Былы прэзідэнт Францыі Нікаля Сарказі афіцыйна стаў падазраваным па крымінальнай справе аб «гандлі уплывам».
Сарказі паўстаў перад суддзёй позна ўначы ў аўторак пасля допыту ў паліцыі, які працягваўся 15 гадзін.
Лічыцца, што Сарказі стаў першым экс-кіраўніком дзяржавы ў найноўшай гісторыі Францыі, які падвергся паліцэйскаму допыту. Яго папярэднік, Жак Шырак, хоць і быў умоўна асуджаны ў 2011 годзе за фінансавыя махінацыі і парушэнне даверу ў бытнасць мэрам Парыжа, ніколі не быў затрыманы.
Згодна з французскім законам, суддзя будзе абавязаны разгледзець матэрыялы справы і прыняць рашэнне аб тым, ці дастаткова іх для прад'яўлення Сарказі абвінавачванняў.
У свае 59 гадоў Сарказі, які займаў пасаду прэзідэнта з 2007 па 2012 год, спадзяецца зноў выставіць сваю кандыдатуру на прэзідэнцкіх выбарах 2017 года. Раскручванне крымінальнай справы можа істотна парушыць гэтыя планы.
Разам з Сарказі па справе праходзіць яго адвакат Т'еры Эрзог, а таксама суддзя Жыльбэр Азібер, які ведаў аб ходзе расследавання і быццам бы ўступіў у недапушчальныя кантакты з прэзідэнтам і яго атачэннем.
Грошы Кадафі
Першапачаткова следства займалася праверкай сцвярджэнняў аб тым, што выбарчы фонд Сарказі ў 2007 годзе незаконна атрымліваў фінансаванне ад былога лівійскага лідара Муамара Кадафі.
Але да гэтага дадаліся пакуль неправераныя сведчанні аб тым, што Сарказі абяцаў суддзі Азіберу прэстыжную пасаду ў Манака ў абмен на інфармацыю аб ходзе расследавання.
Таксама вылучаецца версія аб тым, што Азібер папярэдзіў адваката прэзідэнта аб тым, што ў рамках расследавання тэлефон Сарказі праслухоўваецца.
Азібер уваходзіць у склад апеляцыйнага суда — адной з найвышэйшых судовых інстанцый Францыі.
Сарказі настойвае, што ўсе абвінавачванні супраць яго палітычна матываваныя.
Прыхільнікі былога прэзідэнта паказваюць на тое, што кожны раз, калі Сарказі робіць крок да вяртання ў вялікую палітыку, у прэсу прасочваюцца новыя адкрыцці аб ходзе крымінальнай справы.
Французскія правыя падазраюць, што гэта адбываецца не без удзелу кіруючых сацыялістаў.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень10
Каментары