: Klintan—Buš

Bił Klintan zapomniŭsia Amerycy jak bliskučy, ale niesurjozny śviecki leŭ, jakomu paščaściła kiravać krainaj u epochu biesprecedentnaha ekanamičnaha rostu i ŭpeŭnienaści ŭ budučyni. Ale Klintan i jahonaja kamanda zasłužyli admoŭnuju maralna-etyčnuju acenku, pryčym nia tolki siarod chryścijanskaj pravicy i ŭltrakanservataraŭ.

Heta źviazana jak z spravaj Moniki Levinski, tak i z sumnieŭnymi majomasnymi hiešeftami Klintana, jašče kali toj byŭ hubernataram Arkanzasu. Vielmi mnohich aburyła i toje, što Bieły dom u 1992—2000 h. staŭsia karčmoj, dzie zadarma “na noč” spynialisia clintonians — ulubioncy prezydenta, jahonyja partajhienose i patencyjnyja fundatary Demakratyčnaj partyi. Nie dadaŭ sabie Klintan papularnaści j prychvatyzacyjaj dziaržaŭnaj mebli. U 2000 h., vyjaždžajučy ź Biełaha domu, jon vyviez kala 200 pradmietaŭ.

Buš zusim nie taki. Jahony štab dyscyplinavany nia mienš za samoha prezydenta. Apošni ž, u paraŭnańni z svaim samaŭpeŭnienym i samazakachanym papiarednikam, zdajecca ŭzoram ścipłaści j blizkaści da narodu. Buš dahetul zastaŭsia “svaim mužykom”. Jon karystajecca kožnaj mahčymaściu, kab uciačy z Vašynhtonu ŭ svoj techaski falvarak. Tamu navat u anarchisckim Techasie, dzie nia duža lubiać staličnych razumnikaŭ, rejtynh Buša-małodšaha raście. Praŭda, za miažoj vobraz “fanaberystaha kaŭboja” vyklikaje antyamerykanskija pačućci.

“Što zrabiŭ by Isus?”

Sapraŭdy, u Bušavym charaktary jość krychu fanaberyi. Jon pachodzić z upłyvovaj siamji z Kanektykutu (heta taki sabie “elitny” štat). Bušy pasyłajuć svaich dziaciej tolki ŭ “pravilnyja” pryvatnyja škoły dy ŭniversytety, kštałtu Jielskaha i Harvardzkaha.

U hetaj siamji Džordž-małodšy koliś byŭ “brydkim kačaniom”. Paliŭ, mieŭ vialikija prablemy z alkaholem dy mnostva inšych zahanaŭ. Žyćcio Džordža źmianiła naviartańnie ŭ metadysty (adna z pratestanckich płyniaŭ, kštałtu baptystaŭ), jakoje adbyłosia ŭ 1985 h. Z Abjadnanaj metadysckaj carkvoj jon zbliziŭsia dziakujučy žoncy Łaŭry. Achryściŭšy bliźniatak Barbaru i Džynu, Buš aficyjna pierajšoŭ u metadysty. Amerykanski prezydent raspaviadaje pra svaju sustreču z charyzmatyčnym prapaviednikam Bili Hrehiemam (ciapier jon — siabra siamji Bušaŭ): “Ja niejak pravioŭ vychodnyja ź vialikim Bili Hrehiemam. U vyniku našych hutarak i jahonaha ŭpłyvu, ja znajšoŭ u svaim sercy Isusa Chrysta i addaŭ jamu svajo žyćcio”.

Vynikam naviartańnia stała admova ad alkaholu i tytuniu dy suvoraja pracoŭnaja j žyćciovaja dyscyplina. U hety paniatak uvachodziać jak bieh z himnastykaj, tak i štodzionnaje vyvučeńnie Biblii dy malitva. I, naturalna, — pierakananaść u svajoj dałučanaści da vialikaj misii. Buš dziejničaje pavodle pryncypu: “Što zrabiŭ by na maim miescy Isus?”

Śviatary ŭ daradcach

Padčas svajho hubernatarstva ŭ 1994—2000 h. i ŭ pačatku prezydenctva, Buš imknuŭsia ažyćciavić prahramu “dabračynnaha kanservatyzmu”. Śpičrajtar prezydenta Majkł Hiersan charaktaryzuje jaje jak sacyjalna skiravanuju palityku, što abapirajecca na tradycyjnuju maral.

Ale nie realizacyja hetaje prahramy stałasia asnoŭnym sensam Bušavaha prezydenctva. Hałoŭnaja zadača akreśliłasia paśla teraktaŭ 11 vieraśnia. U pieršyja dni paśla ataki pobač z Bušam byli nia tolki palityčnyja daradcy, ale j prapaviednik Bili Hrehiem dy preśviter “rodnaje” carkvy prezydenta Džym Mejfajłd.

U časie pieradvybarnaha teledvuboju z svaim supiernikam Horam Buš nazvaŭ lubimym palityčnym filozafam Isusa Chrysta. Eŭrapiejcaŭ heta chiba naśmiašyła b. Ale ŭ relihijnaj Amerycy, dzie, pavodle apošnich apytańniaŭ, 2/3 ludziej vierać u isnavańnie čartoŭ, takoje pryznańnie ŭchvalenaje balšynioj i apraŭdanaje z maralnaha j intelektualnaha punktu hledžańnia.

Ź impetam misijanera

Viestka pra terakt 11 vieraśnia zaśpieła Buša ŭ adnoj flarydzkaj škołcy. Siadajučy ŭ samalot, prezydent abvieściŭ: “My na vajnie”. Padčas žałobnaj imšy ŭ Vašynhtonskaj Katedry praz try dni, jon dadaŭ: “Ja čałaviek lubovi, ale mušu vykonvać uskładzienyja na mianie abaviazki, i ja budu heta rabić”.

Jak sumiaścić chryścijanski zapaviet lubovi j abaviazki kiraŭnika zvyšdziaržavy? Prezydent patłumačyŭ heta svajmu siabru Mervinu Ołaskamu, ideolahu kanservatyŭnych chryścijanaŭ. Zapaviet Chrysta “padstavić druhuju ščaku” tyčycca asabista Buša-chryścijanina. Buš-prezydent kirujecca inšym vysłoŭjem Biblii: “Chto pralje kroŭ čałaviečuju, taho kroŭ pralijecca rukoju čałavieka: bo čałaviek stvorany pavodle vobrazu Božaha”. (Byćcio 9,6).

“Voś zła”, akreślenaja Bušam na suśvietnaj mapie, pa sutnaści svajoj jość tealahičnaj idealahiemaj. Prezydenckija śpičrajtery vykarystali spačatku farmuloŭku “voś nianaviści”. Ale paśla sam Buš zamianiŭ jaje na “voś zła”. Hetaje akreśleńnie pierahukałasia z Rejhanavym aznačeńniem SSSR, jak “imperyi zła”. Padzieł śvietu na dziaržavy, što ŭ baraćbie z teroram mohuć być adno “za nas” ci “suprać nas” — vynik relihijnaha pierakanańnia, što bohabajazny čałaviek pavinien adroźnivać Dobraje i Drennaje. A jašče ŭ imknieńni vyjhrać na čale demakratyčnych siłaŭ baraćbu suprać tatalitaryzmu i teroru chavajecca ładnaja porcyja misijanerskaha impetu.

Spakojna, jak dziaržaŭnik

Ale svoj impet amerykanski kiraŭnik trymaje pad kantrolem zdarovaha dziaržaŭnickaha sensu. Abiacańniami “vykuryć zabojcaŭ” i znajści ben Ładena “žyvoha ci miortvaha”, Buš ciešyŭ svaich techaskich ziemlakoŭ. Razam z tym jon nie śpiašaŭsia raspačynać vajnu suprać al-Kaidy i talibaŭ.

Hetak sama i ŭ sprečcy pamiž “karšunami” ź Minabarony i “hałubami” ź Dziarždepartamentu. Kali paŭstała dylema: ci vynosić irackaje pytańnie na razhlad AAN, ci adrazu vypraŭlać vojski ŭ Bahdad, Buš schiliŭsia na karyść pieršaha. Bo razumieje, što musić brać u raźlik zamiežnuju j abarončuju palityku.

Buš uśviedamlaje, što jon — nie intelektuał, i pakładajecca na svoj palityčny instynkt dy rozum. Jon viedaje, što jak doma, tak i za miažoj jaho mocna niedaaceńvajuć. Heta raniej dapamahała jamu brać usio novyja karjernyja vyšyni. “Ludzi mianie zaŭždy žachliva niedaaceńvali. Sabie na škodu”, — iranizuje Buš.

Pavodle Frankfurter Allgemeine Zeitung pierakłaŭ Siarhiej Bohdan

• 0
• 0
• 0
• 0
• 0
• 0
• 0
• 0