Сёлета ў Беларусі было закрыта 87 малакамплектных школ, у якіх вучыліся ад 10 да 30-40 вучняў. Аб гэтым паведаміў міністр адукацыі Сяргей Маскевіч на прэс-канферэнцыі 14 жніўня.
«Яны неэфектыўныя. Неабходна ствараць лепшыя ўмовы для навучання, і, безумоўна, лепшыя ўмовы будуць у новых школах, у якія пойдуць вучыцца дзеці з закрытых школ», — адзначыў ён. Пры гэтым міністр канстатаваў, што ў большасці закрытых школ навучанне вялося на беларускай мове.
Паводле слоў Маскевіча, да пачатку навучальнага года ў Беларусі адкрыюцца чатыры новыя школы ў агульнай складанасці на 3 тысячы навучальных месцаў: дзве ў Мінску і па адной — у Гродне і Брэсце. «Гэта самыя сучасныя школы, дзе навучанне будзе весціся на беларускай і рускай мовах, у адпаведнасці з нарматыўнай базай, якая існуе сёння, у адпаведнасці з пажаданнямі бацькоў», — падкрэсліў ён.
Як адзначыў міністр, у ведамстве не бачаць праблемы ў выбары мовы навучання школьнікаў.
«Ёсць магчымасць вучыцца ці на беларускай, ці на рускай мове, я маю на ўвазе вывучэнне на гэтых мовах агульных прадметаў. Але мы сёння ставім галоўную задачу: каб, пачынаючы з дашкольных навучальных устаноў і пачатковай школы асабліва, дзеці паспяхова валодалі і беларускай, і рускай мовамі», — сказаў Маскевіч.
Паводле яго слоў, асабліва важна, каб дзеці «маглі выкарыстоўваць, любілі і беларускую, і рускую мову». «Мы павінны ісці такім шляхам, мне здаецца, каб і тое, і другое было нашым родным», — дадаў міністр.
Каментары